އަވައްޓެރި ޤައުމުތަކަށް ފުށް އެކްސްޕޯޓް ކުރާނަން: އިންޑިއާ
އިންޑިއާއިން ގޮދަންފުށް އެކްސްޕޯޓްކުރުން އެ ގައުމުގެ ސަރުކާރުން މަނާކުރި ނަމަވެސް، އަވައްޓެރި ޤައުމުތަކަށް އިންޕޯޓްކުރުން ކުރިއެކޭ އެއްގޮތަށް ކުރިޔަށްދާނެ ކަަމަށް އިންޑިއާ ސަރުކާރުން ވިދާޅުވެއްޖެއެވެ.
އިންޑިއާއިން ގޮދަން އެކްސްޕޯޓް ކުރުން މަނާކޮށްފައި ވަނީ ރަޝިއާ ޔޫކްރެއިން ހަނގުރާމައާއި އިޤްތިޞާދީ މައްސަލަތަކުގެ ސަބަބުން ގޮދަނުގެ އަގު އުފުލުމާ ގުޅިގެންނެވެ.
ދުނިޔޭގައި ދެވަނަ އަށް އެންމެ ގިނައިން ގޮދަންފުށް އުފައްދާ އިންޑިއާއިން ވަރަށް ގިނަ ގައުމުތަކަށް އެ އެކްސްޕޯޓް ކުރެއެވެ. އޭގެ ތެރޭގައި ރާއްޖެ ވެސް ހިމެނެއެވެ.
އިންޑިއާއިން ގޮދަށް ފުށް އެކްސްޕޯޓް ކުރުން މަނާ ކުރި ނަމަވެސް އަވައްޓެރި ޤައުމުތަކާއި ފަޤީރު ޤައުމުތަކަށް އެކްސްޕޯޓްކުރުން ހުއްޓައިނުލާނެ ކަމުގެ ޔަޤީންކަން އެ ޤައުމުގެ ސަރުކާރުން ވަނީ ދީފައެވެ. އަދި އިންޑިއާގައި އަމިއްލަ ބޭނުމަށާއި އަވައްޓެރި އަދި ބޭނުން ޖެހިފައިވާ ޤައުމުތަކަށްވާ ވަރަށް ގޮދަން ހުރި ކަމުގެ ޔަޤީންކަން ދީފައިވެއެވެ.
މިކަމާ ގުޅޭގޮތުން، ފޮރިން މިނިސްޓްރީގެ ކޮމިއުނިކޭޝަންސް ޑިރެކްޓަރު މިއުވާން މުޙައްމަދު "ދެން"އަށް ވިދާޅުވީ، އިންޑިއާއިން އެކްސްޕޯޓް ކުރުން މަނާ ކުރި ނަމަވެސް، ރާއްޖެއަށް އިންޕޯޓް ކުރުމަށް އަސަރު ނުކުރާނެ ކަމަށެވެ.
އިންޑިއާއިން ބައެއް ބާވަތުގެ މުދާ އެކްސްޕޯޓްކުރުން މަނާކުރި ނަމަވެސް މީގެ ކުރިން ވެސް ރާއްޖެއަށް ހާއްސަ ހުއްދައެއްގެ ދަށުން އެ ބާވަތްތައް ގެނެވެއެވެ.
ރާއްޖެއަށް ބޭނުންވާ ކާބޯތަކެތީގެ ޒަރޫރީ ބާވަތްތައް އެތެރެކުރުމަށް އިންޑިއާ ސަރުކާރުން ދީފައިވާ ކޯޓާ 2020ވަނަ އަހަރު އޯގަސްޓް މަހުގެ ތެރޭގައި ވަނީ އައުކޮށްފައެވެ. އޭރު ކޯޓާ އައުކޮށްދީފައިވާ ކާބޯތަކެތީގެ ބާވަތްތަކުގެ ތެރޭގައި ހަނޑުލާއި ހަކުރާއި ފުށާއި ފިޔާ އަދި ބިހާއި އަލުވީގެ އިތުރުން މުގު ހިމެނެއެވެ.
