އިނގެރޭސިން ޓްވީޓް ކުރައްވާ ސަބަބު ވިދާޅުވެ، ރައީސް ޔާމީން ފޭސްބުކަށް އަންނަކަން ހާމަ ކުރައްވައިފި

ދާދި ފަހުން ޓްވިޓަރ ބޭނުން ކުރައްވަން ފެއްޓެވި އިދިކޮޅު ލީޑަރު ރައީސް ޔާމީން އަބްދުލްޤައްޔޫމް ޓްވިޓަރ ބޭނުން ކުރައްވަން ފެއްޓެވި ސަބަބު ހާމަ ކުރައްވައިފިއެވެ.

Ads by STELCO

އޮންލައިން ނޫސް "އަދަދު"އަށް ދެއްވި އިންޓަރވިއުއެއްގައި ރައީސް ޔާމީން ވިދާޅުވީ، މީސްމީޑިއާ ބޭނުން ކުރައްވަން ފެއްޓެވީ ކޮންމެ ފަހަރަކު އެ މަނިކުފާނު ވިދާޅުވާން ބޭނުންފުޅުވާ އެއްޗެއް ޕާޓީ ތެރެއިން ނުވަތަަ ސްޕޯކްސްޕާސަނެއް މެދުވެރި ކުރައްވާ ވިދާޅުވާން ބޭނުންފުޅު ނުވާތީ ކަމަށެވެ.އަދި މީސްމީޑިއާ ބޭނުންފުޅު ކުރެއްވުމަކީ ވަރަށް ނުކުރާން ހުންނަވައި ކުރެއްވި ކަމެއް ކަމަށް ވިދާޅުވިއެވެ.

ރައީސް ޔާމީން ވަނީ ޓްވީޓްތައް އިނގެރޭސި ބަހުން ކުރައްވާ ސަބަބު ވެސް ތަފްސީލް ކޮށްދެއްވައިފައެވެ. މިގޮތުން ވިދާޅުވީ، ދިވެހި ރާއްޖޭގެ ހާލަތު ދިވެހިންނަށް ކޮންމެ ދުވަހަކު ފެންނަ ކަމަށާއި އެހެން ކަމުން ބޭނުންފުޅު ވަނީ ދިވެހިންގެ ހާލަތު ބޭރު ދުނިޔެއަށް ވިދާޅުވެދެއްވަން ކަމަށެވެ.

"އަޅުގަނޑުގެ އޯޑިއަންސަކީ ހަމައެކަނި ދިވެހި ރައްޔިތުންނެއް ނޫން. ދިވެހި ރާއްޖޭގެ ހާލަތު މިއަދު އޮތް ގޮތް އަޅުގަނޑުމެން އެންމެ ބޮޑަށް ކިޔައިދެން ޖެހެނީ ރާއްޖެއިން ބޭރަށް. އެއްވަނަ ދުނިޔޭގެ ޤައުމުތަކަށް. ޑިމޮކްރަސީގެ ނަމުގައި އަޅުގަނޑުމެންނަށް އަދަބު ދިން ޤައުމުތަކަށް ވެސް އެނގެން އެބަޖެހޭ، މިހާރު ދިވެހި ރާއްޖޭގެ ހާލަތު އޮތީ ކިހިނެތްތޯ" ރައީސް ޔާމީން ވިދާޅުވީ، ޓްވީޓްތައް ބޮޑަށް އަމާޒު ކުރައްވަނީ، ބޭރު ޤައުމުތަކުގެ ސަފީރުންނަށާއި ބޭރުގެ ނޫސްވެރިންނަށާއި އެއްވަނަ ދުނިޔޭގެ ޤައުމުތަކުގައި ޑިމޮކްރަސީއަށް ލޯބި ކުރައްވާ ބޭފުޅުންނަށް ކަމަށެވެ.

ޓްވީޓްތަކުގައި ބޮޑެތި ބަސްތައް. ބޭނުން ކުރައްވަނީ ކީއްވެގެންތޯ ތަފްސީލްކޮށްދެއްވަމުން ވިދާޅުވީ ޓްވިޓަރއަކީ ވަކި ވަރަކަށް ބަސް ބޭނުން ކުރެވޭ އެއްޗަކަށްވުމުން، ވަރަށް ކުރުކޮށް އެމަކު ބާރުގަދަކޮށް ވިދާޅުވާން ބޭނުންފުޅުވާ އެއްޗެއް ވިދާޅުވާ ކަމަށެވެ. އަދި ވިދާޅުވާ ގިނަ ވާހަކަތައް އެއްކޮށް ތަފްސީލް ކުރެވޭނި މަޒްމޫނެއްހައި ދިގުކޮށް ކަމަށް ވިދާޅުވިއެވެ. ރައީސް ޔާމީން ވިދާޅުވީ، މިހާރަށް ވުރެ ތަފްސީލްކޮށް ވާހަކަތައް ވިދާޅުވުމަށް ފޭސްބުކް ބޭނުން ކުރައްވަން ފައްޓަވަން ގަސްދު ކުރައްވާ ކަމަށެވެ.