ރާއްޖެއަށް ބަރުލަމާނީ ނިޒާމެއް ގެނެސްފި ނަމަ ވެރިކަން ދެމިއެއް ނޯންނާނެ: ރައީސް ޔާމީން
ނިޒާމެއްގެ ގޮތުގައި ބަރުލަމާނީ ނިޒާމަށް ތާއީދު ކުރާ ކަމަށާއި އެހެން ނަމަވެސް ބަރުލަމާނީ ނިޒާމު ރާއްޖެއަށް ގެންނަން ތާއީދު ނުކުރައްވާ ކަމަށް އިދކޮޅު ލީޑަރު ރައީސް ޔާމީން އަބްދުލްޤައްޔޫމް ވިދާޅުވެއްޖެވެ.
ރައީސް ޔާމީން މިހެން ވިދާޅުވީ، ބަރުލަމާނީ ނިޒާމަށް ތާއީދު ކުރައްވަންތޯ "އަދަދު"އިން ކުރިޔަށް ގެންދިޔަ އިންޓަރވިއެއްގައި ސުވާލު ކުރުމުންނެވެ.
"އަޅުގަނޑަކީ ފެށުނީއްސުރެ ވެސް ބަރުލަމާނީ ނިޒާމަށް ތާއީދު ކުރާ މީހެއް. ސަބަބަކީ އެއީ ރައްޔިތުންގެ ބަސްބުނެވޭނެ މަންދޫބުން މި އަންނަނީ. އެހެންވީމަ ގިނަ ދާއިރާާތަކުން މަންދޫބުން ގިނަ ރައްޔިތުން ތަމްސީލް ކުރާ މަންދޫބުން މިވަނީ" ރައީސް ޔާމީން ވިދާޅުވީ، ކަން މިހެން ހުރި ނަމަވެސް ރާއްޖޭގެ ހާލަތަށް ބަލާ ބަރުލަމާނީ ނިޒާމަށް ތާއީދު ނުކުރައްވާ ކަމަށެވެ.
ފުރަތަމަ ސަބަބެއްގެ ގޮތުން ވިދާޅުވީ، ރައްޔިތުންގެ މަޖިލީހުގެ މެންބަރުންނަށް ޕާޓީ ބަދަލު ކުރެވޭ ގޮތަށް އޮތް އޮތުމެވެ. ރައީސް ޔާމީންގެ ސަރުކާރުގައި، މަޖިލީސް މެންބަރުން ޕާޓީ ބަދަލު ކުރުމުން ގޮނޑި ގެއްލޭ ގޮތަށް ފާސް ކުރިއެވެ. ނަމަވެސް ފަހުން ސްޕްރީމް ކޯޓުން ވަނީ އެ ނިންމުން ބަދަލުކޮށްފައެވެ.
"އެއްބަހެއް ނުވެވުނު، އަޅުގަނޑުމެންގެ ޕާޓީއަކުން ވެސް އެއްބަހެއް ނުވެވުނު ފްލޯ ކްރޮސް ކުރީމަ، ވަކި ޕާޓީއެއްގައި، އެ ހިސާބުން ގޮނޑި ގެއްލެނީ، ވަކިވެ ވަޑައިގަންނަވަންޏާ، ވަޑައިގަންނަވާ އަލުން އިންތިޚާބު ވެގެން" ރައީސް ޔާމީން ވިދާޅުވީ، ޕާޓީ ބަދަލު ކުރުމުގެ ޘަޤާފަތް އޮންނަ ނަމަ ވެރިކަމެއް ދެމި ނޯންނާނެ ކަމަށެވެ.
"ދެވަނަ ކަމަކަށް، ރާއްޖޭގައި ހުރިހައި ކަމެއް ނިމިގެން މިދަނީ ފައިސާގެ ބާރުގައި ދެއްތޯ، ހުރިހާ ކަމެއް ނިމިގެން މިދަނީ ފައިސާގެ ބާރުގައި"
ރައީސް ޔާމީން ދެވަނަ ސަބަބެއްގެ ގޮތުގައި ވިދާޅުވީ، ވިޔަފާރިވެރިން އަދި ބޭރުގެ ބާރުތަކުން މެންބަރުން ގަންނާނެ ވާހަކައެވެ. އަދި ސަރުކާރު އެ މީހުންގެ ބާރުގެ ދަށަށް މިގޮތަށް ގެނެވޭނެ ކަމަށް ވިދާޅުވިއެވެ.
ރައީސް ޔާމީން ވިދާޅުވި ގޮތުގައި ބަރުލަމާނީ ނިޒާމެއް އަޔަސް، މަޖިލީހުން ވެރިކަން ކުރާ ޕާޓީއެއް ކަނޑައަޅާނީ މަދު މެންބަރުންގެ ތަފާތުން ކަމަށެވެ. އަދި މިއަދު އެމްޑީޕީގައި އޮތްވަރުގެ މަޖިލީހުގެ މެޖޯރިޓީއެއް ދެން ނުލިބޭނެ ކަމަށާއި އެމްޑީޕީއަށް މަޖިލިސް ބޮޑު މެޖޯރިޓީއެއް ލިބުނީ ޖުމްހޫރީ ޕާޓީއާ އެކު ހެދި އެއްބަސްވުމަކުން އެ ޕާޓީއަށް ގޮނޑި ދިނުމުން ކަމަށް ވެސް ވިދާޅުވިއެވެ.
ރާއްޖޭގެ ވެރިކަމުގެ ނިޒާމް ބަދަލު ކުރައްވަން އެންމެ ބޮޑަށް މަސައްކަތް ކުރައްވާ އެއް ބޭފުޅަކީ މަޖިލީހުގެ ރައީސް، ރައީސް ނަޝީދެވެ. ރައީސް ނަޝީދާއި ރައީސް ޔާމީނާ އެއްވެސް ގުޅުމެއް އޮވޭތޯ ސުވާލު ކުރުމުން ވިދާޅުވީ، އެމްޑީޕީގެ އިސް އެއްވެސް ބޭފުޅަކާ ރައީސް ޔާމީނާ ސިޔާސީ ގޮތުން އެއްވެސް ގުޅުމެއް ނޯންނަ ކަމަށެވެ.
