ދިވެހިރާއްޖޭގެ ދެވަނަ ޖޮއިންޓް ހައިޑްރޮގްރެފިކް ސާވޭ ނިންމައިލައިފި
އިންޑިއާގެ އަސްކަރިއްޔާއާއި އެމްއެންޑީއެފް ގުޅިގެން ކުރިއަށް ގެންދިޔަ ރާއްޖޭގެ ދެވަނަ ޖޮއިންޓް ހައިޑްރޮގްރެފިކް ސާވޭ ނިންމައިލައިފިއެވެ.
މި ސާވޭކޮށްފައި ވަނީ އިންޑިއާގެ މަނަވަރު ސުތްލެޖް (އައި.އެން.އެސް ސުތްލެޖް)އިން، 18 އެޕްރީލްއިން 25 މޭ 2022 އަށެވެ.
މި ދުވަސްވަރު ތެރޭގައި މަނަވަރުން ރާއްޖޭގެ އުތުރާއި، މާލެ ސަރަޙައްދު، އޭގެ ތެރޭގައި ތިލަފުށި، ހުޅުމާލެ އަދި ރާއްޖޭގެ ޕޯޓް ހިމެނޭހެން ސަރވޭކޮށްފައި ވެއެވެ.
ސަރވޭގެ ތެރޭގައި 6500 ނެނޮމީޓަރުގެ ސައުންޑިންގ ވަނީ ހަދައިފައެވެ. އޭގެ ތެރޭގައި އުތުރުގައި 4750 ނެނޮމީޓަރުގެ ސައުންޑިންގ އަދި މާލެ ސަރަހައްދުގައި 1730 ނެނޮމީޓަރުގެ ސައުންޑިންގ ހަދައިފައިވެއެވެ. އެގޮތުން މުޅިއަކު 944 ސްކޮއަރ ކިލޯމީޓަރުގެ ސަރަޙައްދަކަށް ސައުންޑިންގ ލައިން ފޮނުވައިގެން ކާމިޔާބުކަމާ އެކީ ސަރވޭކުރެވިފައިވާ އިރު، އެއީ އުތުރުގެ ހަނިމާދޫއިން ފެށިގެން ށަވިޔަނި އަތޮޅުގެ ފަރުކޮޅު ފުނަދޫއާ ހިސާބަށް 844 ސްކޮއަރ ކިލޯމީޓަރު އަދި މާލެ ސަރަޙައްދުގެ 100 ސްކޮއަރ ކިލޯމީޓަރުގައި ފުޅާދާއިރާއެއްގައި ކުރެވިފައިވާ ސަރވޭއެކެވެ. މި ސަރަޙައްދުތައް އެންމެ ފަހުން ސަރވޭކުރެވިފައި ވަނީ 1853 އަހަރުއެވެ. އައި.އެން.އެސް ސުތްލެޖްއިން ސަރވޭކުރުމަށް ބޭނުންކޮށްފައި ވަނީ މަލްޓި ބީމް އެކޯ ސައުންޑަރސްއެވެ.
