އިންޑިއާއިން ރާއްޖޭގެ 3 ސްކޫލަކަށް 4.6 މިލިއަން ރުފިޔާގެ އެހީ
ރާއްޖޭގެ ތިން ސްކޫލަކަށް އިންޑިއާއިން 4.6 މިލިޔަން ރުފިޔާގެ އެހީތެރިކަން ފޯރުކޮށްދީފިއެވެ.
އިންކްލޫސިވް އެޑިޔުކޭޝަން ސަޕޯޓް (އައި.އީ.އެސް) ޔުނިޓްތަކުގެ ހިންގުން ހަރުދަނާ ކުރުމަށް ޓަކައި އިންޑިއާއިން އެހީތެރިވެ ދެއްވައިފައި ވަނީ، ހއ.އޭއީސީ (ހއ. ދިއްދޫ)، އަބޫބަކުރު ސްކޫލް, (ގދ.ތިނަދޫ) އަދި އިހައްދޫ ސްކޫލް (ލ.ގަން) ސްކޫލަށެވެ.
މި ތިން ސްކޫލްގައި އައި.އީ.އެސް ޔުނިޓްތަކުގެ ހިންގުން ހަރުދަނާ ކުރުމަށް ޓަކައި ތިން ދާއިރާއަކުން އެހީތެރިކަން ފޯރުކޮށްދޭނެއެވެ. އެއީ؛
- އިންސާނީ ވަސީލަތްތައް
- ބޭނުންވާ އިންފްރާސްޓްރަކްޗަރ އާރާސްތުކޮށް ތަރައްޤީކުރުން
- ބޭނުންވާ ތަކެތި ހޯދުން
- އުނގަންނައިދިނުމާއި ކިޔަވައި ދިނުމަށް ބޭނުންވާ ތަކެތި ފޯރުކޮށްދިނުން
އިންޑިއާ އެންބަސީން މިއަދު ނެރުނު ބަޔާނެއްގައި ވިދާޅުވީ، މުޅި ތައުލީމީ ނިޒާމުގައި އިކުއިޓީއާއި އެކްސެސިބިލިޓީގެ ބައިތައް ގެނެސްދޭ މި މަޝްރޫއަށް އެއްބާރުލުން ދިނުމަކީ އިންޑިއާއަށް ލިބޭ ފަޚުރެއް ކަމަށެެވެ.
ތަޢުލީމީ ތަރައްޤީއަށް އެހީތެރިވެދޭ އަދި ކުޑަކުދިންގެ ދިރިއުޅުމަށް ކޮލިޓޭޓިވް ބަދަލެއް ގެނައުމަށް އެހީތެރިވެދޭ މަޝްރޫޢުތަކަކީ، އިންޑިޔާއިން ރާއްޖެއަށް ވެދޭ ތަރައްޤީގެ އެހީގެ މައިގަނޑު ދާއިރާއެވެ. މީގެ ތެރޭގައި ފެހެންދޫ-ގޮއިދޫ ސްޓޫޑެންޓް ފެރީ ހަދިޔާކުރުމާއި، ރާއްޖޭގެ 67 ރަށެއްގައި ކުޑަކުދިންގެ ޕާކު ޤާއިމްކުރުމަށް ބޭނުންވާ ސާމާނު ހަދިޔާކުރުމާއި، 'ފިޔަވަތި - ހޯމް ފޮރ ވަލްނަރަބަލް ޗިލްޑްރަންސް' މަރާމާތުކުރުމާއި، ފުވައްމުލަކާއި ކުޅުދުއްފުށީގައި އީ.އެސް ސަޕޯޓް ޔުނިޓްތައް ހަރުދަނާކުރުމާއި، ޅޮހި އަދި ކިނޮޅަހު ސްކޫލްގައި ކްލާސްރޫމްތައް އެޅުމުގެ މަސައްކަތް ހިމެނެއެވެ. މިއިން ކޮންމެ އިފްތިތާޙު ކުރެއްވިފައިވާ މަޝްރޫޢަކީ ވެސް ކުޑަކުދިންނަށް ވަރަށް ބޮޑަށް ބޭނުންވާ މަޝްރޫޢުތަކެކެވެ.
އިންޑިއާގެ 260 މިލިއަން ރުފިޔާގެ ހިލޭ އެހީގެ ދަށުން ރާއްޖޭގައި 45އަށް ވުރެ ގިނަ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް ދަނީ ހިންގަމުންނެވެ. މީގެ ތެރެއިން ގާތްގަނޑަކަށް 20 ވަރަކަށް މަޝްރޫއު ނިންމައި އިފްތިތާހު ކޮށްފައިވެއެވެ.
