ރާއްޖޭގެ ދަރަނި 100 ބިލިއަނަށް އަރަނީ
މިއަހަރުގެ ފުރަތަމަ ތިން މަހު ދައުލަތުން އެކި ކަންކަމަށް ނެގި ލޯނުތަކާ އެކު ދައުލަތުގެ ދަރަނި 99 ބިލިއަން ރުފިޔާއަށް އަރައިފިއެވެ.
ތަރައްޤީގެ މަޝްރޫއުތައް ހިންގުމަށާއި ހަރަދުތައް ހަމަޖެއްސުމަށް މިއަހަރުގެ ފުރަތަމަ ތިން މަހު ސަރުކާރުން ނަގައިފައިވާ ލޯނާއި ސޮވެރިން ގެރެންޓީ ހިމަނައިގެން ދައުލަތުގެ ދަރަންޏަށް ވަނީ މިދިޔަ އަހަރު ނިމުނު ހުރި ވަރަށް ވުރެ 4.3 ބިލިއަން ރުފިޔާ އިތުރުވެފައެވެ.
ދައުލަތުގެ ދަރަނި 99 ބިލިއަނަށް އަރައިފައިވާއިރު ސޮވެރިން ގެރެންޓީ ނުލާ ދަރަނި ހުރީ 85 ބިލިއަން ރުފިޔާގައެވެ. މީގެ ތެރޭގައި ހިމެނެނީ އެތެރޭގެ 52 ބިލިއަން ރުފިޔާގެ ދަރަންޏާއި ބޭރުގެ 33 ބިލިއަން ރުފިޔާގެ ދަރަންޏެވެ.
މި އަހަރަށް ލަފާކޮށް ސަރުކާރުން ހުށައެޅި ބަޖެޓުގައި މިއަހަރު ދައުލަތުގެ ދަރަނި ޖުމްލަ 103 ބިލިއަނަށް އަރާނެކަމަށް ވަނީ ލަފާކޮށްފައެވެ. މިއަހަރުގެ ފުރަތަމަ ތިން މަސް ދުވަހު ދައުލަތުން ވަނީ 4.8 ބިލިއަން ރުފިޔާގެ ލޯނު ނަގައިފައެވެ.
މި ސަރުކާރުން މިހައިތަނަށް އެންމެ ގިނަ ލޯނު ނަގާފައިވަނީ އިންޑިއާއިންނެވެ.
