3000 މެމްބަރުން ހަމަކުރަންދިން މުއްދަތު އިތުރުކޮށްފި
3000 މެމްބަރުން ހަމަކުރަން ޕާޓީތަކަށް ދިން މުއްދަތު އިލެކްޝަންސް ކޮމިޝަނުން އިތުރުކޮށްފިއެވެ.
އެ ކޮމިޝަނުން ވިދާޅުވީ، ގާނޫނުގައިވާ ޢަދަދަށް މެންބަރުން ހަމަކުރުމަށް ނޯޓިސް ދެވިފައިވާ ސިޔާސީ ޕާޓީތަކުން ހުށަހަޅާ ފޯމުތައް އަންގާރަ ދުވަހުގެ 22:00އާ ހަމައަށް ބަލައިގަތުމަށް އިލެކްޝަންސް ކޮމިޝަނުން ނިންމައިފައިވާ ކަމަށެވެ. ކުރިން ފޯމްތައް ހުށަހެޅުމުގެ މުއްދަތު ހަމަވާގޮތަށް އޮތީ އަންގާރަ ދުވަހުގެ 14:00އާ ހަމައަށެވެ.
ސިޔާސީ ޕާޓީތަކުގެ ގާނޫނުގައި ބުނާ 3000 މެމްބަރުން ހަމަނުވެގެން އުވައިލާން ނޯޓިސް ދީފައިވާ ޕާޓީތަކުގެ ތެރެއިން ޑީއާރުޕީއާއި މޯލްޑިވްސް ލޭބަރ އެންޑް ސޯޝަލް ޑިމޮކްރެޓިކް ޕާޓީ (އެމްއެލްއެސްޑީ) މެމްބަރުން ހަމަކުރަން އަދި ފޯމް ހުށަނާޅާކަމަށް އިލެކްޝަންސް ކޮމިޝަނުން ހޯމަ ދުވަހު ވަނީ ބުނެފައެވެ. 3000 މެމްބަރުން ހަމަކުރުމަށް ޑީއާރްޕީން 1200 ފޯމް އަދި އެމްއެލްއެސްޑީން 300އެއްހައި ފޯމް ހުށަހަޅަން ޖެހެއެވެ.
އުވައިލުމުގެ ނޯޓިސް ލިބުނު އެމްއާރުއެމްއިންނާއި އެމްޓީޑީން ވަނީ މެމްބަރުން ހަމަކޮށްފައެވެ.
