އެމެރިކާގެ އަސްކަރިއްޔާއިން ހިންގި ތަމްރީން ނިންމައިލައިފި
ދިވެހި ސިފައިންގެ ގާބިލްކަން އިތުރުކުރުމުގެ ގޮތުން، އެމެރިކާގެ ސެކިއުރިޓީ ފޯސް އެސިސްޓެންސް ބްރިގޭޑް (އެސްއެފްއޭބީ)އާ ގުޅިގެން އެމްއެންޑީއެފުން ހިންގި "އެކްސަސައިޒް ބްލެކް މާލިން" ނިންމައިލައިފިއެވެ.
ތަމްރީން ނިންމުމުގެ ގޮތުން ބަންޑާރަކޮށީގެ އޮޑިޓޯރިއަމްގައި މިއަދު ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް މޭޖާ ޖެނެރަލް ޢަބްދުﷲ ޝަމާލްއެވެ. މި ރަސްމިއްޔާތުގައި ތަމްރީނުތަކުގައި ބައިވެރިވި ދިވެހި ސިފައިންނަށް ހަނދާނީ ލިޔުން ހަވާލުކޮށްދެއްވީ ޔޫއެސް ޕެސިވިކްގެ ޑެޕިއުޓީ ކޮމާންޑިން، މޭޖާ ޖެނެރަލް ކްރިސް ސްމިތުއެވެ.
މި ތަމްރީން ކުރިއަށް ގެންގޮސްފައި ވަނީ މިދިޔަ މެއި މަހުގެ 15އިން މިމަހުގެ 10ވަނަ ދުވަހުގެ ނިޔަލަށް، އެމްއެންޑީއެފް ނޮދަން އޭރިއާ ހެޑްކްއޯޓަޒް ، ޅ. މާފިލާފުށީގައެވެ. މިއީ، އެމެރިކާ އަސްކަރިއްޔާއާ ގުޅިގެން އެމްއެންޑީއެފުން ބޭއްވި "އެކްސަސައިޒް ބްލެކް މާލިން"ގެ ދެވަނަ ތަމްރީނު އެކްސަސައިޒެވެ.
މިރަސްމިއްޔާތުގައި ޗީފް އޮފް ޑިފެންސް ފޯސް ވިދާޅުވި ގޮތުގައި އެކްސަސައިޒް ބްލެކް މާލިންއަކީ ޔޫއެސް – މޯލްޑިވްސް ޑިފެންސް އެންޑް ސެކިއުރިޓީ ކޯޕަރޭޝަންގެ ފެށުމެވެ. މީގެ އެއް އަހަރު ކުރިން ފެށިގެން ދިޔަ މި އެކްސަސައިޒް އެމްއެންޑީއެފްގެ މެރީންސްއަށް ހާއްސަ ކުރެވިފައިވީ ނަމަވެސް، މި އަހަރުގެ އެކްސަސައިޒް ކުރިއަށް ގެންގޮސްފައި ވަނީ އެމްއެންޑީއެފްގެ މެރީންސް، ލޮޖިސްޓިކް ކޮމްޕޯނަންޓްސް، އީއޯޑީ ޓީމްސް، އަދި އިންޓެލިޖަންސްގައި އުޅޭ ސިފައިންނަށް އަމާޒުކޮށްގެންނެވެ.
މިއަހަރުގެ ތަމްރީން އަމާޒުކުރި ދާއިރާތަކަކީ އިންފެންޓްރީ، މެޑިކަލް ކޮމްބެޓް، ލޮޖިސްޓިކްސް އަދި އެކްސްޕްލޯސިވް އޯޑްނަންސް ޑިސްޕޯސަލް (އީއޯޑީ) އެވެ. މިގޮތުން މި ތަމްރީނުތައް ކުރިއަށް ދިޔައިރު، ސިމިޔުލޭޝަންގެ ގޮތުގައި ސިފައިން ބޭނުންކުރާ ހަތިޔާރާއި ގޮވާ ތަކެތި ބޭނުންކޮށްފައި ވެއެވެ. ތަމްރީންގައި އެމެރިކާ އަސްކަރިއްޔާގެ ފަރާތުން 25 ޓްރެއިނަރުން އަދި 70 ދިވެހި ސިފައިން ބައިވެރިވިއެވެ.
އެކްސަސައިޒް ބްލެކް މާލިން ފުރަތަމަ ބޭއްވީ މިދިޔަ އަހަރުގެ ފެބުރުވަރީ 24އިން މިދިޔަ އަހަރުގެ އޭޕްރީލް ފަސްވަނަ ދުވަހުގެ ނިޔަލަށް މާފިލާފުށީގައެވެ. ފުރަތަމަ ފަހަރު ބައިވެރިކުރީ 30 ދިވެހި ސިފައިންނެވެ. އަދި އެމެރިކާ އަސްކަރިއްޔާއިން 14 ޓްރެއިނަރުން ބައިވެރިވެފައި ވެއެވެ.
އެކްސަސައިޒް ބްލެކް މާލިން ތަމްރީނަކީ ސިފައިން އަދާކުރަން ޖެހޭ އޮޕަރޭޝަނަލް ޓާސްކުތަކަށް ތަމްރީނުކޮށް، ސިފައިންގެ ގާބިލުކަން އިތުރުކުރުމަށާއި، އެމްއެންޑީއެފްގެ ހިންގުމުގެ ގާބިލްކަން އިތުރުކުރުމުގެ މަގުސަދުގައި ކުރިއަށްގެންދާ ތަމްރީނެކެވެ.
