ލަންކާގެ ރައީސަކު އިންތިޚާބު ކުރުން 20ގައި، އިދިކޮޅު ލީޑަރު ވާދަކުުރައްވާނެ
ލަންކާގެ މިހާރު އުފެދިފައިވާ ސިޔާސީ ހަމަނުޖެހުންތަކުގެ ސަބަބުން ވެރިކަމުން މިހާރުގެ ރައީސް ގޮޓަބަޔާ ރާޖަޕަކްސަ އިސްތިއުފާ ދޭން ނިންމުމާ އެކު، މި އަންނަ ބުދަ ދުވަހު (20 ޖުލައި) އެ ޤައުމުގައި ރައީސަކު ހޮވުމަށް އިންތިޚާބު ބޭއްވުމަށް ނިންމައިފިއެވެ.
ރައީސް ގޮޓާބަޔަ ރާޖަޕަކްސަ މާދަމާ އިސްތިއުފާ ދެއްވާނެކަން ވަނީ އިއުލާން ކުރައްވައިފައެވެ. އަދި އޭނާގެ ބޭބެ މަހިންދަރާޖަ ޕަކްސަ ވެސް ވަނީ މީގެ މަހެއް ދުވަސް ކުރިން ރައްޔިތުންގެ ޕްރެޝަރު ބޮޑުވެ އިސްތިއުފާ ދެއްވައިފައެވެ. އަދި އެ ޤައުމުގެ މިހާރުގެ ބޮޑު ވަޒީރު ރަނިލް ވެސް ވަނީ އިސްތިއުފާ ދެއްވަން ނިންމަވައިފައިވާކަން އިއުލާން ކުރައްވައިފައެވެ.
ރައީސް އިސްތިއުފާ ދެއްވުމުން، އެ މަޤާމަށް ވާދަ ކުރައްވާނެކަމަށް އެ ގައުމުގެ އިދިކޮޅު ލީޑަރު ސަޖިތު ޕްރެމަދާސަ ވަނީ ވިދާޅުވެފައެވެ.
އޭނާ މިހެން ވިދާޅުވީ، ޕާޓީތަކާއެކު ކުރި މަޝްވަރާތަކަށް ފަހު ބީބީސީއަށް ދެއްވި އިންޓަވިއުއެއްގައެވެ. އޭނާ ތަމްސީލްކުރާ ސަމާގީ ޖަނާ ބަލަވެގަޔާ (އެސްޖޭބީ) ޕާޓީންނާއި އެކުވެރި ޕާޓީތަކުން މިގޮތަށް އެއްބަސް ވެފައިވާ ކަމަށް އޭނާ ވިދާޅުވިއެވެ.
ޕްރެމަދާސައަށް ވަނީ 2019ވަނަ އަހަރު ރިޔާސީ އިންތިހާބުގައި ވާދަކުރައްވައި ނާކާޔާމިޔާބީއާ ކުރިމަތިވެވަޑައިގެންފައެވެ. އަދި މިދިޔަ އޭޕްރީލް މަހު ލަންކާގެ ބޮޑުވަޒީރުކަމުގެ މަގާމަށް ވަޑައިގަތުމަށް ސަޖިތަށް ވަނީ ދައުވަތު އަރުވައިފައެވެ. ނަމަވެސް އެ ދައުވަތު ޤަބޫލު ކުރައްވައިފައެއް ނުވެއެވެ.
