މަނިކުފާނު ކޮންމެ ސަރުކާރަކާ ކޯލިޝަން ހެދީ ފައިސާ ނަގައިގެން: ނަރީޝް
ޢަދާލަތު ޕާޓީ ދެމި އޮންނާނީ އިސްލާމްދީނުގެ މަތިވެރި އުސޫލުތައް ނެގެހެއްޓުމުގެ ޒިންމާ އަދާކުރުމުގައިކަމަށް އެ ޕާޓީގެ ރައީސް އަދި ހޯމް މިނިސްޓަރު އިމްރާން ޢަބްދުﷲ ވިދާޅުވުމުން މާލޭގެ ޑެޕިއުޓީ މޭޔަރު އަޙްމަދު ނަރީޝް ރައްދު ދެއްވައިފިއެވެ.
އިމްރާން މިއަދު ކުރެއްވި ޓްވީޓެއްގައި ވަނީ ޢަދާލަތު ޕާޓީ އުފެއްދީ ރާއްޖޭގައި ފަނޑުވަމުންދިޔަ އިސްލާމްދީނުގެ މަތިވެރި އުސޫލުތައް ނެގެހެއްޓުމަށްކަމަށް ވިދާޅުވެފައެވެ. އަދި އެ ޕާޓީ ދެމި އޮންނާނީ އެ ޒިންމާ އަދާކުރުމުގައިކަމަށް ވެސް އޭނާ ވިދާޅުވިއެވެ.
އިމްރާންގެ ޓުވީޓަށް ރައްދު ދެއްވަމުން ނަރީޝް ވަނީ އެ ޒިންމާ އުފުލުނީ ކޮންއިރަކުތޯ ސުވާލުކުރައްވައިފައެވެ. އަދި ޢަދާލަތުން ކޮންމެ ބަޔަކާއެކު ވެސް ކޯލިޝަން ހެދީ ފައިސާ ނަގައިގެން ކަން ހުދު އޭނާއަށް އެނގޭކަމަށް ވެސް ނަރީޝް ވިދާޅުވިއެވެ.
''މަނިކުފާނު ކޮންމެ ސަރުކާރަކާ ކޯލިޝަން ހެދީ ނަގުދު ފައިސާ ނަގައިގެން ކަން ދެނަހުރި އެކަކު އަޅުގަނޑަކީ ވެސް. އަދި އެކަން ދެނަހުރި ލޮލުން ދެކި އަތުން ހިފާފައިވާ އަޅުގަނޑު ފަދަ އެތައް ބައިވަރު ބައެއް އެބަ ތިބިކަން މަނިކުފާނުވެސް ދަންނާނެ.'' ނަރީޝް ވިދާޅުވިއެވެ.
އިމްރާން މީގެ ކުރިން ވިދާޅުވެފައިވަނީ މާތްވެގެންވާ އިސްލާމްދީނާއި، ޤައުމުގެ ސިޔާދަތާއި، މިނިވަންކަން ރައްކާތެރިވެ، ރައްޔިތުންގެ ހައްގުތައް ފުރިހަމައަށް އަދާކޮށްދޭހައި ހިނދަކު ޢަދާލަތު ޕާޓީން ސަރުކާރާއި އެންމެ އިންޗިއެއް ވެސް ދުރުވެގެން ނުދާނެ ކަމަށެވެ. ނަމަވެސް އެ އަސާސްތަކުން ފަހަތަށް ޖެހިލައިފި ހިނދަކު، ކޯލިޝަން ރޫޅާލައި، ސަރުކާރާއި ދެކޮޅަށް މަސައްކަތްކުރުމަށް އެޕާޓީން ފަހަކަށް ނުޖެހޭނެ ކަމަށާއި، އެއީ ޕާޓީގެ ނިންމުންކަމަށް ވެސް އިމްރާން ވިދާޅުވެފައިވެއެވެ.
ނަރީސްއަށް ކޯޓަށް ޗިޓުއައި ފޯނަށް ލާރި ނުދައްކާގެން!