ރައީސްގެ ދެ އިލްތިމާސް ދަރިވަރުންނަށް: އިގުތިސާދުކުރަން ދަސްކޮށް, ތިމާވެށި ހިމާޔަތްކުރޭ
އިގުތިސާދުކުރަން ދަސްކުރުމަށާއި ތިމާވެށި ހިމާޔަތްކުރުމަށް ރައީސް އިބްރާހިމް މުޙައްމަދު ޞާލިޙް މިއަދު ހުރިހާ ދަރިވަރުންނަށް އިލްތިމާސްކުރައްވައިފިއެވެ.
ދިރާސީ އާ އަހަރު ފެށުމުގެ ގޮތުން އަމީނިއްޔާ ސްކޫލުގައި މިއަދު ހެނދުނު ބޭއްވި ޚާއްސަ އެސެމްބްލީގައި ދެއްކެވި ވާހަކަފުޅުގައި ދަރިވަރުންނާ މުޚާޠަބު ކުރައްވައި ރައީސް ޞާލިޙް ވިދާޅުވީ
ދިރާސީ އައު އަހަރަކާ ބައްދަލުކުރާއިރު ހިތްހަމަޖެހިގެން އައު ޢަޒުމަކާއެކު ކިޔެވުން ފެށުމަށް އިލްތިމާސްކުރާ ކަމަށެވެ.
ސްކޫލަކަށް ހާޒިރުވެ ކިޔެވުމަކީ ވަރަށް ގިނަ ކަންތައްތައް އެކުލެވޭ ކަމެއްކަން ފާހަގަކުރައްވައި ރައީސް ވިދާޅުވީ އަޚްލާޤީ އެންމެ ރިވެތި ސިފަތައް ލިބިގަތުމަކީ ސްކޫލަށް ހާޒިރުވުމުގެ އެންމެ މުހިންމު މަގުސަދު ކަމަށެވެ.
''ކިޔެވުމަކީ ދިރިއުޅެން ދަސްކުރުން. މުދައްރިސުން ތިޔަ ކުދިން ހާނުވައި ހޭލުންތެރިކުރުވަނީ ދިރިއުޅުމުގެ ޢަމަލީ މައިދާނާ ކުރިމަތިލުމަށް. ކަންކަމުގައި އިސްނެގުމާއެކު އަމިއްލައަށް ކަންކަން ކުރަން އާދަކުރި ކަމުގައިވިޔަސް ހުރިހާ ހާލަތެއްގައި ވެސް އެންމެ ބޮޑު އިސްކަމެއް ދޭންވާނީ ކިޔެވުމުގެ ކަންކަމަށް.''
ރައީސް ވިދާޅުވީ ދިރިއުޅެން ދަސްކުރުމަކީ އެ ކުއްޖެއްގެ ވަށައިގެންވާ މާހައުލުން ކުރިމަތިވާ ގޮންޖެހުންތަކާއި ހުރަސްތައް ގިރާކުރުމުގައި އެ ކުއްޖެއްގެ ފެންވަރުން މަސައްކަތް ކުރުމުގެ އާދަ ހަރުލެއްވުން ކަމަށެވެ. އެ ގޮތުން ރާއްޖެއާއި ދުނިޔޭގެ މިހާރުގެ ހާލަތަށް ބަލާއިރު ދަރިވަރުން ވެސް ޚާއްސަ ސަމާލުކަމެއް ދޭންޖެހޭ ވަރަށް މުހިންމު ދެ ދާއިރާއެއް އެބައޮތްކަމަށް ރައީސް ވިދާޅުވިއެވެ.
ރައީސް ވިދާޅުވީ ތިމާވެށި ހިމާޔަތް ކުރުމަކީ އެންމެ ޅަފަތުން ފެށިގެން ވެސް ކޮންމެ ކުއްޖެއްގެ ކިބައިގައި ހުރުން ލާޒިމުވާ ސިފައެއް ކަމަށެވެ.
''ޕްލާސްޓިކް ބޭނުންކުރުން ހުއްޓައިލުން، ކަރުދާސް އިސްރާފުކުރާ މިންވަރު މަދުކުރުން، މިއީ ތިޔަކުދިންގެ ފެންވަރުގައި ވެސް ކުރެވޭނެ ވަރަށް މުހިންމު ކަންކަން. މި ނޫނަސް ކިޔެވުމުގެ ކޮންމެ ކަމެއްވެސް ތިމާވެށްޓާ ރަހުމަތްތެރި އާދަތަކެއްގެ މަތީގައި ބައްޓަންކުރުން ވަރަށް މުހިންމު.'' ރައީސް ވިދާޅުވިއެވެ.
އޭގެ އިތުރުން އިގުތިސާދު ކުރުމަކީ އެންމެ ކުޑައިރުން ފެށިގެން ކޮންމެ ކުއްޖެއްގެ ކިބައިގައި ހަރުލައްވަންޖެހޭ ވަރަށް މުހިންމު އާދައެއްކަމަށް ރައީސް ވިދާޅުވިއެވެ. އެ ގޮތުން ބޭކާރު ޚަރަދުތައް ނުކުރުމާއެކު ކުރަންޖެހޭ l ކޮންމެ ކަމެއްވެސް އެންމެ ޚަރަދު ކުޑަގޮތަކަށް ކުރުމަކީ ސްކޫލް މާހައުލުން ދަރިވަރުންނަށް އުނގަންނައިދޭނެ އަދި ދިރިއުޅުމުގައި ނުހަނު ބޭނުންހިފޭނެ މުހިންމު ފިލާވަޅެއްކަމަށް ރައީސް ވިދާޅުވިއެވެ.
ރައީސް ދެއްކެވި ވާހަކަފުޅުގައި އިތުރަށް ވިދާޅުވީ ކޮންމެ ކަމެއްގައި ވެސް އެންމެ ރިވެތި ނަމޫނާއެއް ފެންނަން އޮތީ އިސްލާމީ އަދަބު އަޚްލާޤުގެ ތެރެއިން ކަމަށެވެ. އޭގެތެރޭގައި ދުވަސްވީ މީހުންނަށާއި އަވަށްޓެރީންނަށް އޯގާތެރިވުމާއި ބޮޑެތި މީހުންނަށް އިޙްތިރާމް ކުރުމުން އެމީހުންގެ ލޯތްބާއި އެހީތެރިކަން ދަރިވަރުންނަށް ލިބޭނެކަން ރައީސް ފާހަގަކުރެއްވިއެވެ.
''ތިޔަ ކުދިންގެ ސްކޫލަކީ، ތިޔަ ކުދިންގެ ދެވަނަ ޢާއިލާކަން އަބަދުވެސް ހަނދާނުގައި ބަހައްޓަންވާނެ.''
ރައީސް ވިދާޅުވީ މި ފެށޭ ދިރާސީ އަހަރު ދަރިވަރުން ޢަޒުމަކަށް ހަދަންވީ ކޮންމެ ދުވަހަކުވެސް، ސްކޫލްގެ އެހެން ކޮންމެ ވެސް ކުއްޖަކަށް ކިތަންމެ ކުޑަ ކަމެއްގައިވިޔަސް އެހީތެރިކަމެއް ފޯރުކޮށްދިނުމަށް ކަމަށެވެ. އޭރުން ސްކޫލަކީ ކޮންމެ ކުއްޖަކަށް ވެސް އުފާވެރިކަމާއި ހިނިތުންވުން ގެނެސްދޭ މާހައުލަކަށް ވެގެންދާނެ ކަމަށް ވެސް ރައީސް ވިދާޅުވިއެވެ.
Ads by STO
