މަތީ ދަރަޖަ ހޯދާ ފަރާތްތަކަށް ދެއްވާ ޚާއްސަ އިނާމަށް ނަން ހުށަހެޅުމުގެ ފުރުސަތު ހުޅުވާލައިފި
މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްސަ އިނާމަށް ނަން ހުށަހެޅުމުގެ ފުރުސަތު އިއްޔެ ހުޅުވާލައިފިއެވެ.
ރައީސް އޮފީހުން ބުނީ ފޯމު ހުށަހެޅުމުގެ ފުރުސަތު ހުޅުވާލައިފައިވަނީ އަންނަ ސެޕްޓެމްބަރު މަހުގެ 22 ވަނަ ދުވަހުގެ މެންދުރުފަހު 3:00 އާ ހަމައަށް ކަމަށެވެ. އަދި އިނާމަށް ނަން ހުށަހެޅުމަށް ހަމަޖެހިފައިވަނީ ހަމައެކަނި ރައީސް އޮފީހުގެ "ފޯމު ހުށަހެޅުން" ޕޯޓަލް މެދުވެރިކޮށް ކަމަށެވެ.
ޚާއްސަ އިނާމާބެހޭ ކޮމިޓީން އިއްޔެ ވަނީ އެ އިނާމާބެހޭ އުސޫލު ގެޒެޓްކޮށްފައެވެ.
މީގެކުރިން ޚާއްސަ އިނާމު ދެއްވަނީ ހަތަރު ގިންތިއަކުންނެވެ. ނަމަވެސް ރައީސުލްޖުމްހޫރިއްޔާގެ އެދިވަޑައިގަތުމުގެ މަތިން މި އަހަރު ވަނީ ގިންތިއެއް އިތުރު ކުރައްވައިފައެވެ. އެ ގިންތިން އިނާމު ދެއްވުމަށް ހަމަޖެހިފައިވަނީ ހަމައެކަނި މި އަހަރުގައެވެ.
އެ ގިންތި އިތުރުކުރެއްވީ މި އަހަރަކީ ފަތުރުވެރިކަން ފެށިތާ 50 އަހަރު ފުރުން ފާހަގަކުރާ ރަންޔޫބީލް އަހަރުކަމަށްވާތީ, ފަތުރުވެރިކަމުގެ ދާއިރާ ކުރިއަރުވައި ދަމަހައްޓައި, ދާއިރާއަށް އިންގިލާބީ ބަދަލުތަކެއް ގެނެސްދީގެން ފާހަގަކޮށްލެވޭ ކާމިޔާބީއެއް ހާސިލުކޮށްފައިވާ ފަރާތްތަކުގެ އަގުވަޒަންކުރުމުގެ ގޮތުންނެވެ.
