ރައީސް ޔާމީނަށް ހުކުމް ކުރި ގާޒީ ސުޕްރީމް ކޯޓަށް އައްޔަން ކުރުމުން އަދުރޭގެ ފާޑުކިޔުން!
ކްރިމިނަލް ކޯޓު ހިންގުމާއި ހަވާލުވެ ހުންނެވި ގާޟީ އަލީ ރަޝީދު ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރައްވަން ރައީސް އިބްރާހިމް މުހައްމަދު ސޯލިހް ނިންމެވުމުން އިދިކޮޅު ޕީއެންސީގެ ރައީސް .އަބްދުއްރަހީމް ޢަބުދުﷲ (އަދުރޭ) އެކަމަށް ވަރަށް ބޮޑަށް ފާޑު ވިދާޅުވެއްޖެއެވެ
މިކަމާ ގުޅިގެން އަދުރޭ މިއަދު ކުރެއްވި ޓްވީޓެއްގައި ވިދާޅުވީ ރައީސް ޔާމީނަށް ނުހައްޤު ހުކުމެއް ކުރުމުގެ އިނާމަކަށް ސުޕްރީމް ކޯޓުގެ ގޮނޑިއެއް އެ ހުކުމް ކުރި ފަނޑިޔާރު އަލީ ރަޝީދަށް ދިނުމަށް ރައީސް ސޯލިހް ނިންމެވުމުން ރައީސް ޔާމީންގެ ހުކުމަށް ރައީސް ސޯލިހު ނުފޫޒު ފޯރުވި މިންވަރު ހާމަވެ ޔަގީންވެގެންދާ ކަމަށެވެ.
އަދި އެނިންމުމުން ރައީސް ޔާމީނަށް ނުހައްޤުން ގަސްދުގައި އަނިޔާ ދެމުން ދަނީ ސީދާ ރައީސް ސޯލިހްކަން ޔަގީންވެގެންދާ ކަމަށް ވެސް އަދުރޭ ވިދާޅުވިއެވެ.
ކްރިމިނަލް ކޯޓުގެ ކުރީގެ އިސް ގާޟީ އަހުމަދު ހައިލަމް މަގާމުން ސަސްޕެންޑު ކުރުމަށްފަހު، އަލީ ރަޝީދު އާއި އެކޯޓު ހިންގުން ހަވާލު ކުރެއްވީ މިދިޔަ އަހަރުގެ ނޮވެމްބަރު މަހުގެ 5 ވަނަ ދުވަހުގައެވެ.
ކްރިމިނަލް ކޯޓަށް އަލީ ރަޝީދު ބަދަލު ކުރުމުގެ ކުރިން އޭނާ ވަނީ، ކުރީގެ ޖިނާއީ ކޯޓުގައި ގާޟީ ކަމުގެ އިތުރުން ސިވިލް ކޯޓުގެ އިސް ގާޟީކަން ވެސް އަދާ ކުރައްވާފައެވެ. އަދި އިސްގާޟީ ކަމުގައި ހުންނަވައި އަމިއްލަޔަށް އެދިގެން ޑްރަގް ކޯޓަށް ވެސް އޭނާ ބަދަލުވިއެވެ.
ސުޕްރީމު ކޯޓުގައި މިވަގުތު ދެ ފަނޑިޔާރެއްގެ ގޮނޑި ހުރީ ހުސްކޮށެވެ. އެކޯޓުގައި ޖުމްލަ ހަތް ފަނޑިޔާރުން ތިއްބަވަން ޖެހެއެވެ.
