ކޮވިޑް ފެތުރިފައިވާ ރަށްރަށަށް އިތުރަށް ސަމާލުކަން ދިނުމަށް ގޮވާލައިފި

ކޮވިޑް-19 ފެތުރިފައިވާ އަތޮޅުތެރޭގެ ރަށްރަށަށް އިތުރަށް ސަމާލުކަން ދީ އިތުރު ވަސީލަތްތައް ފަހި ކޮށްދިނުމަށް މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ގޮވާލައްވައިފިއެވެ.

އާދަމް ޝަރީފް މިއަދު ވިދާޅުވީ ނައިފަރު، ފެލިވަރު އަދި ހުރާ ފަދަ ކޮވިޑް-19 ފެތުރިފައިވާ ރަށްރަށަށް އިތުރަށް މީހުންނާއި ވަސީލަތްތައް ފޯރުކޮށްދޭން ޖެހޭ ކަމަށެވެ.

“ޓެސްޓުކުރުން ވަރަށް ސްލޯ. ނަތީޖާ ލިބުން މާ ސްލޯ. ނައިފަރު ފަދަ ތޮއްޖެހިފައި އޮންނަ ރަށްރަށުގައި ތަންފީޒު ކުރަން ވާނީ ކަސްޓަމައިޒް ގައިޑްލައިނެއް” އާދަމް ޝަރީފް ވިދާޅުވިއެވެ.

https://twitter.com/adamshareefz/status/1377986486939774976?s=21

ރާއްޖޭގައި ކޮވިޑަށް ފައްސިވެފައިވާ އަދަދުތައް އަންނަނީ ރިކޯޑު އަދަދަކަށް އިތުރުވަމުންނެވެ. އެ ގޮތުން އިއްޔެ ވެސް 300 މީހުން މި ބައްޔަށް ފައްސިވެފައި ވާއިރު، އޭގެތެރެއިން 206 މީހުންނަކީ މާލެއިން ބޭރުން ފައްސި ވެފައިވާ މީހުންނެވެ.

ކޮވިޑް-19 ފެތުރުން ކޮންޓްރޯލު ކުރުމަށް އެޗްޕީއޭއިން އަޅާފައިވާ ބައެއް ފިޔަވަޅުތައް މިހާރު ވަނީ އުވަލައިފައެވެ. އެގޮތުން އިރުއޮއްސި 6:00 އިން ފެށިގެން އަނެއް ދުވަހުގެ ހެނދުނު 6:00 އަށް މާލެ ސަރަޙައްދުގައި އެއްގަމު އުޅަނދު ދުއްވުން މަނާ ކުރި އެންގުން މިހާރު ބާތިލު ކޮށް، ރޭގަނޑު 11:00 އިން ފަތިހު 4:30 އަށް މާލެ ސަރަހައްދުގައި ބޭރުގައި އުޅުން މަނާކުރި ކާފިއު ވެސް އެޗްޕީއޭއިން މިހާރު ވަނީ އުވައިލައިފައެވެ. އަދި ޕާކުތަކާއި މައިޒާންތައް ވެސް ވަނީ އަލުން ހުޅުވައި، ސުކޫލުތަކާއި ޔުނިވާސިޓީތައް ހުޅުވުމުގެ ހުއްދަ ވެސް ވަނީ ދީފައެވެ.