ފްލައިޓް މިސްވި ދެމީހުން ،ޖޫރިމަނާ ދެއްކޭ ވަރަށް ފައިސާ ނެތުން މިފަހަރުވީ ނުރައްކަލުން ސަލާމަތްވި ސަބަބަކަށް

ދުބާއީން ފުރައިގެން، އިންޑިއާގެ ކެރެލާ ސްޓޭޓްގެ ކާލިކަޓުގެ އެއާޕޯޓަށް ދަތުރުކުރި އެއާ އިންޑިއާ އެކްސްޕްރެސްގެ ފްލައިޓެއް ރަންވޭ މަތިން ކަހާލައި، ނުރައްކާތެރި އެކްސިޑެންޓެއް ރޭގައި ވަނީ ހިނގާފައެވެ. 191 ފަސިންޖަރުންނާއެކު ދުބާއީ އިން ކެރެލާގެ ކޮޒިކޮޑް އެއާޕޯޓަށް ޖެއްސި ފުލައިޓުން ދަތުރުކުރި މީހުންގެ ތެރެއިން މިހާތަނަށް 18 މީހުން މަރުވެފައިވާއިރު، އޭގެ ތެރޭގައި އެ ބޯޓުގެ ދެ ޕައިލެޓުން ހިމެނެއެވެ.

Ads by Sosun Fihaara

ނަމަވެސް މި ހިތާމަވެރި ޙާދިޘާގެ ހިތާމަ ކުރަމުން ދިޔަ ނަމަވެސް ، އެ ނުރައްކަލުން އިންޑިއާގެ ދެ ރައްޔިތަކު ވަނީ ސަލާމަތް ވެފައެވެ. މި ފްލައިޓުން ދަތުރު ކުރަން ހަމަ ޖެހިފައިވީ ނަމަވެސް ދެމީހުންނަށް ފްލައިޓަށް އެރޭ ގޮތް ނުވީ ، ވިސާގެ މުއްދަތު ހަމަވެ ޖޫރިމަނާ ދައްކާފައި ނުވާތީއެވެ.

މީގެ ތެރެއިން އެކަކީ ޔޫއޭއީގެ ޝާރުޖާ ސިޓީގެ ސުކޫލެއްގައި އޮފީސް ބޯއީއަކަށް މަސައްކަތް ކުރާ މީހެއް ކަމަށްވާ ނައުފަލްއެވެ. ބޭރުގެ މީޑިއާއަށް އޭނާ ކިޔައިދީފައިވާ ގޮތުގައި އޭނާއަށް ފްލައިޓް މިސްވީ ޗެކިން ވެސް ނިންމި ފަހުން ކަމަށެވެ.

''ޗެކިން ނިންމާ އިމިގްރޭޝަން ކައުންޓަރަށް ދިޔުމުން، އިމިގްރޭޝަނުން ބުނީ އޯވާ ސްޓޭވެ 1000 ދިރުހަމް ޖޫރިމަނާ ވެފައިވާ ކަމަށް ، އަހަރެންގެ އަތުގައި އޮތީ 500 ދީނާރު ، އެހެންވެ އަހަރެން ސުކޫލުގެ ޕީއާރުއޯއަށް ގުޅިން ، އޭނާ ބުނީ އެނބުރި އައުމަށް" ފްލައިޓް މިސްވި ގޮތް ކިޔައިދެމުން އޭނާ ބުނެފައިވެއެވެ.

ނައުފަލް ބުނީ އާއިލާގާތަށް ދެވޭނެ ގޮތް ނުވުމުން މާޔޫސްވެ އާއިލާއަށް އެކަން އެންގިކަމަށެވެ. އަދި ފްލައިޓް ވެއްޓުނު ޚަބަރު ލިބުމާއެކު ސިހުން ލިބި ދެރަވި ނަމަވެސް ފްލައިޓުން ދަތުރުކުރެވޭނެ ގޮތް ނުވުމުން ތަސައްލީއެއް ލިބުނު ކަމަށެވެ.

ނައުފަލް ، ފްލައިޓް މިސްވީ ޗެކިންވެސް ކުރި ފަހުން

ނައުފަލްގެ އިތުރުން އެ ފްލައިޓުން ދަތުރު ކުރެވޭނެ ގޮތް ނުވެ ފްލައިޓް މިސްވި ، އަފްސަލް ކިޔާ އިންޑިއާ ރައްޔިތަކަށް ދިމާވީ ވެސް އޯވާ ސްޓޭވެ ޖޫރިމަނާ ދެއްކޭ ގޮތް ނުވުމެވެ. އަފްސަލް ވެސް 1000 ދީނާރު ޖޫރިމަނާވިއިރު އޭނާ އަތުގައި ވެސް އޮތީ 500 ދީނާރެވެ. އަދި ރައްޓެއްސަކަށް ގުޅައިގެން ފައިސާ ހިފައިގެން އޭނާ އައިއިރު ފްލައިޓުން އޭނާގެ ލަގެޖް ބާލާ ، ދަތުރަށް ތައްޔާރުވެ ފްލައިޓްގެ ދޮރު ލައްޕައިފިއެވެ.