މި އަހަރުގެ މިހާތަނަށް ހާހެއްހައި ސްކޭމް, 23 މިލިއަން ރުފިޔާގެ ގެއްލުން!
މި އަހަރުގެ މިހާތަނަށް ސްކޭމްގެ 998 މައްސަލައެއް ފުލުހުންނަށް ހުށަހަޅާފައިވާ ކަަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
ސީޕީ މިހެން ވިދާޅުވީ މިއަދު ފެށި މަލްޓި އެޖެންސީ ވޯކްޝޮޕް އޮން ކޮމްބެޓިން ސްކޭމް އިން ދަ މޯލްޑިވްސް ފެށުމުގެ ގޮތުން ދެއްކެވި ވާހަކައިގައެވެ.
ސްކޭމްގެ މައްސަލައަކީ މުޅި ދުނިޔޭގައި ވެސް މިހާރު ވަރަށް ބޮޑުވެފައިވާ މައްސަލައެއްކަން ފާހަގަކުރައްވައި ސީޕީ ވިދާޅުވީ ކޮވިޑުގެ ލޮކްޑައުން ދުވަސްވަރުން ފެށިގެން އެހެން ޤައުމުތަކާ އެއްފަދައިން ރާއްޖޭގައި ވެސް ސްކޭމްގެ މައްސަލަތައް އިތުރުވަމުން ގޮސްފައިވާ ކަމަށެވެ.
ސީޕީ ވިދާޅުވީ މި އަހަރުގެ މިހާތަނަށް ސްކޭމްގެ 998 މައްސަލައެއް ފުލުހުންނަށް ހުށަހަޅާފައިވާއިރު އެ މުއްދަތުގެ ތެރޭގައި ސްކޭމްތަކުން 23 މިލިއަނެއްހައި ރުފިޔާގެ ގެއްލުން އެކި ފަރާތްތަކަށްވެފައިވާ ކަމަށެވެ.
ސީޕީ އިތުރަށް ވިދާޅުވީ ސްކޭމް ކޯލާއި އެކި ގޮތްގޮތަަށް އޮޅުވާލައިގެން މީހުންގެ އަތުން ފައިސާ ނެގުމުގެ މައްސަލަތަކަށް ހައްލު ހޯދުމަކީ ފުލުހުން އިސްކަން ދެއްވާ ކަންކަމުގެ ތެރޭގައި މިހާރު ކަނޑައަޅުއްވާފައިވާ އެއް ކަންތައް ކަމުގައެވެ. އަދި މިފަދަ މައްސަލަތައް މަދުކުރުމަށް މުއައްސަސާތަކުން ގުޅިގެން ކުރަންޖެހޭ މަސައްކަތްތައް ގިނަ ކަމަށާއި މިއަދު ފެށި ވޯކްޝޮޕަކީ އެކަމަށް އެޅޭ ރަނގަޅު ފިޔަވަޅެއްކަން ވެސް އޭނާ ފާހަގަ ކުރެއްވިއެވެ.
Ads by STO
