ރައީސް ޔާމީން މިނިވަން ކުރަން، އަތޮޅުތެރޭގެ ސަޕޯޓަރުން މާލެ އައުމަށް ގޮވައިލައްވައިފި
އަތޮޅުތަކުގައި ދިރިއުޅޭ ރައީސް ޔާމީން އަބްދުލްޤައްޔޫމްގެ ސަޕޯޓަރުން ލަސްނުކޮށް މާލެ އައުމަށް ޕީއެންސީގެ ރައީސް އަބްދުއްރަޙީމް ގޮވައިލައްވައިފިއެވެ.
ވ.އާރަށް ކުއްޔަށް ދޫކުރުމުގެ މުޢާމަލާތާ ގުޅިގެން ރައީސް ޔާމީންގެ މައްޗަށް އުފުލި ދެ ދައުވާވެސް ސާބިތުވާ ކަމަށް މިއަދު ކްރިމިނަލް ކޯޓުން ވަނީ ކަނޑައަޅުއްވައިފައެވެ.
ނޫސްވެރިންނާ ވާހަކަ ދައްކަވަމުން އަބްދުއްރަޙީމް އެދިވަޑައިގަތީ އަތޮޅުތެރޭގައި ތިބި އިދިކޮޅުގެ ސަޕޯޓަރުން މާލެ އައުމަށެވެ. އޭނާ ވިދާޅުވީ ރައްޔިތުން މާޔޫސް ނުވުމަށް އެދޭ ކަމަށާއި، ރައީސް ޔާމީން މިނިވަން ކުރުމަށް ކުރެވެން ހުރި ހުރިހައި ކަމެއް އިދިކޮޅު ކޯލިޝަނުން ކުރާނެ ކަމަށެވެ. އަދި އަންނަ އަހަރު ޕީޕީއެމްގެ ފަރާތުން ވާދަކުރައްވާނެ ރިޔާސީ ކެންޑިޑޭޓަކީވެސް ރައީސް ޔާމީން ކަމަށް އަބްދުއްރަޙީމް ވިދާޅުވިއެވެ.
"މާލެ ވަޑައިގަންނަވާށޭ. ރައީސް ޔާމީން ސަލާމަތް ކުރަން އެބަ ޖެހެއޭ. ހެނދުނު ނުވަގަޑި ސުންމިނެޓަށް ތާވަލު ކުރި ޝަރީއަތް ލަސްވީ ކީއްވެގެންކަން އަޅުގަނޑުމެނަށް މި އެނގުނީ، ދެންމެގަ އިއްވި ޙުކުމުން." އަބްދުއްރަޙީމް ވިދާޅުވިއެވެ.
އަބްދުއްރަޙީމް އިތުރަށް ވިދާޅުވީ ރައީސް ޔާމީނަށް ޙުކުމް އިއްވެވީ އިންޑިއާއިން އެދުނު ގޮތަށް ކަމަށާއި، މިއީ ޚަރާމް ޙުކުމެއް ކަމަށެވެ. އަދި ޕީޕީއެމް-ޕީއެންސީން މި ޙުކުމް ބަލައިނުގަންނާނެ ކަމަށްވެސް ވިދާޅުވިއެވެ.
ރައީސް ޔާމީންގެ މައްޗަށް އިއްވާފައިވާ ދެ ދައުވާ ސާބިތުވުމުން މަދުވެގެން އަށް އަހަރުގެ ޖަލު ހުކުމެއް އަންނާނެއެވެ.
އެގޮތުން ރިޝްވަތު ހިފުމުގެ ދައުވާ ސާބިތުވުމުން މަދުވެގެން ތިން އަހަރުގެ ޖަލު ހުކުމެއް އަންނާނެއެވެ. އަދި މަނީ ލޯންޑްރައިންގެ ދައުވާ ސާބިތުވުމުން މަދުވެގެން ފަސް އަހަރު ދުވަހުގެ ޖަލު ހުކުމެއް އިއްވާނެއެވެ.
