ކޮވިޑާ ގުޅިގެން އަޅާ ފިޔަވަޅުތަކުގެ މައުލޫމާތު ޕާކިސްތާނުގެ ބޮޑުވަޒީރާއި ހިއްސާކޮށްފި
ރާއްޖެއިން ކޮވިޑް19 އާއި ދެކޮޅަށް އަޅަމުން ގެންދާ ފިޔަވަޅުތަކުގެ މައުލޫމާތު ރައީސް އިބްރާހީމް މުހައްމަދު ސޯލިހު ޕާކިސްތާނުގެ ބޮޑުވަޒީރު އިމްރާން ޚާންއާއި ހިއްސާ ކުރައްވައިފިއެވެ.
ރައީސުލްޖުމްހޫރިއްޔާ ކުރެއްވި ޓުވީޓެއްގައި ވިދާޅުވީ، މިއަދު ހަވީރު ޕާކިސްތާނުގެ ބޮޑުވަޒީރާއިއެކު ފޯނުން ކުރެއްވި މަޝްވަރާގައި ދެގައުމުގައި ވެސް މި ބަލިމަޑުކަމާއި ގުޅޭތުން އަޅުމުންގެންދާ ފިޔަވަޅުތަކާއި ގުޅޭގޮތުން އެންމެ ފަހުގެ މައުލޫމާތު ހިއްސާކުރައްވާފައިވާ ކަމަށެވެ.
ރާއްޖެ އާއި ޕާކިސްތާނާއި ދެމެދު އޮތް ގުޅުން ކުރިއަށްއޮތް ތަނުގައިވެސް އިތުރަށް ވަރުގަދަކުރުމާއި ގުޅޭގޮތުން ވެސް މަޝްވަރާ ކުރައްވާފައިވާ ކަމަށް ވެސް ރައީސްގެ ޓްވީޓުގައި ވަނީ ވިދާޅުވެފައެވެ.
ކޮވިޑް19 އަށް ރާއްޖެއިން ފައްސިވި މީހުންގެ އަދަދު ވަނީ 5،041 އަށް އަރާފައެވެ. މީގެތެރެއިން ފަރުވާ ދެމުން އަންނަނީ 2218 މީހުންނަށެވެ. އެގޮތުން 140 މީހަކަށް ފަރުވާ ދެމުން އަންނަނީ ހޮސްޕިޓަލުގައެވެ.
އަދި މި ބަލިން ރަނގަޅުވި މީހުންގެ ޖުމްލަ އަދަދު މިހާރު ވަނީ 2،804 އަށް އަރާފައެވެ. މި ބަލީގައި ރާއްޖެއިން ވަނީ 19 މީހަކު މިހާތަނަށް މަރުވެފައެވެ.
