ރައީސް ދެއްވީ ފޮޓޯއެއް ނެތް ކަމުގެ ޔަޤީންކަން، ރައީސް ނަޝީދުގެ މައްސަލަ ބައްލަވާނެތޯ ކުރެއްވި ސުވާލަށް ޖަވާބެއް ނުދެއްވި
ރައީސް އިބްރާހީމް މުޙައްމަދު ޞާލިޙް ބަދު އަޚްލާޤީ އަމަލެއް ހިންގަވާ ފޮޓޯއެއް އެއްވެސް މީހެއްގެ އަތުގައި ނުހުންނަވާނެ ކަމަށް އެމަނިކުފާނު ވިދާޅުވެއްޖެއެވެ.
ރައީސް ނަޝީދު ވަނީ މީގެ ދެތިން މަސް ކުރިން، ރައީސް ޞާލިޙް ޒިނޭ ކުރައްވާ ފޮޓޯތަކަކާއި، އެމަނިކުފާނު ކޮންޕްރޮމައިޒްވާ ފޮޓޯއެއް ހުންނަނާނެ ކަމަށް ވިދާޅުވެފައެވެ. އަދި ފަހުން ވަނީ އެމަނިކުފާނު ފޯނު މީހަކު ވަގަށް ނެގި ކަމަށް ވިދާޅުވެފައެވެ.
އެކަމާ ގުޅިގެން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ޞާލިޙް ވިދާޅުވީ އެއްވެސް މީހެއްގެ އަތުގައި އެމަނިކުފާނު ކޮންޕްރޮމައިޒްވާފަދަ ފޮޓޯއެއް ނުހުންނަވާނެ ކަމަށެވެ. ނަމަވެސް ރައީސް ނަޝީދު އެފަދަ ތުހުމަތެއް ކުރެއްވުމުން އެ މައްސަލަ ބައްލަވާނެތޯ ކުރެއްވި ސުވާލަށް ޖަވާބު ދެއްވުމަށް ދެކޮޅު ހެއްދެވިއެވެ.
ރައީސް ޞާލިޙް ވިދާޅުވީ ރިޔާސީ އިންތިހާބު އެމްޑީޕީއަށް ކާމިޔާބު ކުރެވޭނެކަމުގެ ފުރުސަތު އެންމެ ބޮޑީ އެމަނިކުފާނު ކުރިމަތިލައިގެން ކަމަށެވެ.
“ އަޅުގަނޑަށް އިރާދަކުރެއްވިއްޔާ އެ ޔަގީންކަން އެބަ އޮތް، މިކަމުގައި ސިޔާސީ ހިޔާލު އަޅުގަނޑުމެންނާ އެއްގޮތް ނޫން މީހުންނާ އެކީގައިވެސް ކޯލިޝަނެއް ހަދައިގެން ގޮސް ރިޔާސީ އިންތިހާބު ކާމިޔާބު ކުރެވޭނެކަމުގެ” ރައީސް ޞާލިޙް ވިދާޅުވިއެވެ.
