ވިހިތޭވީސް: ބޮލީވުޑަށް ބޮޑު އަހަރެއް
2022 ވަނަ އަހަރު ވެގެން ދިޔައީ ދެކުނު އިންޑިއާގެ އުފެއްދުންތަކުން މުޅި އިންޑިއަން ސިނަމާ އެކުއެކީހެން ހިސޯރުކޮށްލި އަހަރަކަށެވެ. "ކޭޖީއެފް 2"، "އާރުއާރުއާރު"، "ވިކްރަމް"، "777 ޗާލީ" އަދި "ކަންޓާރާ" ފަދަ ފިލްމުތައް ވެެގެން ދިޔައީ މުޅިން އިންޑިއާގައި އަޑުގަދަކޮށްލި ފިލްމުތަކަކަށެވެ. އެއާ ހިލާފަށް ބޮލީވުޑް ފިލްމުތައް މިދިޔަ އަހަރު ވީ ފެއިލް އެވެ. "ބޫލް ބުލައްޔާ 2" އާއި "ބްރައްމާސްތުރަ" ފަދަ މަދު ފިލްމެއް ނޫނީ ބޮލީވުޑްގައި މިދިޔަ އަހަރު ނުހިނގި އެވެ.
މިފެށި 2023 ވަނަ އަހަރަކީ ބޮލީވުޑަށް މުހިންމު އަދި ބޮޑު އަހަރެކެވެ. އެއީ މިއީ އިންޑިއަން ސިނަމާގެ ކުރިމަގާއިމެދު ގޮތެއް ނިންމާނެ އަހަރަށް ވެދާނެތީ އެވެ. ސައުތު އިންޑިއާއިން ދަނީ އެކި ބަހުރުވަތަކުން ފިލްމު އުފައްދައި މުޅި އިންޑިއާއަށް އެ އިންޑަސްޓްރީ ފުޅާކުރަން މަސައްކަތް ކުރަމުންނެވެ. ބޮލީވުޑް ފިލްމުތައްވެސް މިހާރު ނެރެނީ އެކި ބަހުރުވައިން ޑަބް ކޮށްގެންނެވެ.
މި އަހަރުގެ އެންމެ ބޮޑު އެންމެ ފުރަތަމަ ފިލްމަކަށް ވާނީ މިމަހުގެ 13 ވަނަ ދުވަހު ރިލީޒް ކުރާ "ކުއްތޭ" އެވެ. އަރުޖުން ކަޕޫރާއި، ތާބޫ އަދި ރާދިކާ މަދަން ފަދަ އެކްޓަރުން ފެންނަ މި ފިލްމަކީ މިހާތަނަށް އައިއިރު ޝައުގުވެރިކަން ދަމައިގަނެފައިވާ ފިލްމެކެވެ. އެހެންކަމުން ސިނަމާތަކުގައި މިފިލްމު ރަނގަޅު ކާމިޔާބެއް ހޯދާނެކަމަށް ބެލެވެ އެވެ.
ދެވަނަ ފިލްމަކީ މިމަހު 25 ގައި ރިލީޒްކުރާ "ޕަތާން" އެވެ. މިއީ މިއަހަރުގެވެސް އެންމެ އުއްމީދީ އެއް ފިލްމެވެ. ގާތްގަނޑަކަށް ހަތަރު އަހަރަށްފަހު ޝާހުރުކް ހާން ކަމް ބެކެއް ހަދަނީ އެވެ. އަނެއްކޮޅުން ކާމިޔާބު ޖޯޑު ޝާހުއާއި ދިޕިކާ ޕަދުކޯން އަހަރު ތަކަކަށްފަހު އެކީގައި ސްކްރީނުން ފެންނާނީވެސް މިފިލްމުންނެވެ. މިއީ މިއަހަރުގެ އެންމެ ކާމިޔާބު ފިލްމަށް ވާނެކަމަށް އޮތީ ބެލެވިފަ އެވެ.
ކާރްތިކް އާރްޔާން އަދި ކްރިތީ ސެނަން އެކީގައި ފެންނާނެ "ޝެހެޒާދާ" އަކީވެސް އުއްމީދީ ފިލްމެކެވެ. "ބޫލް ބުލައްޔާ 2" އަށްފަހު ކާރްތިކް ވަނީ ރޭންކިންގެ މައްޗަށް ޖެހިލައިފަ އެވެ. އަނެއްކޮޅުން "މިމީ" އިން އެންމެ މޮޅު ބަތަލާގެ އެވޯޑު ގެންގޮސް ކްރިތީވެސް ވަނީ ޑިމާންޑު މަތިކޮށްފަ އެވެ. މިފިލްމުވެސް ވިޔަފާރީގެ ގޮތުން ރަނގަޅުވާނެކަމަށް ބެލެވެ އެވެ.
ލަވް ރާންޖަންގެ "ތޫ ޖޫޓީ މޭ މައްކާރް" އަކީވެސް މިއަހަރުގެ އުއްމީދީ ފިލްމެކެވެ. މާޗު 8 ގައި އަޅުވަން ތައްޔާރުވާ މިފިލްމުގައި ފެންނާނީ ރަންބީރް ކަޕޫރާއި ޝްރައްދާ ކަޕޫރެވެ. މިއީ ރަންބީރުގެ ފަހު ރޮމްކޮމް ފިލްމެވެ. އަނެއްކޮޅުން ރަންބީރު ޝްރައްދާއާއިއެކު ފެންނާނެ މިއީ ފުރަތަމަ ފަހެރެވެ.
"ކިސީ ކާ ބާއީ، ކިސީ ކީ ޖާން" އަކީވެސް މިއަހަރުގެ ބޮޑު ފިލްމެކެވެ. ސަލްމާން ހާން ލީޑް ރޯލުން ފެންނަ މި ފިލްމުގައި ބަތަލާގެ ގޮތުގައި ފެންނާނީ ޕޫޖާ ހޭގްޑޭ އެވެ. މީގެ އިތުރުން ޝެހެނާޒް ގިލް އާއި ޕަލަކް ތިވާރީ މުޅިން އަލަށް ބޮލީވުޑަށް ނިކުންނާނީ މިފިލްމުންނެވެ.
"ރޮކީ އޯރް ރާނީ ކީ ޕްރޭމް ކަހާނީ" އަކީވެސް އަހަރުގެ ބޮޑު ފިލްމެކެވެ. ދުވަސްތަކަކަށްފަހު މަޝްހޫރު ޕްރޮޑިއުސަރު ކަރަން ޖޯހަރު ފިލްމެއް ޑައިރެކްޓުކޮށް ސިނަމާގައި އަޅުވާނީ މިއަހަރެވެ. ސީދާ ތާރީހެއް އިއުލާން ކޮށްފައި ނުވަނީ ބެލެވޭ ގޮތުގައި އާލިއާ ވިހައި ގަދަވަންދެނެވެ. އާލިއާ ބަޓްގެ އިތުރުން ރަންވީރް ސިންގް ލީޑްރޯލުން ފެނިގެންދާ މި ފިލްމުގައި ވެޓެރަން ގިނަ އެކްޓަރުންތަކެއްވެސް މުހިންމު ރޯލުތަކުން ފެންނާނެ އެވެ. އޭގެ ތެރޭގައި ޖަޔާ ބައްޗަން، ދަރްމޭންދްރަ އަދި ޝަބާނާ އާޒްމީ ހިމެނެ އެވެ. މިއީ މިއަހަރުގެ އެންމެ ބޮޑު އެއް ފިލްމަށް ވެގެންދާނެ އެވެ.
މީގެ އިތުރުންވެސް ޝާހުރުކް ހާންގެ "ޖަވާން"އާއި "ދުންކީ"، ސަލްމާންގެ "ޓައިގާ 3"، ވިކީ ކައުޝާލްގެ "ސާމް ބަހާދުރް"ގެ އިތުރުން އަކްޝޭ ކުމާރުގެ "ބަޅޭ މިޔާ ޗޯޓޭ މިޔާ" ފަދަ ފިލްމުތައް މިއަހަރު ބޮލީވުޑް ފަޅު ފިލުވައިލަދޭނެ އެވެ. ހަމައެއާއެކު ސައުތުގެ ގިނަ ފިލްމުތަކެއްވެސް މިއަހަރަށް އޮތީ ތާވަލުކޮށްފަ އެވެ. އެހެންކަމުން މިފެށުނު 2023 ވަނަ އަހަރަކީ ބޮލީވުޑަށް ވަރަށް ޗެލެންޖިންގް އަހަރަކަށް ވާނެ އެވެ.
