އަސްލު އެމްޑީޕީއާ، ފިކުރު ދިރުވާ ވާހަކައަށް، އަސްލަމްގެ ހޫނު ރައްދުތަކެއް
އެމްޑީޕީގެ ރިޔާސީ ޕްރައިމަރީގައި ވާދަކުރައްވާ އެ ޕާޓީގެ ރައީސް މުޙައްމަދު ނަޝީދު "ފިކުރެއްގެ ދިރުން" މި ނަމުގައި ކުރިއަށް ގެންދަވާ ކެމްޕެއިނަށް، ރައްޔިތުންގެ މަޖިލީހުގެ ހިތަދޫ އުތުރު ދާާއިރާގެ މެމްބަރު ވަރަށް ބޮޑަށް ފާޑުވިދާޅުވެ، އެ ފިކުރަކީ "ސިއްރު" ފިކުރެއްތޯ ސުވާލު ކުރައްވައިފިއެވެ.
ރައީސް ނަޝީދު ވިދާޅުވަނީ، އެމްޑީީޕީގެ ރިޔާސީ ޕްރައިމަރީގައި އެމަނިކުފާނާ ވާދަކުރައްވާ، ރައީސް އިބްރާހީމް މުޙައްމަދު ޞާލިޙުގެ ވެރިކަމާއެކުގައި، އެމްޑީޕީގެ އަސްލު ފިކުރު ގެއްލެމުން އަންނަ ކަމަށެވެ. އެގޮތުން އެމަނިކުފާނު އެންމެ ބޮޑަށް ފާހަގަކުރައްވަނީ ކޮރަޕްޝަންގެ މައްސަލަތައް ބެލުމަށް ސަރުކާރުން ފަހަތު ފަޔަށް ބުރަވާ މައްސަލައެވެ.
"އިބޫ 2023- އެމްޑީޕީ ކުރިއަށް" ކެމްޕެއިންގެ ތެރެއިން، ރޭ ނ.ވެލިދޫގައި ވާހަކަ ދައްކަވަމުން، މަޖިލީހުގެ މެޖޯރިޓީ ލީޑަރު ވަނީ ރައީސް ނަޝީދުގެ ވާހަކަތަކަށް ހޫނު ރައްދެއް ދެއްވައި، ވެރިކަމުގައި ހުންނެވީ ރައީސް ޞާލިޙު ކަަމަށް ވުމުން، މިއީ އެމްޑީޕީގެ ފިކުރުގެ ވެރިކަމަކަށް ނުވަނީ ކީއްވެގެންތޯ އައްސަވައިފައެވެ. އަސްލަމްގެ ވާހަކައިގައި ރައީސް ނަޝީދުގެ ނަން ވިދާޅުނުވިޔަސް، އޭނާގެ ބަހުގެ ހަމަލާތައް އަމާޒު ކުރެއްވީ، ރައީސް ނަޝީދަށްކަން ސާފެވެ.
"އަޅުގަނޑަށް ހަމަ މުޅިން އޮޅިއްޖެ، އެމްޑީޕީގެ ފިކުރަކީ ކޮބައިތޯ؟ ތިޔަ ވިދާޅުވާ ފިކުރަކީ ކޮބައިތޯ؟ އަޅުގަނޑުމެންނަށް ފޮރުވައިގެން، އަޅުގަނޑުމެންނަށް ނާންގާ، އެހެން ފިކުރެއް ގެންގުޅުއްވަނީތޯ؟"
އަސްލަމް ވަނީ އޭނާ ދަންނަ އެމްޑީޕީގެ ފިކުރަކީ، އެ ޕާޓީގެ އަސާސީ ޤަވައިދުގައި ލިޔެ، ބަޔާންކޮށްފައިވާ އަސާސްތައް ކަމަށެވެ. އޭނާ ވިދާޅުވީ އެމްޑީޕީން ޤަބޫލު ކުރާ އުސޫލުތަކާ ހަމަތައް، އެ ޕާޓީގެ ވެބްސައިޓު ބަލައިލި ކޮންމެ މީހަކަށްވެސް ފެންނާން އޮންނާނެ ކަމަށެވެ.
"މިއިން ކޮން ކަމަކަށްތޯ، ކޮން އަސާސަކަށްތޯ، ކޮން ފިކުރަކާތޯ މި ސަރުކާރުން ޚިލާފުވީ؟ އެއީ އުފެދޭ ސުވާލަކީ."
އަސްލަމް ވެސް ވަނީ ރައީސް ޞާލިޙުގެ ފެކްޝަނުގެ މެމްބަރުން ތަކުރާރު ކުރައްވާ އެއް ވާހަކައެއް ހަނދުމަކޮށް އަރުވައިފައެވެ. އެއީ އެމްޑީޕީގެ ފިކުރަކީ، ވަކި މީހެއްގެ ފިކުރަކަށް ނުވުމެވެ. އޭނާ ވިދާޅުވާ ގޮތުގައި، އެމްޑީޕީގެ ފިކުރު، އެ ޕާޓީން ފާސްކުރާ ޤަރާރުތަކުންނާއި، އަސާސީ ޤަވާއިދުންވެސް ފެންނާން އޮންނާނެއެވެ.
އަސްލު އެމްޑީީޕީ، އެ ޕާޓީގެ މެމްބަރުންނަށް އަލުން ހޯދައިދޭނެކަމަށް ރައީސް ނަޝީދުގެ ފެކްޝަނުން ވިދާޅުވަމުން އަންނަ ވާހަކައަށް ރައްދު ދެއްވައި އަސްލަމް ވިދާޅުވީ ރައީސް ޞާލިޙަކީ އެމްޑީޕީގެ މީހަކަށް ނުވާނަމަ، އެހެން އެއްވެސް މީހަކު އެ ޕާޓީގެ މެމްބަރަކަށް ނުވާނެ ކަމަށެވެ. އެމަނިކުފާނަކީ މުޅި ރާއްޖެއަށްވެސް ލިބުނު "ރަނެއް" ކަމަށާއި، އެމްޑީޕީއަށް ގެއްލުމެއް ލިބިދާނެ އެއްވެސް ކަމެއް އެމަނިކުފާނު ނުކުރައްވަވާނެ ކަމަށްވެސް އޭނާ ވިދާޅުވިއެވެ.
އެމްޑީޕީގެ ރިޔާސީ ޕްރައިމަރީ އޮންނާނީ މި މަަހުގެ 28 ވަނަ ދުވަހުއެވެ. މި ފަހަރުގެ ޕްރައިމަރީ އަކީ އެމްޑީޕީގެ ތާރީޚުގައި ބާއްވާ އެންމެ ފޯރިގަދަ ޕްރައިމަރީއަށް ވާނެ ކަމަށް ބެލެވެއެވެ.
