އިމްރާންގެ ސިޓީން ހިޔާލުފާޅު ކުރުމުގެ މިނިވަންކަން ތަންމިނަށް ހަނި ކުރޭ، އިޙްތިރާމް ކުރެވޭކަށް ނެތް: ނިމާލް
ހަރާމް ޙުކުމެއް ކޮށްފިނަމަ، އެ ވާހަކަ ދައްކާނެ ކަމަށާއި، ހޯމް މިނިސްޓަރ އިމްރާން، ކައުންސިލްތަކަށް ޙިޔާލުފާޅު ކުރުމުގެ މިނިވަންކަން ހަނިވާ ގޮތަށް ފޮނުއްވި ސިޓީއަށް އިޙްތިރާމެއް ނެތް ކަމަށް މާލެ އަތޮޅު ކައުންސިލުގެ ރައީސް، އަދި ލޯކަލް ގަވަމަންޓް އޮތޯރިޓީ(އެލްޖީއޭ)ގެ ބޯޑު މެމްބަރު މުޙައްމަދު ނިމާލް ވިދާޅުވެއްޖެއެވެ.
ޕީއެންސީގެ ނައިބު ރައީސް ނިމާލް މިފަދައިން ވިދާޅުވެފައިވަނީ، ކުރީގެ ރައީސް ޔާމީން އަބްދުލްޤައްޔޫމް މިނިވަންކުރުމަށް ގޮވާލައި ބައެއް ލޯކަލް ކައުންސިލްތަކުން ބަޔާން ނެރުއްވަމުންދާތީ، އެގޮތަށް ޢަމަލުނުކުރުމަށް އަންގަވައި، އެލްޖީއޭގެ ރައީސް އަދި ހޯމް މިނިސްޓަރު އިމްރާން، ކައުންސިލްތަކަށް ފޮނުއްވި ސިޓީއެއް މައްސަލަ ހޫނުވެފައިވާ ދަނޑިވަޅެއްގައެވެ.
ނިމާލް ފޭސްބުކްގައި ކުރެއްވި ޕޯސްޓެއްގައި ވިދާޅުވީ ހަރާމް ޙުކުމެއް ކުރުމުން އެ ޙުކުމެއްގެ ވާހަކަ ދައްކާނެ ކަަމަށާއި، އަދި ރަނގަޅު ކަމެއް ކުރުމުން އެ ވާހަކަވެސް ދައްކާނެ ކަމަށެވެ.
ކައުންސިލްތަކަށް އިމްރާން ފޮނުއްވި ސިޓީގައި ވިދާޅުވެފައިވަނީ ޝަރުޢީ ކޯޓުތަކުން ނިންމާ ނިންމުންތަކާއި ކޯޓުތަކުން ކުރާ ޝަރުއީ ހުކުމްތަކަކީ ލޯކަލް ކައުންސިލުތަކުން އެއަށް ބޯލަނބާ ކިޔަމަންގަތުން ލާޒިމު ނިންމުންތަކެއް ކަމަށެވެ. އަދި މިފަދަ ޙުކުމްތަކާއި ދެކޮޅު ހަދައި ބަޔާން ނެރުމަކީ ކައުންސިލްތަކަށް ލިބިދީފައިވާ ބާރެއް ނޫން ކަންވެސް ސިޓީގައިވެއެވެ.
އަދި ކައުންސިލުތަކުގެ ނިންމުންތަކާއި ޤަރާރުތައް ވާންވާނީ ކައުންސިލަށް މަތިކޮށްފައިވާ ޚިދުމަތްތަކާއި ގުޅިގެން ކައުންސިލުގެ ރަސްމީ ބައްދަލުވުމަކުން ފާސްކުރެވިގެން ނެރޭ އެއްޗިއްސަށް ކަމުގައި ވެސް މި ސިޓީގައިވެއެވެ.
މި ސިޓީއާ ގުޅިގެން، އެލްޖީއޭގެ ބޯޑުގެ މެމްބަރު، ކަންބޮޑުވުންފާޅު ކުރައްވައި ވިދާޅުވީ، ޤާނޫނު އަސާސީން ލިބިދީފައިވާ ޙިޔާލުފާޅު ކުުރުމުގެ މިނިވަންކަމަކީ އޮންނަ ހައްޤެއް ކަމަށެވެ. އޭނާ ވިދާޅުވީ ކައުންސިލުތަކަށް މެމްބަރުން އިންތިޚާބުވެފައި ތިބެނީ ދާއިރާއެއް ނުވަތަ ރަށެއްގެ ރައްޔިތުންގެ ސިޔާސީ ފިކުރަށް އަޣްލަބިއްޔަތު ލިބިގެން ކަމަށާއި، ބިރު ދައްކައި، އޮބަހައްޓައިގެން، ސިޓީ ފޮނުވައިގެން، ކަންކަން ހުއްޓުވަން އުޅުމަކީ ހުދުމުހްތާރު ސިފައެއް ކަމަށެވެ. އިދިކޮޅު ލީޑަރު، ރައީސް ޔާމީންގެ މައްޗަށް ކުރެވުނީ އިންސާފުވެރި ޙުކުމެއް ނޫންކަން، އެންމެންނަށްވެސް އެނގޭ ކަމަށްވެސް އޭނާ ވިދާޅުވިއެވެ.
"އެއީ ހަރާން، ބާތިލު ޙުކުމަކަށް ވާނެ، އަބަދު އަޅުގަނޑުމެން އެންމެން ބަގުޑި ބެއްދިޔަސް، މަޤާމުތަކުގަ ނުތިބެވޭނެކަން މާޒީގަ ވަނީ ފެނިފަ. އެ ދުވަސް ވެސް، މިހާރު ތިބި މީހުންނަށް އަންނާނެ. ﷲއަށް ބިރުވެރިވުން އޮތީ، ތި ސިޓީ ނެރުނަސް، ތި ސިޓީއަކަށް އަޅުގަނޑުގެ އިޙްތިރާމެއް ނެތީ، ޙިޔާލުފާޅު ކުރުމުގެ މިނިވަންކަން ތަންމިނަށް ހަނި ކުރެވޭތީ."
ނިމާލު ވަނީ ރައްޔިތުން އިންތިޚާބު ކޮށްފައި ތިބި ބަޔަކަށް އެލްޖީއޭއިން ހަރުކަށި އަދަބު ދީގެން، ކަންކަން ކުރުމުގެ ވިސްނުން ނުގެންގުޅުއްވުމަށް އެދިވަޑައިގެންފައެވެ.
"އެއީ ދާއިރާތަކުގެ ސިޔާސީ ވިސްނުން. އިންތިޚާބުތަކުގައި އެ ރައްޔިތުން ނިންމާނެ އަދަބު ދޭންވީމަ. އެއީ ވޯޓު ކަރުދާހުން. އެލްޖީއޭ ބޯޑުގަ، މީގެ ވާހަކަވެސް އަހައިނުލައި، އެލްޖީއޭގެ ރައީސްއަށް، މިވަރުގެ ލެޓާއެއް ސާކިއުލޭޓް ކުރެވޭނެ ކަމަކަށް ޤަބޫލެއް ނުކުރަން. އަޅުގަނޑުމެންގެ ސީއީއޯގެ ބާރު ކަނޑުވާލެވެނީ މި ސިޓީ މިގޮތަށް ނުކުތުމުން. ހަމަ ގައިމުވެސް، އަޅުގަނޑަކަށް ނޭނގޭ ތިވަރުގެ ނިންމުމެއް ނިންމި ކަަމެއް."
ނިމާލު ވިދާޅުވީ، އެލްޖީއޭގެ ސިޓީއަކީ އެތަނުގެ ބޯޑުން ނިންމެވި ނިންމެވުމެއްގެ ގޮތުގައި މާނަ ކުރެވޭ ކަަމަށާއި، ރައްޔިތުން މާނަ ކުރާނީވެސް އެގޮތަށް ކަމަށެވެ.
އޭނާ އިތުރަށް ވިދާޅުވީ، އޭނާ އަކީ މާލެ އަތޮޅުގެ ނުވަ ރަށުގެ ރައްޔިތުންގެ އަޣްލަބިއްޔަތުން އިންތިޚާބުކޮށްފައި ހުންނެވި އަތޮޅު ކައުންސިލުގެ ރައީސް ކަމަށާއި، އަތޮޅު ކައުންސިލުގެ ފަރާތުން، ރައީސް ޔާމީނަށް އިއްވި ޙުކުމާ ގުޅޭގޮތުން އިއްވެވީ، ދާއިރާގެ ރައްޔިތުންގެ ބަސް ކަމަށެވެ.
މިނިސްޓަރު އިމްރާން ފޮނުއްވި ސިޓީގެ މައްސަލަ އެލްޖީއޭގެ ބޯޑު މެންބަރުން ތިއްބަވާ ވައިބާ ގުރޫޕްގައި ފެންމަތިކުރުމުން އެކަމާ ހިތްހަމަޖެހިވަޑައިނުގެން މިނިސްޓަރު އިމްރާން ވަނީ ވައިބާ ގުރޫޕުން ނިކުމެވަޑައިގެންފައެވެ.
