ހަތަރު އެއަރޕޯޓެއް އަޅަން ފައިސާ ހޯދިއްޖެ: ރައީސް ޞާލިޙް
ސަރުކާރުން އަޅަން ނިންމާފައިވާ ހަތަރު އެއަރޕޯޓެއް އެޅުމަށް ބޭނުންވާ ފައިސާ ހޯދިފައިވާ ކަމަށް ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ، ހދ. ހަނިމާދޫ ބައިނަލްއަޤްވާމީ ވައިގެ ބަނދަރު ތަރައްގީކުރުމުގެ އަމަލީ މަސައްކަތް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
"ހޯރަފުށީ އެއަރޕޯޓް ނިންމާ ބޭނުން ކުރަަން ފެށިއްޖެ، ފަރެސްމާތޮޑާ އެއަރޕޯޓް ވެސް އަޅާ ނިމިއްޖެ، މާފަރު ބައިނަލްއަޤްވާމީ އެއަރޕޯޓްގެ އެކްސްޕެންޝަންގެ މަސައްކަތް މޮބިލައިޒް ކުރެއްވިއްޖެ" މި ސަރުކާރުން ނިންމާފައިވާ އެއަރޕޯޓް ޕްރޮޖެކްޓައް ވިދާޅުވަމުން ރައީސް ޞާލިޙް ވިދާޅުވިއެވެ.
ރައީސް ޞާލިޙް އިތުރަށް ވިދާޅުވީ، ހދ. މަކުނުދޫ އާއި ށ. ބިލެތްފަހީގެ އިތުރުން ބ. ތުޅާދޫ އަދި ތ. ވިލުފުށީގައި އެއާޕޯޓް އަޅާނެ ފައިސާ ހޯދިފައިވާ ކަމަށެވެ. އަދި މިހާރު އޮތީ މަސައްކަތް ކުރާނެ ބަޔަކު ހޯދައި، މަސައްކަތް ފެށުން ކަމަށް ވިދާޅުވިއެވެ.
ރައީސް ޞާލީހް އިތުރަށް ވިދާޅުވީ، ރ. އަތޮޅުގެ ދެކުނު ބިތުގައި އެއާޕޯޓެއް އެޅުމަށް ނިންމާފައިވާ ކަމަށާއި، ރ. އަތޮޅު ނިމުމުން ޑޮމެސްޓިކް އެއާޕޯޓްތަކުން މުޅި ރާއްޖެ ގުޅާލާއި ނިމޭނެ ކަމަށެވެ.
"ރ އަތޮޅު ނިމުމުން، މުޅި ރާއްޖޭގެ ހުރިހާ އަތޮޅެއް ވައިގެ މަގުން ގުޅާލާ ނިމޭނެ" ރައީސް ޞާލިޙް ވިދާޅުވިއެވެ.
ފައިސާ ހޯދިފައިވާ އެއަރޕޯޓްތަކަކީ ކްރޮސް ސަބްސިޑީ އުސޫލުން ހޯދައިފައިވާ ފައިސާއެވެެ. އެއީ، އެ މަޝްރޫއަށް ފައިނޭންސް ކުރާ ބަޔަކަށް ފަތުރުވެރިކަމުގެ ބޭނުމަށް ރަށެއް، ބިމެއް ނުވަތަ ފަޅެއް ކުއްޔަށް ދިނުމެވެ.
Ads by STO
