ނޭޕާލްގެ ފްލައިޓެއް ވެއްޓުން: 16 އަހަރު ކުރިން، ފިރިމީހާވެސް މަރުވީ ފްލައިޓެއް ވެއްޓިގެން
މިދިޔަ އާދީއްތަ ދުވަހު، އެތެރޭގެ އުދުހުމެއްގެ ތެރެއިން، ނޭޕާލްގައި ފްލައިޓެއް ވެއްޓި، އެތައް ބަޔަކު މަރުވެގެން ދިޔައިރު، އެ ފްލައިޓް ދުއްވަން އިން ކޯ-ޕައިލެޓްގެ ފިރިމީހާ، މީގެ 16 އަހަރު ކުރިން، ފްލައިޓެއް ވެއްޓުމުގެ ހާދިސާއެއްގައި މަރުވެފައިވާކަން ހާމަވެއްޖެއެވެ.
ވެއްޓުނު ޔެޓީ އެއާލައިންސްގެ ފްލައިޓް 691ގެ ކޯ-ޕައިލެޓް، އަޖޫ ކަޓިވަޑާ އާދިއްތަ ދުވަހު ހިނގި ފްލައިޓް ވެއްޓުމުގެ ހާދިސާގައި މަރުވިއިރު، މިއީ ނޭޕާލްގައި، މި ފާއިތުވި 30 އަހަރު ދުވަހުގެ ތެރޭގައި ހިނގައިިދިޔަ، މިފަދަ އެންމެ ހިތާމަވެރި ހާދިޘާއެވެ.
އަޖޫގެ ފިރިމީހާ ދީޕަކް ޕޯކްރޭލްވެސް މަރުވީ، ޔެޓީ އެއާލައިންސްގެ ފްލައިޓެއްގެ ކޯ-ޕައިލެޓެއްގެ ގޮތުގައި، ފްލައިޓެއް ދުއްވަމުން ދަނިކޮށެވެ. އޭވިއޭޝަންގެ ދާއިރާއަށް ނުކުންނަން އޭނާއަށް ހިތްވަރު ދިނީވެސް، ފިރިމީހާއެވެ. 16 އަހަރު ކުރިން އަޖޫގެ ފިރިމީހާ ގެއްލުނުއިރު، އެ ދެމީހުންގެ ދަރިއެއްވެސް ދުނިޔޭގައި އެބަ ހުއްޓެވެ.
"އަޖޫ އަކީ ހުވަފެންތައް ހަޤީޤަތަކަށް ހަދަން ގަދަ އަޅައި މަސައްކަތް ކުރި މީހެއް. އޭނާ ވަނީ، އޭނާގެ ފިރިމީހާގެ އުއްމީދުތަކުގައި ކުލަ ޖައްސައިދީފައި." އަޖޫގެ ޢާއިލާ މެމްބަރަކު މީޑިއާއަށް ބުންޏެވެ.
ނޭޕާލްގެ ވެއްޓުނު ފްލައިޓް--
އަޖޫގެ ފިރިމީހާ މަރުވެފައިވަނީ 2006 ވަނަ އަހަރުގެ ޖޫން މަހުގައި، ހަނޑުލާއި ކާބޯތަކެތީގެ ބައެއް ސާމާނު ހިފައިގެން، ހުޅަނގުގައި އޮންނަ ޖުމްލާ އަވަށަށް ދަތުރު ކުރި ފްލައިޓެއް ވެއްޓުމުގެ ހާދިސާގައެވެ. އެ ހާދިސާގައި އަޖޫގެ ފިރިމީހާގެ އިތުރުން ނުވަ މީހަކު މަރުވިއެވެ.
އަޖޫ ދަތުރު ކުރި ޔެޓީ އެއާލައިންގެ ފްލައިޓުގައި ތިބި 72 މީހުންވެސް މަރުވެފައިވާ ކަމަށް ރިޕޯޓްތައް ބުނެއެވެ. ނޭޕާލްގެ ކަތަމަންޑޫއިން ޕޮކާރާއަށް ކުރި 27 މިނެޓުގެ ދަތުރުގައި ބޯޓު ވެއްޓެން މެދުވެރިވި ސަބަބު ދެނެގަތުމުގެ މަސައްކަތް މިހާރުވެސް ދަނީ ކުރަމުންނެވެ.
