ކޮންމެ ދުވަހަކު ރިބަން ކަނޑާ ވަރަށް ކަންކަން ކުރެވިއްޖެ: ރައީސް ޞާލިޙް
ސަރުކާރުގެ މިދަޢުރުގައި ނިންމާ މަޝްރޫޢުތަކުގެ ރިބަން ކަނޑަން ވެއްޖެނަމަ، މިދަޢުރުގެ ބާކީ ބައިގައި ދެން އެހެން ކަމެއް ކުރެވޭނެ ވަގުތު ނޯންނަހާ ގިނަ މަޝްރޫޢު ނިމެމުންދާ ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީގެ ކެމްޕެއިންގައި މިއަދު ހަވީރު އއ.ތޮއްޑޫ އެމްޑީޕީ މެމްބަރުންނާ އެކު ބޭއްވި ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ މި ސަރުކާރުން ތަރައްގީ ކުރި ބަނދަރުތަކުގެ ވާހަކަ އެކަނި ދައްކަން ފެށިޔަސް ބައިގަނޑި އިރު އެކަމަށް ހޭދަކުރަންޖެހޭނެ ކަމަށާއި މި ސަރުކާރުން ރާއްޖޭގެ އެކި ކަންކޮޅުތަކުގައި ތަރައްގީގެ ގިނަ މަޝްރޫއުތަކެއް ހިންގާފައިވާ ކަމަށެވެ.
ރައީސް ވިދާޅުވީ މިސަރުކާރު ވެރިކަމާ ހަވާލުވިއިރު ރާއްޖޭގައި ފެނާއި ނަރުދަމާގެ މަސައްކަތް ކުރެވިފައި އޮތީ، ދެ އަތުގެ އިނގިލިތަކުން ގުނާލެވޭހާ މަދު ރަށްތަކުގައިކަމަށެވެ. މި ބޮޑު ބުރަ މަސައްކަތުގެ ޒިންމާ މި ސަރުކާރުން ނަގާ، މިވަގުތުވެސް ރާއްޖޭގެ 144 ރަށުގައި ފެނާއި ނަރުދަމާގެ މަސައްކަތް ކުރިއަށްދާކަމަށް ވިދާޅުވިއެެވެ. މިއިން ކޮންމެ ޚިދުމަތަކުން ރައްޔިތު މީހާއަށް ލިބޭ ފަސޭހައާއެކު، އެކަމުން ރަށުގެ އިޤްތިޞާދަށްވެސް މަންފާ ކުރާކަމަށް ރައީސް ވިދާޅުވިއެވެ. އެގޮތުން ވަޒީފާތައް އިތުރުވުމާއި، ރަށުގައި އައު ވިޔަފާރިތައް ފަށާ އާމްދަނީ އިތުރުކުރުމަށް މަގުފަހިވާކަމަށް ވިދާޅުވިއެވެ.
ރައީސް ވިދާޅުވި ގޮތުގައި މިއަހަރުގެ ޖުލައި އޮގަސްޓް މަހާއި ހަމައަށްދާއިރު ހުރިހާ މަސައްކަތްތަކެއް ހުންނާނީ ނިމިފައެވެ. އަދި ނިމުނު ޕްރޮޖެކްޓްތައް ހުޅުވަން ވަގުތު ހޭދަކުރާ ކަމަށް ވާނަމަ އެހެން ކަމެއް ކުރާނެ ވަގުތެއް ނޯންނާނެ ކަމަށްވެސް ރައީސް ވިދާޅުވިއެވެ. އެއީ ޕްލޭނެއް އަދި އަމާޒެއް އޮވެގެން ކަންކަން ކުރުމުން ހާސިލުވި ކަމެއް ކަމަށްވެސް ރައީސް ވިދާޅުވިއެވެ.
"މިހާރުވެސް ގިނަ މަސައްކަތްތަކެއް ނިމިއްޖެ. ޖޫން، ޖުލައި، އޮގަސްޓްމަހަށް ދާއިރު ގިނަ މަޝްރޫޢުތައް މުޅިން ނިމޭނެ. ސަރުކާރުން ނިންމާ ކަންކަމުގެ ރިބަން ކަނޑަން ޖެހޭކަމަށްވަންޏާ، ދައުރުގެ ބާކީ އޮތް ބައިގައި އެކަން ކޮށްފަ ދެން އެހެން ކަމެއް ކުރާނެ ވަގުތު ނޯންނަވަރަށް މަޝްރޫޢުތައް ނިމޭނެ." ރައީސް ޞާލިޙް ވިދާޅުވިއެވެ.
