އިންޑިއާގެ ފަންނާނުންނާ ދިވެހި ފަންނާނުންގެ ފުޓްބޯޅަ މެޗެއް
މުނިފޫހިފިލުމުގެ ދާއިރާގައި ހަރަކާތްތެރިވާ އިންޑިއާގެ ބޮލީވުޑް ފަންނާނުންނާއި ދިވެހި ފަންނާނުން ގުޅިގެން 27 ޖެނުވަރީ ވާ ހުކުރު ދުވަހު ގަލޮޅު ދަނޑުގައި ފުޓްބޯޅަ މެޗެއް ކުޅޭގޮތަށް ހަމަޖެހިއްޖެއެވެ.
މި ފުޓްބޯޅަ މެޗު ކުޅުމަށް ހަމަޖެހިފައިވަނީ އިންޑިއާގެ ބޮލީވުޑްގައި ހަރަކާތްތެރިވާ ފަންނާނުން ހިމެނޭ ޓީމަކާއި ރާއްޖޭގެ މުނިފޫހިފިލުމުގެ ދައިރާގައި ހަރަކާތްތެރިވާ ޓީމުގެ ދެމެދުގައެވެ.
މި މެޗުގައި ބައިވެރިވާ އިންޑިއާގެ މަޝްހޫރު ފަންނާނުންގެ ތެރޭގައި އަފްތާބް ޝިވްދާސާނީ، ޝަރުމަން ޖޯޝީ އަދި ރޯހިތު ބޯސް ރޯއީ ހިމެނެއެވެ.
އަދި މެޗުގައި ބައިވެރިވާ ދިވެހި ފަންނާނުންގެ ތެރޭގައި މަޝްހޫރު ނެށުންތެރިޔާ ޖާދުﷲ އިސްމާއީލް، ކޮމީޑިއަންނުން ކަމުގައިވާ ނަޒީރު ޝިހާމް (ކާއްޓޭ) އަދި ރެފްރީއެއްގެ ގޮތުގައި ހުސެން ސާދު (މަޓޭ) ވެސް ބައިވެރިވެއެވެ.
މި މެޗުގެ ޚާއްސަ މެހެމާނެއްގެ ގޮތުން މިސް ޔުނިވާރޝް އިންޑިއާގެ މަޤާމު ދެ ފަހަރު ފުރާފައިވާ އެކްޓްރެސް އުރުވަޝީ ރައުޓެލާ ރާއްޖެ އައުމައް ވަނީ ހަމަޖެހިފައިއެވެ.
މި މެޗް އިންތިޒާމު ކުރުމުގައި ހަރަކާތްތެރިވަނީ އިންޑިއާގެ އިވެންޓް މެނޭޖްމަންޓްގައި ހަރަކާތްތެރިވާ ޓުއަރނިވަލް ކުންފުންޔެވެ.
މިހާރު މެޗުގެ ޓިކެޓު ގަލޮޅު ދަނޑުގެ ކައުންޓަރުތަކުގައި ދަނީ ވިއްކަމުންނެވެ.
