ސަމަދުބެއަށް މާރިޔާ ފާޑުކިޔުއްވި މައްސަލަ މަޖިލީހުން ބަލައެއް ނުގަތް!
މިއަދު ސިފައިންގެ ތެރޭގައި ތިބޭނީ ހިތްވަރުގަދަ ބޭފުޅުން ކަމަށާއި ފިނި ކޮޓަރިން އައިސް ކީރިތި ކުރައްވާނެ ބޭފުޅުންނެއްނޫން ކަމަށް ވިދާޅުވެ އިދިކޮޅު އެކްޓިވިސްޓު ސަމަދަށް ޑިފެންސް މިނިސްޓަރ މާރިޔާ އަހުމަދު ދީދީ ފާޑުވިދާޅުވި މައްސަލައިގައި މައްސަލަ ބަލާ ފިޔަވަޅު އެޅުމަށް ސަރުކާރަށް ގޮވާލައި ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައި ނުގަންނަން ނިންމައިފިއެވެ.
ފަރެސް މާތޮޑާ ދާއިރާގެ މެމްބަރު ހުސައިން މުޙައްމަދު ލަތީފް މިއަދު މަޖިލީހަށް ހުށައެޅި ކުއްލި މައްސަލައިގައި ވިދާޅުވީ ދިވެހި ދަރިއަކު ރާއްޖެއިން ބޭރުގައި އުފުލކ ތަކުލީފަށް ރާއްޖޭގެ ދިފާޢީ ވަޒީރުގެ މަޤާމުގައި ހުރި މާރިޔާ އަޙްމަދު ދީދީ ޖޯކު ޖައްސަވާ މަލާމާތް ކުރައްވާފައިވާ ހިނދު، ޢަބްދުއްޞަމަދަކީ ދިވެހި ސަލާމަތީ ޚިދުމަތްތަކުގައި ގިނަ ދުވަސްތަކެއް ވަންދެން ޚިދުމަތްކުރައްވައި ޝަރަފުވެރިކަމާއެކު ރިޓަޔާ ކުރައްވާފައިވާ ބޭފުޅެއްކަމަށެވެ.
އަދި އެފަދަ ދިވެހި ދަރިއަކާ މެދު ޑިފެންސް މިނިސްޓަރު ގެންގުޅުއްވި ދަށު ދަރަޖައިގެ ބަސްމަގު ކަމަށާއި ދިވެހި ސިފައިންނާއި ފުލުހުންނަކީ މިޤައުމުގެ މިނިވަންކަމާއި އިސްތިޤުލާލަށް ލޮޅުން އަރާ ކޮންމެ ވަގުތެއްގައި ވެސް މިޤައުމު ސަލާމާތް ކުރުމަށް ކަމަރު ބަނދެގެން ތިބެ، އެންމެ ފުރަތަމަ އެކަމާއި ކުރިމަތިލާން ތައްޔާރަށް ތިބި ބަޔަކަށް ވީހިނދު، އަދި އެއްވެސް އިރެއްގައި ސިފައިންގޭގަ ނުވަތަ ފުލުހުންގެ ތެރޭގައި އިޚުލާސްތެރި ޚިދުމަތެއް ކޮށްދެއްވާފައިވާ ބޭފުޅަކު މިޤައުމަށް ހަރާންކޯރު ނުވާނެކަމަށެވެ.
މީގެ އިތުރުން ދިފާޢީ ވަޒީރަކީ މީގެ ކުރިން ވެސް ދިވެހި ފުލުހުންނާއި ސިފައިންނަކީ ފިނދަނަތަކެއް ކަމަށް ސިފަ ކުރައްވާ، ޖޯކު ޖައްސަވާ ޢާންމު ގޮތެއްގައި ސިފައިންނާއި ފުލުހުންނަށް ބަދުބަސް ވިދާޅުވެފައިވާ ބޭފުޅެއްކަމަށާއި މިފަދަ ބޭފުޅަކު މިމަޤާމުގައި ހުންނެވުމަކީ މިސަރުކާރުން ސިފައިންނާއި ފުލުހުންގެ އަގު ވަޒަން ނުކުރާ މިންވަރު ހާމަވާކަމަކަށް މި ކުއްލި މައްސަލައިގައި ވަނީ ބުނެފައެވެ. އަދި މިއީ ވަކި ޤައުމެއް ރުއްސުމަށްޓަކައި ސަރުކާރުގެ އެކި ފަންތީގެ މަޤާމުތަކުގައި ތިއްބެވި ބޭފުޅުން އެ ޤައުމަށް ސަނާ ކިޔާ، ދިވެހި ރައްޔިތުން ނިކަމެތި ކުރަމުންދާ ދިއުމަކީ ބަލައިގަނެވޭ ކަމެއްނޫންކަމަށްވެސް މިމައްސަލައިގައި ވަނީ ފާހަގަކޮށްފައެވެ.
މެމްބަރު ހުސައިން މުހައްމަދު ހުށައެޅުއްވި މައްސަލަގައި އިތުރަށް ވިދާޅުވީ ޢަބްދުއްޞަމަދަށް މަލާމާތްކޮށް ޖޯކު ޖައްސަވާ ދިފާޢީ ވަޒީރު ދެއްކެވި ވާހަކަތަކަށް ދިވެހި ރައްޔިތެއްގެ ހައިސިއްޔަތުން މަޢާފަށް އެދުމަށާއި، އަދި މި ފަދަ މަޤާމެއްގައި ހުންނަވާ ދެއްކެވި ވާހަކަތަކާ ގުޅިގެން އެކަމަށް ފިޔަވަޅު އެޅުމަށް ސަރުކާރަށް
ގޮވާލާކަމަށެވެ.
ރައްޔިތުންގެ މަޖިލީހަށް މިއަދު ހުށައެޅުއްވި ކުއްލި މައްސަލައާއި މެދު ގޮތެއް ނިންމުމަށް ވޯޓުލުމަށް ހުޅުވާލި ފުރުސަތުގައި ވޯޓުގައި ބައިވެރިވި 39 ގެތެރެއިން 30 މެމްބަރުން ވޯޓު ދެއްވީ މައްސަލަ ބަލައިނުގަތުމަށެވެ. މިމައްސަލަ ބަލައިގަތުމަށް ވޯޓް ދެއްވީ 8 މެމްބަރުންނެވެ.
