ވަކީލުކަން ކުރައްވާއިރު އެންމެ ހިނދުކޮޅަކަށްވެސް ރޮނގުން ކައްސާލައިގެން ނުވާނެ: އުއްތަމަފަނޑިޔާރު
ވަކީލުކަމުގެ މަސައްކަތް ކުރައްވާއިރު އެންމެ ހިނދުކޮޅަކަށްވެސް ރޮނގުން ކައްސާލައިގެން ނުވާނެކަމަށާއި އަބަދުވެސް މަސައްކަތް ކުރައްވަންވާނީ ކަމަށް ކަމޭ ހިތައިގެން ކަމަށް އުއްތަމަފަނޑިޔާރު އަހުމަދު މުއުތަސިމް އަދުނާން ވިދާޅުވެއްޖެއެވެ.
ދިވެހިރާއްޖޭގެ ބާ ކައުންސިލުގެ ފަރާތުން ބޭއްވި، ދިވެހިރާއްޖޭގައި ޤާނޫނީ ވަކީލެއްގެ ހައިސިއްޔަތުން މަސައްކަތްކުރުމުގެ ހުއްދަ ދިނުމުގެ ރަސްމިއްޔާތުގައި ވާހަކަ ދައްކަވަމުން އުއްތަމަ ފަނޑިޔާރު ވިދާޅުވީ ވަކީލުކަމުގެ މަސައްކަތް ކުރައްވާއިރު ފަރުވާކުޑަވުމުގެ ސަބަބުން ނުވަތަ އަތުން ބީވެގެންދާ ކުޑަ ކުޑަ ކަމެއްގެ ސަބަބުން މީހެއްގެ ޙައްޤެއް ގެއްލިއްޖެނަމަ އެއީ މަޢާފު ކުރެވޭނެކަމެއް ނޫންކަމަށެވެ.
"ފަރުވާކުޑަވުމުގެ ސަބަބުން ނުވަތަ އަތުން ބީވެގެންދާ ކުޑަ ކުޑަ ކަމެއްގެ ސަބަބުން މީހެއްގެ ޙައްޤެއް ގެއްލިއްޖެނަމަ އެއީ މަޢާފު ކުރެވޭނެކަމެއް ނޫން. އަދި އެކަންކަމާ މެދު އެމީހަކާ ސުވާލުކުރެވޭނެ ކަން އަބަދުވެސް ހަނދުމަފުޅު ބަހައްޓަވަންވާނެ." އުއްތަމަފަނޑިޔާރު ވިދާޅުވިއެވެ.
އުއްތަމަ ފަނޑިޔާރު އިތުރަށް ވިދާޅުވީ އަދުލު އިންސާފު ޤާއިމުކުރުމުގައި ހަރަކާތްތެރިވާ މީހުންނަކީ ޒިންމާބޮޑު ބައެއް ކަމަށާއި އަދުލު އިންސާފު ޤާއިމުކުރުމުގައި ހަރަކާތްތެރިވާ މީހުން ކުރާ މަސައްކަތަކީ ޤާނޫނުގެ ބާރާއި ޤާނޫނުގެ ވެރިކަން ނެގެހެއްޓުން ކަމަށެވެ.
އަދި މިރާއްޖޭގެ ޤާނޫނީ ފަންނު ތަރައްޤީވެ ކުރިއެރުވުމަކީ އެންމެން ގުޅިގެން ކުރަންޖެހިފައިވާކަމެއް ކަމަށާއި އަދި ޤާނޫނީ ވަކީލުންނަކީ އެކަކު އަނެކަކަށް އިހުތިރާމްކުރާ ބަޔަކަށްވާންޖެހޭ ކަމަށް އުއްތަމަ ފަނޑިޔާރު ވަނީ ފާހަގަކުރައްވައިފައެވެ.
ޤާނޫނީ ފަންނުގެ ގާނޫނުގެ ދަށުން ފުރަތަމަ ފަހަރަށް ރާއްޖޭގައި ބޭއްވި ބާ އިމްތިހާނުން މިދިޔަ ނޮވެމްބަރު މަހު ބާއްވާފައިވާއިރު އެއިމްތިހާނުގައި ބައިވެރިވި މީހުންގެ 68 ޕަސެންޓް މީހުން ވަނީ ފާސްވެފައެވެ.
އުއްތަމަ ފަޑިޔާރުކަން ކުރާއިރު އަމުދުން ރޮގު ބޮޑު ކޮށް ކައްސާލުމަކީ ބޮޑުތަނުން ހައްޤު ގެއްލޭނެކަމެއް،ވީމާ ވަރަށް ރަގަޅަށް ރޮގު ބަލަހައްޓަވާތި !