ޖޭޕީ އާއި ރައީީސް ނަޝީދު ފެކްޝަނުގެ ދެވަނަ ބައްދަލުވުން ފެށިގެން ކުރިއަށްދަނީ

ޖުމްހޫރީ ޕާޓީއާއި އެމްޑީޕީގެ ރައީސް މުޙައްމަދު ނަޝީދަށް ތާއީދު ކުރާ ފަރާތްތަކާއެކު ބާއްވާ ދެވަނަ ބައްދަލުވުން ފަށައިގެން މިހާރު ކުރިއަށް އެބަ ގެންދެއެވެ.
ޖޭޕީގެ ސްޕޯކްސްޕާރސަން އަލީ ޞާލިޙު ވިދާޅުވި ގޮތުގައި މިބައްދަލުވުން ފެށުނީ މިރޭ 21:30 ގައި ޖުމްހޫރީ ޕާޓީގެ ހެޑްކުއާޓާޒް މާފަންނު ކުނޫޒުގައެވެ. މިބައްދަލުވުމުގައި ޖޭޕީގެ އިސްވެރިންނާއި އެމްޑީޕީ ނަޝީދު ފެކްޝަނުގެ އިސްބޭފުޅުން ބައިވެރިވެވަޑައިގަންނަވައެވެ.
ޖޭޕީ އާއި ރައީސް ނަޝީދު ފެކްޝަނުން މީގެ ކުރިންވެސް ވަނީ ބައްދަލުކުރައްވައި، މަޝްވަރާތައް ކުރައްވައިފައެވެ. މިގޮތުން އެބައްދަލުވުމުގައި ރައީސް ނަޝީދުގެ ފަރާތުން ޖޭޕީއާއި ބައްދަލުކޮށްފައިވަނީ އެމްޑީޕީގެ ކުރީގެ ޗެއާޕާސަން ހަސަން ލަތީފާއި ހުސައިން އަމްރުއެވެ. އަމްރު އޭރު ހުންނެވީ އެސްޓީއޯގެ އެމްޑީގެ މަގާމުގައި ނަމަވެސް އޭނާވަނީ މިފަހުން އެ މަޤާމުން ވަކިކޮށްފައެވެ.
އަންނަ ސެޕްޓެމްބަރު މަހުގެ 9 ވަނަ ދުވަހު ރިޔާސީ އިންތިޚާބު ބޭއްވުމަށް ހަމަޖެހިފައިވާއިރު، ރައީސް ޞާލިޙާއެކު މިހައިތަނަށް ކޯލިޝަން ހަދާފައިވަނީ ޢަދާލަތު ޕާޓީ އާއި އެމްޑީއޭއިންނެވެ. ރިޔާސީ އިންތިޚާބުގައި ކޯލިޝަން ހަދަން ރައީސް ޞާލިޙް ދެއްވި ދައުވަތު ޤަބޫލުނުކޮށް ޖޭޕީން ވަނީ އިންތިޚާބުގައި ވަކިން ވާދަކުރަން ނިންމައިފައެވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.