ނިމާލު ޢަމްރަށް: ފެނަކައިން ފައިސާ ނުދެނީސް ދޫކުރި ޑީސަލް ކޮބާ؟
ސްޓޭޓް ޓްރޭޑިން އޮގަނައިޒޭޝަން(އެސްޓީއޯ)ގެ ސަބްސިޑަރީ ކުންފުނި، އެފްއެސްއެމްއިން، ފެނަކައިން ފައިސާ ނުދައްކަނީސް ދޫކުރި ޑީސަލް ކޮބައިތޯ ސުވާލު ކުރައްވައި، ޕީއެންސީގެ ނައިބު ރައީސް އަދި މާލެ އަތޮޅު ކައުންސިލްގެ ރައީީސް މުޙައްމަދު ނިމާލު، އެސްޓީއޯގެ ކުރީގެ އެމްޑީ ޙުސެއިން ޢަމްރުއަށް ފާޑުވިދާޅުވެއްޖެއެވެ.
ނިމާލު ޢަމްރަށް ބަހުގެ ހަމަލާއެއް ދެއްވައިފައި މިވަނީ، މަޤާމުން ވަކި ކުރެއްވި ފަހުން، ފެނަކައިގެ ހާލަތާ މެދުގައި ޢަމްރު ކަންބޮޑުވުން ފާޅުކުރެއްވުމުންނެވެ.
ލ. އަތޮޅު ގަމުގައި ހުންނަ ފެނަކަ ކޯޕަރޭޝަންގެ އިންޖީނުގެއިން ޑިސަލް ހުސްވެގެން އެރަށުން ކަރަންޓު ކެނޑުނު މައްސަލައިގައި ޢަމްރު ވިދާޅުވީ ފެނަކައިގެ ހިންގުން ވަރަށް ބޮޑަށް ދޯދިޔާވެ، ބޮއްސުންލައިފައިވާ ކަމަށެވެ.
ޢަމްރު ކުރެއްވި ޓުވީޓެއްގައި ވިދާޅުވެފައިވަނީ، އިންޖީނުގެއަކުން ޑިސަލް ހުސްވެގެން ރަށަކުން ކަރަންޓު ކެނޑުމަކީ މީގެކުރިން ރާއްޖޭގައި ހިނގާފައި އޮތް ކަމެއް ނޫން ކަމަށާއި، ފެނަކައިގެ ހިންގުން ދޯދިޔާވެ އެތަން ވަނީ ބޮއްސުން ލާފައި ކަމުގައެވެ.
އޭނާ ވިދާޅުވީ ފެނަކައިގެ ދަރަނި އަތް ނުފޯރާ ފަށަށް މަތިވެފައިވާއިރު، މިއީ ދައުލަތުގެ އެއްވެސް މުވައްސަސާއަކަށް ހައްލު ހޯދާ ދެވިފައިވާ މައްސަލައެއްވެސް ނޫންކަމުގައެވެ.
ނިމާލު ވިދާޅުވީ ޢަމްރު މި ވާހަކަ ދެއްކެވުން އެންމެ ރަނގަޅީ ރައީސް އިބްރާހީމް މުޙައްމަދު ޞާލިޙުގެ ވެރިކަމުގެ މި ދައުރު ނިމުމުން ކަމަށާއި، ފެނަކައިން ފައިސާ ނުދެނީީސް، އެފްއެސްއެމްއިން ޑީސަލް ދޫކުރުމުން އެ ބިލުތައް އަތްނުފޯރާ ހިސާބަށް ދިޔަ ކަމަށެވެ. އަދި އޭރު ޢަމްރު "ތި އިޤްތިޞާދީ ވާހަކަ ދެއްކިނަމަ، އަޑުއަހަން ފަސޭހަ ވީސް" ކަމަށް ވެސް އޭނާ ވިދާޅުވިއެވެ.
