ރިސޯޓްތަކުގެ އިސް މަޤާމުތަކުގައި ދިވެހީން ނެތުމަށްވުރެ ބޮޑު ޤައުމީ މައްސަލައެއް ނެތް: ޖާބިރު
ރިސޯޓުތަކުގެ އިސް ބައެއް މަޤާމުތަކުގައި ދިވެހިން ނެތުމަށް ވުރެ ބޮޑު ޤައުމީ މައްސަލައެއް ނެތްކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު ޖާބިރު ވިދާޅުވެއްޖެއެވެ.
އޭނާ މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި، ދިވެހިރާއްޖޭގެ ފަތުރުވެރިކަމުގެ ސިނާޢަތުގެ ވަޒީފާތަކުގެ ތެރޭގައި ހިމެނޭ ރިޒޯޓު މެނޭޖަރުކަމާއި، އެޗް.އާރް މެނޭޖަރުކަމާއި، ޗީފް އެކައުންޓެންޓުގެ މަޤާމަށް ހަމައެކަނި ދިވެހިންނަށް އަދާކުރެވޭ މަޤާމެއްކަމަށް ކަނޑައެޅުމާ ގުޅޭ ޤަރާރެއް މަޖިލީހަށް ހުށަހަޅުއްވާ ވާހަކަދައްކަވަމުންނެވެ.
ރާއްޖޭގެ ފަތުރުވެރިކަން ކުރިއަރައި ދިޔުމުގައި، ދާއިރާގައި މަސައްކަތް ކުރާ މީހުންގެ ބޮޑު ދައުރެއް އޮންނަކަން ޖާބިރުގެ ވާހަކައިގައި ފާހަގަކުރެއްވިއެވެ.
ޖާބިރު ހުށަހެޅުއްވި ޤަރާރުގައި ބުނެފައި ވަނީ ފަތުރުވެރިކަމަކީ އިޤްތިޞާދުގެ ލޭނާރުކަމަށްވާއިރު މިހާރު ރާއްޖޭގައި އެފަދަ މަޤާމުތަކަށް ބޭނުންވާ ޤާބިލު މީހުންނަށް ތައުލީމާއި ތަމްރީނު ފޯރުކޮށްދެވިފައި ހުންނަން ޖެހޭ ކަމަށެވެ.
Ads by STO
