ގޯސްވާނީ މި ސަރުކާރުގެ ސްލޯ ކަމުގެ ވާހަކަ ދައްކާމީހާ: އުޝާމް
ކޮތަޅުގެ މައްސަލަ ހައްލުކުރުމަށް ސަރުކާރުން ޤާނޫނަށް ހުށަހެޅި އިސްލާހުގެ މިބިލްގެ އިބްތިދާއީ ބަހުސްވެސް އަދި ނުފެށޭކަމަށާއި، މި ސަރުކާރުގެ ސްލޯކަމުގެ ވާހަކަ ދެއްކީމަ ގޯސްވަނީ އެވާހަކަ ދައްކާ މީހާކަމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަޙުމަދު އުޝާމް ވިދާޅުވެއްޖެއެވެ.
ކުނި މެނޭޖް ކުރުމުގެ ޤާނޫނުގެ ދަށުން ވަކިވަކި ކޮތަޅުން ޓެކްސް ނަގަން ފެށުމާއެކު ރައްޔިތުންނަށް އެތައް ތަކުލީފެއް އުފުލަންޖެހި ގިނަ ބައެއްގެ ފާޑުކިޔުންވަނީ މި ޤާނޫނަށް އަމާޒުވެފައެވެ. އެ މައްސަލަ ހައްލުކުރުމަށް ސަރުކާރުން ގާނޫނަށް އިސްލާހު ހުށަހެޅީ 27 މާޗް 2023 ގައި ކަމަށް އުޝާމް ވަނީ ވިދާޅުވެފައެވެ.
"ކުނި މެނޭޖްކުރުމުގެ ގާނޫނު 18 ޑިސެމްބަރު 2022 ގަ ރައީސުލްޖުމްހޫރިއްޔާ ތަސްދީޤު ކުރެއްވިއިރު ވެސް އޭގެ 4 މަސްފަހުން ކޮތަޅުގެ އަގުގެ މައްސަލަ ދިމާވާނެކަން އެނގޭއިރު، އެ މައްސަލަ ހައްލުކުރުމަށް ސަރުކާރުން ގާނޫނަށް އިސްލާހު ހުށަހެޅީ 27 މާޗް 2023 ގަ. މިސަރުކާރު ސްލޯކަމުގެ ވާހަކަ ދެއްކީމަ ދައްކާ މީހާ ގޯސްވާނީ. މިބިލްގެ އިބްތިދާއީ ބަހުސްވެސް އަދި ނުފެށޭ. މިފެށޭ ހަފްތާގަ މަޖިލިސް 15 ދުވަހުގެ ރިސެސްއަކަށް ދާއިރު ކައިރި މުސްތަގުބަލެއްގަ ކޮތަޅުގެ އަގުގެ މައްސަލައަށް ހައްލެއް ލިބިދާނެކަމަށް ޝައްކު" އުޝާމް ވިދާޅުވިއެވެ.
ކޮތަޅުން ޓެކްސް ނެގުމުގެ ތަކުލީފު ރައްޔިތުން އުފުލަންޖެހުނީ ޤާނޫނަށް އިސްލާހު ހުށަހެޅިއިރު، އޭގައި ހިމެނި ބައެއް ކަންކަން ރައްޔިތުންގެ މަޖިލީހުން އުނިކުރައްވައިފައިވުމުން ކަމަށް އެންވަޔަރަމެންޓް މިނިސްޓްރީން ރޭ ވަނީ ވިދާޅުވެފައެވެ.
އެ މިނިސްޓްރީން ރޭގެ ވަގުތެއްގައި ނެރުއްވި ބަޔާނެއްގައި ވަނީ ކޮތަޅު ބޮނޑި އަގުބޮޑުވީ ކުނި މެނޭޖުކުރުމުގެ ޤާނޫނުގައި ވާގޮތުން ކޮތަޅު ބޮނޑި ހޯލްސޭލް ރޭޓުގައި ގަތަސް، އެ ބޮނޑީގެ އަގުގެ އިތުރުން ކޮންމެ ކޮތަޅަކަށް ދެ ރުފިޔާގެ ފީ ދައްކަން ޖެހޭތީ ކަމަށެވެ.
