އަންނަ މަހުގެ އެއްވަނަ ދުވަހުން ފެށިގެން، ސިއްޙީ ދާއިރާގެ މުސާރައަށް ގެނައި ބަދަލާއެކު، އެ ދާއިރާގެ 3710 މުވައްޒަފަކަށް މުސާރަ ބޮޑުވާނެކަމަށް ސަރުކާރުން ހާމަކުރައްވައިފިއެވެ.
ސަރުކާރުން މިކަން ހާމަކުރެއްވީ ސިއްޙީ ދާއިރާގެ މުވައްޒަފުންގެ މުސާރައަށް އައި ކުރިއެރުމާއި ގުޅޭގޮތުން ރައީސް އޮފީހުގައި މިރޭ ބޭއްވެވި ނޫސްވެރިންގެ ބައްދަލުވުމުގައެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޕޭ ކޮމިޝަނުގެ ރައީސް ޑރ.މުޙައްމަދު ފައިޒަލް ވިދާޅުވީ ސިއްޙީ ދާއިރާގެ މުވައްޒަފުންގެ މުސާރައަށް އައި ކުރިއެރުން ލިބޭނީ ހަމައެކަނި ދިވެހި މުވައްޒަފުންނަށްކަމަށެވެ.
މުސާރަ ބޮޑުވި 3710 މުވައްޒަފުންގެ ތެރޭގައި ހިމެނެނީ ރީޖަނަލް ހޮސްޕިޓަލް 520 މުވައްޒަފުން، އަތޮޅު ހޮސްޕިޓަލްގެ 471 މުވައްޒަފުން، ހެލްތު ސެންޓަރުތަކުގެ 965 މުވައްޒަފުން، އައިޖީއެމްއެޗްގެ 1004 މުވައްޒަފުން، ހުޅުމާލެ ހޮސްޕިޓަލް 298 މުވައްޒަފުން އަދި އެހެނިހެން ދާއިރާތަކުގައި މަސައްކަތްކުރާ 452 މުވައްޒަފުންނެވެ.
ސިއްހީ ދާއިރާގެ ހުރިހާ މުވައްޒަފުންގެ މުސާރަ މާދަމާއިން ފެށިގެން ބޮޑުކުރަން ނިންމާފައިވާއިރު ސަރުކާރުގެ ވުޒާރާތަކުގައި މަސައްކަތްކުރާ ސިވިލް ސާވަންޓުންގެ ތެރެއިން 35 ޕަސެންޓު އެލަވެންސް ނުލިބޭ މުވައްޒަފުންނަށް އެ އެލަވަންސް ދިނުމަށް ވެސް ވަނީ ނިންމާފައެވެ. ސިވިލް ސާވަންޓުންގެ ތެރެއިން 35 ޕަސެންޓު އެލަވަންސް މިހާތަނަށް ޔޫތު މިނިސްޓްރީ, އިސްލާމިކް މިނިސްޓްރީ, އާޓްސް މިނިސްޓްރީ އަދި ހަޔާ އެޑިއުކޭޝަން މިނިސްޓްރީގެ މުވައްޒަފުންނަށް ލިބިފައި ނުވެއެވެ.
ނަމަވެސް, މި ބަދަލާ އެކު އެ މިނިސްޓްރީތަކުގައި މަސައްކަތްކުރާ 1,367 މުވައްޒަފުންނަށް މި އެލަވަންސް ދިނުމަށް މަހަކު 2.658 މިލިއަން ރުފިޔާ ހޭދަކުރާނެއެވެ. އަދި, އަހަރެއްގެ މައްޗަށް އެކަމަށް 31.9 މިލިއަން ރުފިޔާ ހޭދަވާނެއެވެ.
ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.