ރާއްޖޭގެ ދިފާއީ ބާރު ވަރުގަދަ ކުރުމަށް އިންޑިއާއިން ދޭ އެހީއަށް ޑިފެންސް މިނިސްޓަރުގެ ޝުކުރު
ރާއްޖޭގެ ޤައުމީ ދިފާއީ ބާރު ވަރުގަދަ ކުރުމަށް އިންޑިއާއިން ދޭ އެހީއަށް ޑިފެންސް މިނިސްޓަރު މާރިޔާ އަހުމަދު ދީދީ ޝުކުރު ދަންނަވައިފިއެވެ.
އިންޑިއާ ސަރުކާރުން ދިވެހިރާއްޖެއަށް ހަދިޔާކުރެއްވި، އޯފްޝޯ ޕެޓްރޯލް ވެސަލް، ހަވާލުކުރެއްވުމަށް މިއަދު ހެނދުނު ހުޅުމާލޭގައި އެމްއެންޑީއެފް ކޯސްޓްގާޑުގެ އުޅަނދުފަހަރު ބަނދަރުކުރާ ސަރަޙައްދުގައި ބޭއްވި ޖަލްސާގައި ވާހަކަފުޅުދައްކަވަމުން މިނިސްޓަރ ވިދާޅުވީ ރާއްޖެއާއި އިންޑިއާއިން ގެންގުޅެފައިވާ ބަދަހި ގުޅުމުގެ އެންމެ މުހިއްމު އެއް އަސާސަކީ ރާއްޖެއިން ގެންގުޅޭ "އިންޑިއާ ފަސްޓް" ޕޮލިސީ ކަމަށެވެ.
މިނިސްޓަރ ވިދާޅުވީ އިންޑިއާ ސަރުކާރުން ހަދިޔާކުރި އުޅަނދުތަކުގެ ސަބަބުން އެމްއެންޑީއެފް ކޯސްޓްގާޑުގެ އޮޕަރޭޝަނަލް ޤާބިލްކަން އިތުރުވެ ދިވެހި ރާއްޖޭގެ ދިފާޢު އަދި ސަލާމަތާއި ރައްކާތެރިކަން ދެމެހެއްޓުމުގައާއި ރާއްޖޭގެ ކަނޑުގެ ސަރަޙައްދުތައް ބެލެހެއްޓުމަށް ކުރާމަސައްކަތް އިތުރަށް ހަރުދަނާވެގެންދާނެ ކަމަށެވެ.
މި ރަސްމިއްޔާތުގައި ޑިފެންސް މިނިސްޓަރ ވަނީ އިންޑިއާގެ މި ހަދިޔާގެ އަގުވަޒަން ކުރައްވައި ޚާއްޞަ ހަނދާނީ ފިލައެއް އިންޑިއާގެ ޑިފެންސް މިނިސްޓަރ ރަޖްނަތު ސިންގއަށް އަރުއްވާފައެވެ.
