ސަރުކާރުން ޢަމަލުކުރަމުން ދަނީ ވަޢުދުތަކާ ޚިލާފަށް، ރައީސް ސޯލިހު އިސްތިއުފާ ދެއްވާ: ޖާބިރު
މި ސަރުކާރުން އަމަލުކުރަމުން ދަނީ ރައްޔިތުންނަށްވި ވައުދުތަކާ ޚިލާފަށް ކަމަށާއި އެހެންކަމުން ރައީސް އިބްރާހިމް މުހައްމަދު ސޯލިހު މަގާމުން އިސްތިއުފާ ދެއްވުމަށް ކާށިދޫ ދާއިރާގެ މެމްބަރު އަދި ޑީއާރުޕީގެ ލީޑަރު އަބްދުﷲ ޖާބިރު ގޮވާލައްވައިފިއެވެ.
ރައީސް ސޯލިހަށް ފޮނުއްވި ސިޓީފުޅެއްގައި ޖާބިރު ވިދާޅުވީ ދިވެހި ރައްޔިތުން ރައީސް ސޯލިހު ވެރިކަމަށް ގެންނެވީ ނުހަނު އުއްމީދުތަކާއި ހުވަފެންތައް ހާސިލުކޮށްދެއްވާނެ ކަމުގެ ފުރިހަމަ ޔަގީންކަން އަރުވައި އެތަކެއް ވައުދުތަކެއް ވެވަޑައިގެން ކަމަށާއި އަދި އޭނާ އަމިއްލަ އަށް ވެސް ރައީސް ސޯލިހު ވެރިކަމަށް ގެންނެވުމަށް 23 މިލިއަން ޑޮލަރު ހަރަދުކުރެއްވި ކަމަށެވެ.
ނަމަވެސް މިއަދު މި ފެނިގެންދަނީ ވެވަޑައިގެންފައިވާ ވައުދުތަކާއި ޚިލާފަށް މި ސަރުކާރުން އަމަލު ކުރަމުންދާ މަންޒަރު ކަމަށް ޖާބިރު ވިދާޅުވިއެވެ. އެގޮތުން ކޮވިޑް-19 އާއި ގުޅިގެން އެތައް މުވައްޒަފުންގެ ވަޒީފާ ގެއްލި، ފަތުރުވެރިކަމާއި އުފެއްދުންތެރިކަމުގެ ސިނާއަތުގައި މުޅި އުމުރު ހޭދަކުރި ރައްޔިތުން ބިކަވެ، މަސްވެރިންނާއި ދަނޑުވެރިންނަށް ހަމަ އަގުގައި ވިޔަފާރި ކުރެވޭނެ ގޮތެއް ނެތް ކަމަށް ޖާބިރު ވިދާޅުވިއެވެ.
މީގެއިތުރުން ގައުމުގެ ސަލާމަތާއި ރައްކާތެރިކަމަށް ބިދޭސީންގެ ނުރައްކާ ބޮޑުވެ، ގައުމުގެ ހާލަތު ދުވަހުން ދުވަހަށް ދަށަށް ދާތީ، ރައީސް ސޯލިހު ގައުމުގެ އެންމެ އިސް މަގާމުގައި ހުންނެވުމަށް ނުކުޅެދިފައިވާ ކަމަށްވެސް ޖާބިރު ވިދާޅުވިއެވެ. އަދި ދިވެހި ރައްޔިތުން ދަންނަވާ ގޮތުންނަމަ މި ސަރުކާރު މިހާރު ފެއިލް ވެފައިވާ ކަމަށް ވެސް އޭނާ ވިދާޅުވިއެވެ.
އަދި ކަންކަން މިހެން ހުރުމުގެ ސަބަބުން ރައްޔިތުންގެ ސަލާމަތާއި ރައްކާތެރިކަމާއި ދިވެހި އާއިލާތަކަށް އިގްތިސާދަށް މިއައި ކުއްލި ލޮޅުމުގައި ލިބިފައިވާ ގެއްލުންތަކާއި ހިތާމަތަކުން ރައްޔިތުން މިންޖު ކުރުމަށްޓަކައި މަސްވެރިންނާއި، ދަނޑުވެރިންނާއި، ވަޒީފާ ގެއްލިފައި ތިބި މުވައްޒަފުންނާއި، ކުރީގެ ރައީސް އަބްދުﷲ ޔާމީން މިނިވަން ކުރުމަށްޓަކައި އިދިކޮޅު ކޯލިޝަނާ އެކީގައި ޑީއާރްޕީން ރައީސް ސޯލިހުގެ އިސްތިއުފާ އަށް ގޮވާލާ ކަމަށްވެސް ވަނީ ވިދާޅުވެފައެވެ.
އަދި ނުފޫޒުން އެއްކިބާވެފައިވާ އިންސާފުވެރި އިންތިހާބެއް ބޭއްވުމުގެ މަސައްކަތް ފެށުމަށްޓަކައި ވަގުތުން ވަގުތަށް އިހުތިޖާޖު ނިކުތުމަށް ތައްޔާރުގައި ތިބި ކަމަށްވެސް ޖާބިރު ވިދާޅުވިއެވެ.
