އޭޖީގެ އިތުބާރުނެތް މައްސަލަ: ރައީީސް ނަޝީދު އެދިވަޑައިގަތީ ސުޕްރީމް ކޯޓުގެ ލަފަޔަކަށް

ބަންޑާރަނައިބު އިބްރާހީމް ރިފްޢަތުގެ އިތުބާރު ނެތްކަމުގެ މައްސަލަ ކުރިއަށް ގެންދާނެ ގޮތަކާމެދު ރައްޔިތުންގެ މަޖިލީހުގައި ތިއްބަވާ ސިޔާސީ ޕާޓީތަކުގެ ލީޑަރުންނަށް އެއްބަސްނުވެވޭތީ ސުޕްރީމް ކޯޓުގެ އިސްތިޝާރީ ލަފައެއް ބޭނުންވާކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

Ads by STELCO

ރިފްޢަތުގެ އިތުބާރު ނެތްކަމުގެ މައްސަލަ މަޖިލީހުގެ މިއަދުގެ ޖަލްސާއަށް އެޖެންޑާ ކުރި ނަމަވެސް ޖަލްސާއަށް ހާޒިރުވެވަޑައިނުގެން އޭނާ ވަނީ، ހުށަހެޅިފައިވާ މައްސަލައަށް ލިޔުމުން ޖަވާބު ފޮނުއްވައިފައެވެ.

ޤާނޫނު އަސާސީގެ 101 ވަނަ މާއްދާގައި ބަޔާންކޮށްފައިވާ ގޮތުން ވަޒީރެއްގެ އިތުބާރު ނެތްކަމުގެ މައްސަލާގައި ކުރެވޭ ބަހުސްގައި އަނގަބަހުންނާއި ލިޔުމުން, ދިފާޢުވުމުގެ ޙައްޤު ވަޒީރަށް ލިބިވަޑައިގަންނަވާނެއެވެ.

ރިފްޢަތު މަޖިލީހަށް ހާޒިރުވެވަޑައިނުގެން ޖަވާބުދާރީވެވަޑައިގަންނަވާނެ ގޮތަކާމެދު މަޖިލީހުގެ އާންމު ކޮމިޓީން ގޮތެއް ނިންމާފައިނުވާތީ އެކަމުގެ ސަބަބުން އިދާރީ މައްސަލައެއް އުފެދިފައިވާކަމަށް ވިދާޅުވެ ސިޔާސީ ލީޑަރުންގެ މެދުގައި މަޝްވަރާ ކުރެއްވުމަށް ރިޔާސަތުން ޖަލްސާ މެދުކަނޑައިލެއްވިއެވެ.

ބައިގަޑިއެއްހައި އިރަށް ޖަލްސާ މެދުކަނޑައިލެއްވުމަށްފަހު މަޖިލީހުގެ ރައީސް ވަނީ ސިޔާސީ ލީޑަރުންނާ މަޝްވަރާ ކުރައްވައިފައެވެ.

ޖަލްސާ އަލުން ފައްޓަވަމުން ރައީސް ނަޝީދު ވިދާޅުވީ ލީޑަރުންނާއެކު ކުރެވުނު މަޝްވަރާއަކުން ހައްލެއް ނުލިބުނު ކަމަށާއި އެމްޑީޕީން ދެކެނީ އާންމު ކޮމިޓީގެ ނިންމުމެއް އޮތަސް ޖަވާބުދާރީވެވަޑައިގަތުމަށް ޤާނޫނުއަސާސީން ލިބިދޭ ހައްގު ބަންޑާރަނައިބަށް ވެސް ލިބިވަޑައިގަންނަވާނެ ކަމަށެވެ. ނަމަވެސް އެހެން ޕާޓީތަކުގެ ވިސްނުން ހުރީ ޑޮކިއުމެންޓްރީ އެވިޑެންސާއެކުގައި މަޖިލީހަށް ހާޒިރުވެވަޑައިގެން ޖަވާބުދާރީވެވަޑައިގަންނަވަން ޖެހޭނެ ކަމަށެވެ. އަދި ޖަވާބުދާރީވެވަޑައިނުގަންނަވާ ގޮތަކަށް ޤާނޫނުއަސާސީގައި ބަޔާން ނުކުރާ ކަމަށް ލީޑަރުން ވިދާޅުވާ ކަމަށެވެ.

ރައީސް ނަޝީދު ވިދާޅުވީ މި މައްސަލައިގައި ދެން ޖެހޭނީ އިސްތިޝާރީ ލަފައެއް ހޯދަން ކަމަށެވެ.

ރައީސް ނަޝީދު ވަނީ އެމަނިކުފާނު ރިޔާސަތުގައި އިންނަވައިގެން ގާނޫނުއަސާސީއާ ޚިލާފަށް ވަޒީރަކު ވަކިކުރުމުގެ މަސައްކަތްތައް ހިންގުން އެއީ އެމަނިކުފާނަށް ކުރެއްވޭނެ ކަމެއް ނޫންކަމަށް ވެސް ވިދާޅުވެފައެވެ.