ނާޒިމްގެ ވަޢުދު: ފުރަތަމަ 30 ދުވަހުގެ ތެރޭގައި ހިޔާގެ ކުލި 4،000އަށް

ހިޔާ މަޝްރޫޢުގެ ދަށުން އަޅައިފައިވާ ފްލެޓްތަކުގެ ކުލި، ވެރިކަމުގެ ފުރަތަމަ 30 ދުވަހުގެ ތެރޭގައި، 4،000 ރުފިޔާއަށް ކުޑަ ކުރުމަށް އެމްއެންޕީގެ ރިޔާސީ ކެންޑިޑޭޓް، މުޙައްމަދު ނާޒިމް ވިދާޅުވެއްޖެއެވެ.

Ads by STELCO

ނާޒިމް މިހެން ވިދާޅުވީ "އުޖާލާ ޒަމާން" މެނިފެސްޓޯ ލޯންޗު ކުރުމަށް މިރޭ ބޭއްވި ހަފްލާގައި ވާހަކަ ދައްކަވަމުންނެވެ.

އޭނާ ވިދާޅުވީ، ހިޔާ ފްލެޓްތަކުގައި މީހުން އުޅެނީ ވަރަށް ހާލުގައި ކަމަށާއި، އެމީހުންގެ ދިރިއުޅުމުގެ ހާލަތު ތަފްސީލުކޮށްދޭން ދަތި ކަމަށެވެ.

ނާޒިމް ވިދާޅުވީ، ރައްޔިތުންނަށް ބޭނުންވާ އަސާސީ ކަންކަން ކޮށްދިނުމަކީ ކޮންމެ ސަރުކާރަކުންވެސް ކޮށްދޭން ޖެހޭނެ ކަމެއް ކަމަށާއި، ވަޢުދުވާންވީ ރައްޔިތުންގެ ދިރިއުޅުމުގެ ޙާލަތު ރަނގަޅު ކުރުމަށް ކަމަށެވެ.

އަދި އެމްއެންޕީން މަސައްކަތް ކުރާނީ، ކޮންމެ ރައްޔިތެއްގެ ދިރިއުޅުމަށް ވެސް ހެޔޮ ބަދަލެއް ގެނެސްދިނުމަށް ކަމަށް ވިދާޅުވިއެވެ.

"އިޖްތިމާއީ ފޭރާން، އަޅުގަނޑުމެން އާރާސްތު ކުރަން މިއަދު އެބަޖެހޭ. ރައްޔިތުންނަށް މަގުމަތީގައި އަމާންކަމާއެކު އުޅެވެން އެބަޖެހޭ."

ނާޒިމް އިތުރަށް ވިދާޅުވީ، އެމްއެންޕީގެ މެނިފެސްޓޯ، ނުވަ ބަޔަކަށް ބެހިފައިވާއިރު، އޭގެތެރެއިން އެންމެ މުހިންމު އެއް ބަޔަކީ "އުފާވެރި ޒުވާނާ" ކަމަށެވެ.

އަދި ޒުވާނުން ބާރުވެރި ކުރުވައި، ފުދުންތެރި ބަޔަކަށް ހެދުމަށް ބޮޑު އިސްކަމެއް ދެއްވާނެ ކަމަށް ވިދާޅުވިއެވެ.