ދެން އޮންނަ ޑިމޮކްރެޓްސްގެ ޖަލްސާތަކުގައި ރައީސް ނަޝީދު ބައިވެރިވެވަޑައިގަންނަވާނެ: ހަސަން ލަތީފް
"ދަ ޑިމޮކްރެޓްސް"ގެ ނަމުގައި އުފައްދަން މަސައްކަތް ކުރަމުން އަންނަ ސިޔާސީ ޕާޓީން ދެން ބާއްވާ ޖަލްސާ ތަކުގައި ރައީސް މުހައްމަދު ނަޝީދު ބައިވެރިވެވަޑައިގަންނަވާނެ ކަމަށް އެޕާޓީ އުފެއްދުމުގައި އިސްކޮށް ހަރަކާތްތެރި ވަމުން އަންނަ، ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ޙަސަން ލަތީފު ވިދާޅުވެއްޖެއެވެ.
ފުވައްމުލަކު ސިޓީގައި ދަ ޑިމޮކްރަޓްސްއިން ބޭއްވި ކަންމަތީ ބައްދަލުވުމުގައި ވާހަކަ ދައްކަވަމުން ހަސަން ލަތީފް ވިދާޅުވީ އެޕާޓީގައި ރައީސް ނަޝީދު ހިމެނިވަޑައިނުގަންނަވާ ކަމަށް ނުދެކޭ ކަމަށެވެ.
"އަޅުގަނޑުމެންނާއެކުގައި ދެން އޮންނަ ޖަލްސާތަކުގައި ރައީސް ނަޝީދު ވެސް ބައިވެރި ވަޑައިގަންނަވާނެ. މިއީ ރައީސް ނަޝީދު ނުހިމެނޭ ޕާޓީއެއްގެ ގޮތުގައި އަޅުގަނޑު ނުދެކެން" ހަސަން ލަތީފް ވިދާޅުވިއެވެ.
އޭނާ ވިދާޅުވީ ޕާޓީ ރަޖިސްޓަރީ ނުވިޔަސް، ދަތި ކުރިޔަސް އެޕާޓީގެ ކެމްޕޭން ހަރަކާތްތައް ހިނގަމުން ދާނެ ކަމަށެވެ. އަދި އެޕާޓީއަކީ އަސާސްތަކެއްގެ މައްޗަށް އުފައްދާ ޕާޓީއެއް ކަން ފާހަގަކުރައްވައި އޭނާ ވަނީ އެމްޑީޕީއާއި ރައީސް ޞާލިހަށް ފާޑުވިދާޅުވެފައެވެ. މިގޮތުން އެމްޑީޕީގެ ގައުމީ މަޖިލީހުގެ ޖަލްސާތަކަށް ރައީސް ޞާލިހް ވަޑައިނުގަންނަވާ ކަމަށާއި ކަންކަމާއި މަޝްވަރާ ނުކުރައްވާ ކަމަށް އޭނާ ވިދާޅުވިއެވެ. އަދި ޕާޓީގެ ގުނަންތަކުންވެސް ޕާޓީގެ މެމްބަރުންގެ ބައިވެރިވުން ހިމެނޭ ގޮތަށް ކަންކަން ނުކުރާކަމަށާއި އެމަންޒަރުތައް މަޖިލީހުންވެސް އަދި އެމްޑީޕީގެ ގައުމީ މަޖިލީހުން ވެސް ފެންނަމުން އަންނަ ކަމަށް އޭނާ ވިދާޅުވިއެވެ
