ރިޔާސީ އިންތިހާބަށް މިނިކުންނަނީ އެންމެ ބޮޑު ކޯލިޝަނާއިއެކު, އެއް ބުރުން ނެގޭނެ: ރައީސް

އަންނަ ސެޕްޓެމްބަރު މަހު އޮންނަ ރިޔާސީ އިންތިހާބަށް ނިކުންނަވަނީ އެންމެ މެމްބަރުން ގިނަ ކޯލިޝަނާއިއެކު ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެ އެވެ.

Ads by Hajj Corporation

އެމްޑީޕީގެ ރިޔާސީ ކެނޑިޑޭޓުގެ ގޮތުގައި ރައީސް ޞާލިހު އިންތިހާބަށް ނިކުންނަވަނީ އަދާލަތު ޕާޓީއާއި އެމްޑީއޭގެ ތާއީދާއިއެކު އެވެ. ތިން ޕާޓީގެ މެމްބަރުން އެއްކޮށްލައިގެން 77،700 މެމްބަރުން ތިބިކަމަށް ރައީސް ޞާލިހު ވިދާޅުވި އެވެ.

އެމްޑީޕީން ރިޔާސީ އިންތިހާބުގެ ކެމްޕެއިނަށް ތައްޔާރުވުމުގެ ގޮތުން މިއަދު އިއްޒުއްދީން ސްކޫލް ހޯލުގައި ބޭއްވި މޮޓިވޭޝަނަލް ސެޝަންއަށްފަހު ރައީސް ވިދާޅުވީ މި ކޯލިޝަނަކީ މިހާތަނަށް ރާއްޖޭގައި ހެދި އެންމެ ބޮޑު ކޯލިޝަން ކަމަށެވެ.

ރައީސް މިފަދައިން ވިދާޅުވި ނަމަވެސް އެންމެ ބޮޑު ކޯލިޝަނަކާއިއެކު މިހާތަނަށް ރައީސަކު އިންތިހާބަކާއި ކުރިމަތިލީ 2018 ވަނަ އަހަރެވެ. އެއަހަރު ރައީސް ޞާލިހަށް ޕީޕީއެމް ފިޔަވައި އެހެން ހުރިހާ ސިޔާސީ ޕާޓީތަކުން ތާއީދު ކުރި އެވެ.

މިއަހަރުގެ އިންތިހާބުގައި 250،000 އެއްހާ މީހުންނަށް ވޯޓު ލުމުގެ ހައްގު ލިބިގެންވާއިރު ރައީސް ޞާލިހު ވިދާޅުވި އަދަދަށް ވޯޓު ލިބިގެން އިންތިހާބު ކާމިޔާބު ނުވާނެ އެވެ. 2018 ވަނަ އަހަރު ރައީސް އަބްދުﷲ ޔާމީން ގިނިކަންޏާއި ނިކުންނަވައި 98،000 ވޯޓު ހޯއްދެވި އެވެ. އެހެންނަމަވެސް އިންތިހާބު ނާކާމިޔާބުވެވަޑައިގެންނެވީ އެހެން ހުރިހާ ސިޔާސީ ލީޑަރުން އެކުވެ ލައްކައަކަށްވުރެއް ގިނަ ވޯޓު ހޯދައިގެންނެވެ.

މިފަހަރުގެ އިންތިހާބުގައި ގާސިމް އިބްރާހިމް ނިކުންނަވަނީ ޖޭޕީގެ ޓިކެޓުގަ އެވެ. އަދި ރައީސް ޔާމީން ޕީޕީއެމް ޓިކެޓުގައި ނިކުންނަވާނެކަމަށް ބެލެވޭއިރު ޑިމޮކްރެޓްސްގެ ޓިކެޓުގައި ރައީސް މުހައްމަދު ނަޝީދު ނިކުންނަވާނެކަމަށް ބެލެވެ އެވެ. މީގެ އިތުރުން އެމްއެންޕީގެ ޓިކެޓުގައި ކާނަލް މުހައްމަދު ނާޒިމްވެސް ނިކުންނަވާނެކަން އޮތީ އިއުލާން ކޮށްފަ އެވެ.