ރިޔާސީ އިންތިޚާބު 2023 އަށް ކުރިމަތިލުމުގެ ފުރުޞަތު ހުޅުވާލައިފި
ރިޔާސީ އިންތިޚާބު 2023 ގައި ރައީސުލްޖުމްހޫރިއްޔާ ކަމަށް ކުރިމަތިލުމަށް އެދޭ މީހުން އެ މަޤާމަށް ކުރިމަތިލުމުގެ ފުރުސަރު ޖުލައި 23 އިން 7 އޮގަސްޓާ ހަމައަށް ހުޅުވާލައިފިއެވެ.
އިލެކްޝަންސް ކޮމިޝަނުން މިއަދު ނެރުނު އިއުލާނެއްގައި ބުނެފައިވަނީ އިންތިޚާބަށް ކުރިމަތިލުމަށް އެދޭ މީހުން އެކަމަށް އެދޭ ފޯމާއި ތަކެތި ހުށަހަޅާނީ ދަރުބާރުގޭގައި ހުންނަ އިންތިޚާބާބެހޭ މަރުކަޒަށްކަމަށާއި، މި ތަކެތި ބަލައިގަންނާނީ ޖުލައި 23 ވާ އާދީއްތަ ދުވަހުން ފެށިގެން އޮގަސްޓު 7 ވާ ހޯމަ ދުވަހުގެ ނިޔަލަށް ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:00 ން މެންދުރުފަހު 2:00 އަށެވެ. ހުކުރު ދުވަހުގައި ފޯމު ބަލައިގަންނާނީ މެންދުރުފަހު 2:00 ން ހަވީރު 4:00 އަށް ކަމަށެވެ.
ޤާނޫނުއަސާސީގައި ރައީސުލްޖުމްހޫރިއްޔާ އަދި ރައީސުލްޖުމްހޫރިއްޔާގެ ނައިބުކަމަށް ހުށަހަޅާ މީހެއްގައި ހުންނާންޖެހޭ ޝަރުތުތަކުގެ ގޮތުގައި ބަޔާން ކޮށްފައިވަނީ:
(ހ) ދިވެހި މަންމައަކާއި ދިވެހި ބައްޕައަކަށް އުފަން ދިވެހި ރައްޔިތަކު ކަމުގައިވުން އަދި ބޭރު ޤައުމެއްގެ ރައްޔިތަކު ކަމުގައި ނުވުން،
(ށ) މުސްލިމަކު ކަމުގައިވުމާއި، ސުންނަތް ޖަމާއަތުގެ މީހަކު ކަމުގައިވުން،
(ނ) އުމުރުން ތިރީސްފަސް އަހަރުވެފައިވާ މީހަކު ކަމުގައިވުން،
(ރ) ބުއްދި ހަމައަށްހުރި މީހަކު ކަމުގައިވުން،
(ބ) އަދާކުރާންޖެހޭ ސާބިތު ދަރަންޏެއް އޮތް މީހަކު ނަމަ، އެ ދަރަނި ޚަލާސްނުކޮށް ހުރި މީހަކު ކަމުގައި ނުވުން،
(ޅ) ޖިނާއީ ކުށެއް ކުރިކަން ސާބިތުވެގެން ބާރަ މަސްދުވަހަށްވުރެ ދިގު މުއްދަތެއްގެ ހުކުމެއް ކުރެވިފައިވާ މީހަކު ނަމަ، އެ ހުކުމް ތަންފީޒުކޮށް ނިމުނުތާ ނުވަތަ އެ ހުކުމުން ކަނޑައެޅުނު އަދަބު މައާފްކުރެވުނުތާ ތިން އަހަރު ވެފައިވާ މީހަކު ކަމުގައިވުން،
(ކ) މި ބައިގެ (ޅ) ގައި އެހެން އޮތްކަމުގައިވީ ނަމަވެސް އެ މީހަކީ އިސްލާމްދީނުގައި ހައްދު ކަނޑައެޅިފައިވާ ކުށެއް ނުވަތަ މަކަރާ ހީލަތް، ޓެކުން، ޚިޔާނާތުގެ ކުށެއް ކުރިކަން ޝަރީއަތަށް ސާބިތުވެފައިވާ މީހެއްކަމުގައި ނުވުން.
މީގެ އިތުރުން އީސީން ނެރުނު އިއުލާނުގައި އިންތިޚާބުތަކާ ބެހޭ ޤާނޫޏުގައި ބަޔާންކޮށްފައިވާގޮތުން އިންތިޚާބަށް ކުރިމަތިލާ ކޮންމެ ކެންޑިޑޭޓަކު އެމީހަކު އިންތިޚާބަށް ކުރިމަތިލުމުގެ ކުރިން އެމީހާގެ ރަސްމީ އިންތިޚާބީ އޭޖެންޓަކު ކަނޑައަޅަންވާނެކަމަށާއި އެ ކެންޑިޑޭޓެއްގެ ކިބައިގައިވެސް ފުރިހަމަވާންޖެހޭ ޝާރުޠުތައްވެސް ބަޔާންކޮށްފައިވެއެވެ.
ހަމައެއާއެކު އިންތިޚާބުގައި ވާދަކުރައްވަން އެދޭ މީހުން އީސީގެ މެމްބަރެއް ނުވަތަ މުވައްޒަފެއްގެ ކުރިމައްޗަށް ޙާޟިރުވެ ދޭންޖެހޭ މަޢުލޫމާތުތަކާއި ހުށަހަޅަންޖެހޭ ލިޔެކިޔުންތައް އެ އިއުލާނުގައި ފާހަގަކޮށްފައިވާއިރު އީސީން ބުނެފައިވަނީ މެމްބަރަކަށް ހާޟިރުވެވެން ނެތްނަމަ، އެކަން ސިޓީއަކުން ނުވަތަ މެސެޖަކުން ސަބަބާއެކު އެ ކޮމިޝަނަށް އަންގައި އެ ކެންޑިޑޭޓެއްގެ ބަދަލުގައި މީހަކު މެދުވެރިކޮށް އެ މަޢުލޫމާއި ލިޔެކިޔުންތައް ހުށަހެޅިދާނެކަމަށެވެ.
ރިޔާސީ އިންތިޚާބުގައި ކެންޑިޑޭޓަކު އަމިއްލަ ގޮތުން ވާދަކުރާނަމަ، އެމީހަކަށް ތާއީދު އޮތްކަން ހާމަކުރުމުގެ ގޮތުން ހުށަހަޅާ 1500 މީހުންގެ މަޢުލޫމާތު ހިމެނޭ ލިޔުމެއް ހުށަހަޅަންވާނެކަމަށްވެސް އީސީން ބުނެފައިވެއެވެ.
2023 ސެޕްޓެންބަރު 9 ވަނަ ދުވަހު ރިޔާސީ އިންތިޚާބު 2023 ގެ ވޯޓު ނެގުން ހަމަޖައްސާފައިވާއިރު އެކަން ކުރިއަށްދާނީ އެދުވަހުގެ ހެނދުނު 8:00 އިން ހަވީރު 4:00 އަށެވެ. އަދި ވޯޓުގެ ނަތީޖާ ގުނަން ފަށާނީ އެދުވަހު ވޯޓު ނަގާ ނިމޭތާ 30 މިނެޓު ފަހުން ކަމަށާއި އިންތިޚާބުގެ ނަތީޖާ އިއުލާނުކުރުން އޮންނާނީ ސެޕްޓެންބަރު 15 ވާ ހުކުރުދުވަހު ކަމަށް އީސީން މަޢުލޫމާތުދީފައިވެއެވެ.
އިންތިޚާބަށް ކުރިމަތިލުމަށް އެދޭ ފޯމާއި މަޢުލޫމާތުތައް އީސީގެ ރިސެޕްޝަނުން އަދި އެ ކޮމިޝަނުގެ ވެބްސައިޓުންވެސް ޑައުންލޯޑުކުރެވޭނެއެވެ.
