ޑރ. ޝަހީމްއާއި ރައީސް ޑރ. ވަހީދުގެ ތާއީދު އެއްވެސް ކެންޑިޑޭޓަކަށް ނެތް؟

ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ކުރީގެ ރައީސް ޑރ. މުހައްމަދު ވަހީދު ހަސަން މަނިކު ތާއީދު ކުރައްވާ ރިޔާސީ ކެނޑިޑޭޓުގެ ނަން ހާމަކުރުން ލަސްކޮށްފިއެވެ.

Ads by MWSC

އިދިކޮޅު ޕީޕީއެމްގެ އެޑްވައިޒަރުކަން ކުރައްވާ ރައީސް ވަހީދު، އެޕާޓީން އެންޑޯޒްކުރާ ކެނޑިޑޭޓު ޑރ. މުހައްމަދު މުއިއްޒުއަށް ތާއީދު ކުރާކަމުގެ އަޑުތަކެއް މީގެ ކުރިން ފެތުރުނެވެ. އެހެންނަމަވެސް ރައީސް ވަހީދު ވަނީ އެކަން ދޮގު ކުރައްވައި ވަކި ކެނޑިޑޭޓަކަށް އަދި ތާއީދު ނުކުރައްވާކަމަށް ވިދާޅުވެފައެވެ.

2018 ވަނަ އަހަރު ރައީސް ޔާމީންގެ ރަނިންމޭޓެއްގެ ގޮތުގައި ނިކުންނެވި ޑރ. ޝަހީމްވެސް ވަކި ކެނޑިޑޭޓަކަށް ތާއީދު ކުރައްވާކަން އަދި ހާމައެއް ނުކުރައްވަ އެވެ. އެގޮތުން މިމަހުގެ 6 ވަނަ ދުވަހު ޝަހީމް ވަނީ އޭނާގެ ނިންމުން އިއުލާން ކުރައްވާނެކަމަށް ވިދާޅުވެފައެވެ.

އެހެންނަމަވެސް ޝަހީމް އެކަން އިއުލާން ކުރައްވައިފައެއް ނުވެއެވެ.

ރައީސް ވަހީދާއި، ޝަހީމް އަކީވެސް ރައީސް އަބްދުﷲ ޔާމީނަށް ތާއީދު ކުރައްވާ ދެބޭފުޅުންނެވެ. އަދި ޕީޕީއެމްއާއި ގާތް ގުޅުމެއް ބާއްވަމުން އައިސްފައިވާ ދެބޭފުޅުންނެވެ. އެހެންނަމަވެސް ޕީޕީއެމްއިން އެންޑޯޒްކުރި ޕީއެންސީގެ ކެނޑިޑޭޓު ޑރ. މުހައްމަދު މުއިއްޒަށް ތާއީދު ކުރެއްވުމާއިމެދު ދެބޭފުޅުންގެވެސް ހިޔާލު ތަފާތުވުންތަކެއް ހުރިކަން ވަނީ ފާހަގަކުރެވިފައެވެ.

ރައީސް ޔާމީނަށް ރިޔާސީ އިންތިހާބުގައި ވާދަނުކުރެވޭގޮތް ވެއްޖެނަމަ ޕީޕީއެމްގެ ޓިކެޓުގައި ރައީސް ވަހީދު ނިކުމެދާނެކަމުގެ އަޑުތަކެއް މީގެ ކުރިން ފެތުރުނެވެ.

އެކަމަށް އެމަނިކުފާނު ޝައުގުވެރިކަން ފާޅު ކުރައްވައި ކުށުގެ ރެކޯޑު ސާފުކުރަންވެސް ހުށަހެޅިއެވެ.

އެހެންނަމަވެސް ކެނޑިޑެސީ ފޯމު ހުށަހަޅައިފައެއް ނުވެއެވެ. ފަހުން ރައީސް ވަހީދު ވަނީ ޖޭޕީގެ ކެނޑިޑޭޓު ގާސިމް އިބްރާހީމާއިއެކު އިންތިހާބާއި ގުޅޭ މަޝްވަރާތަކެއް ކުރިއަށް ގެންގޮސްފައެވެ.

ޑރ. ޝަހީމްވެސް ޖޭޕީއާއި ގުޅިދާނެކަމުގެ އަޑުތަކެއް ކުރިން ފެތުރުނެވެ. އެގޮތުން ގާސިމްގެ ރަނިންމޭޓުކަން ޑރ. ޝަހީމަށް އަރުވަން އުޅޭކަމުގެ އަޑުތަކެއް ކުރިން ފެތުރުނެވެ. އެހެންނަމަވެސް ގާސިމްގެ ރަނިންމޭޓެއްގެ ގޮތުގައި ނިކުންނެވީ އެހެން ބޭފުޅެކެވެ.

ޑރ. ޝަހީމްއަކީ ރާއްޖޭގެ ދީނީ އިލްމުވެރިންގެ ތެރެއިން އެންމެ ފާހަގަކޮށްލެވޭ، އެންމެ މަގުބޫލު ޝަހުސިއްޔަތެވެ. ސިޔާސީ ދާއިރާގައިވެސް ޝަހީމަކީ ރައްޔިތުން ލޯބިކުރާ ތާއީދު އޮތް ބޭފުޅެކެވެ. އަނެއްކޮޅުން ކުރީގެ ރައީސްކަން ކުރައްވާފައިވާ ޑރ. ވަހީދަކީވެސް ރައްޔިތުންތަކެއް ބަލައިގަންނަ ބޭފުޅެކެވެ.