މަސްވެރިކަމުގެ ދާއިރާއަށް ނާޒިމްގެ ވިސްނުން ހުރި ގޮތް
އަންނަ މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި މޯލްޑިވްސް ނޭޝަނަލް ޕާޓީ (އެމްއެންޕީ) ގެ ފަރާތުން ވާދަކުރައްވާ އެ ޕާޓީގެ ރައީސް އަދި ދަނގެތީ ދާއިރާގެ މެންބަރުކަންވެސް ކުރައްވަމުން ގެންދާ މުޙައްމަދު ނާޒިމް މަސްވެރިކަމަށް ގެންގުޅުއްވާ ސިޔާސަތުތައް އިޢުލާންކުރައްވައިފިއެވެ.
ނާޒިމް ވިދާޅުވީ މުލަކަކީ މަސްވެރި ރަށެއްކަމަށާއި އަދި ޚާއްސަކޮށް ސްޕޯޓްސް ފިޝިން މަޤްބޫލު ރަށެއްކަމުގައި ފާހަގަކުރެއްވޭކަމަށެވެ. މިކަން ތަރައްޤީ ކުރުމަށް ރަށުގެ ޒުވާނުން ބޭނުންވާކަން އިނގިވަޑައިގަންނަވާކަމަށާއި މި ދާއިރާއަކީ ކުޑަ ޚަރަދަކުންވެސް ކުރިއެރުވޭނެ ދާއިރާއެއްކަން ޤަބޫލުކުރައްވާކަމަށެވެ.
"ޒުވާނުން އެދޭ ގޮތަށް، ޖިގިންނާއި އަދި މަސްވެރިކަން ކުރުމަށްޓަކައި ބޭނުންވާ އުޅަނދު އަޅުގަނޑުމެން ލުއި ގޮތަކަށް އެ ޒުވާނުންނަށް ހޯދާދޭނަން"
"ޔަންމާ އިންޖީނު އެމްޓީސީސީން އަޅާ އުޞޫލުން، އަޅުގަނޑުގެ ސަރުކާރެއްގައި އާރްއެސްޑަބްލިއު ނުވަތަ ފިނިކުރި ނިޒާމް، ދޯނިފަހަރުގައި ދިގު މުއްދަތަކަށް ފައިސާ ދައްކާ ޚަލާސްކުރާގޮތަށް އަޅައިދޭނަން"
ނާޒިމް ފާހަގަކުރެއްވި ގޮތުގައި މަސްވެރިކަމަކީ ރާއްޖޭގައި ވަރަށް ފުޅާ ދާއިރާއެއްގައި ކުރެވޭނެ ފައިދާކުރުވަނިވި މަސައްކަތެކެވެ. ނަމަވެސް ކުރީގެ ސަރުކާރުތަކުގެ އިހުމާލުން މި ދާއިރާވަނީ ވަރަށް ބޮޑަށް ހަލާކުވެފައިކަމަށާއި، ޒުވާނުން މި ދާއިރާއާ ވަރަށް ދުރުވެއްޖެކަމަށެވެ.
ނާޒިމްގެ ވިދާޅުވީ އެމަނިކުފާނުގެ ވިސްނުމަކީ ޕްރައިވަޓައިޒް ކުރުންކަމަށާއި، ރައްޔިތުން ކުރާ މަސައްކަތައް ހިތްވަރުދީ އެކަން ކުރިއެރުވުން ކަމަށެވެ.
"އެ އައިސްޕްލާންޓުގައި އައިސް ވިއްކާ މީހާއަށް ރަނގަޅު ގޮތަކަށް ހަމަޖައްސައިދެވުނީމާ، އޭނަ އެ ވިއްކާ އައިސްއިން ނަފާ ލިބޭ، އަދި އޭނާގެ އާއިލާއަށާއި މިރަށުގެ ރައްޔިތުންނަށް ލިބިގެންދާނެ"
ނާޒިމް ވެރިކަމަށް ވަޑައިގަންނަގަވަނީ މަސްވެރިކަމަށް ބޮޑު އިންޤިލާބެއް ގެންނަންކަމަށް ވިދާޅުވިއެވެ.
"މަސްވެރިންނަށް ބޭނުންވާ ދޯނިފަހަރު ބަނުމުގެ ޚިޔާލު އަޅުގަނޑުމެން ގެންގުޅެން، މި ދޯނިތަކަކީ ޒަމާނީ ފެންވަރަށް ބަނދެވިފައި ހުންނަ ދޯނުތަކަކަށް އަޅުގަނޑުމެން ހަދާނަން، އަދި މި ދޯނިތައް ހެދޭ ފަރާތަކަށް ފައިސާ ދޫކޮށް، ދައްކަންޖެހޭނީ ދިގު މުއްދަތަކަށް"
އަދި ވެރިކަމަށް ވަޑައިގަންނަވާތާ ދޮޅު އަހަރުގެ ތެރޭގައި މި މަސް ދޯނިތަށް ޒަމާނީ ފެންވަރަށް ހަދައި ރައްޔިތުންނަށް ލިބޭނެކަމަށް ވިދާޅުވިއެވެ.
"އެ އައިސްޕްލާންޓުގައި އައިސް ވިއްކާ މީހާއަށް ރަނގަޅު ގޮތަކަށް ހަމަޖައްސައިދެވުނީމާ، އޭނަ އެ ވިއްކާ އައިސްއިން ނަފާ ލިބޭ، އަދި އޭނާގެ އާއިލާއަށާއި މިރަށުގެ ރައްޔިތުންނަށް ލިބިގެންދާނެ"
އިތުރަށް ވާހަކަ ދައްކަވަމުން ނާޒިމް ވިދާޅުވީ، މިހާރު ބޭނުންކުރަމުންދާ މަސްދޯނިތަކަށް ދިމާވާ އެންމެ ބޮޑު މައްސަލައެއްގެ ގޮތުގައި ފާހަގަކުރެވިފައިވަނީ އެ ދޯނިތަކުގައި ފިނިކުރެވޭނެ ނިޒާމް ނެތުންކަމަށެވެ. އަދި އެމަނިކުފާނުގެ ވެރިކަމެއްގައި ފިނިކުރާ ނިޒާމް ހަރުކުރެވޭނެ އިންތިޒާމް ހަމަޖައްސަވައި ދެއްވާނެކަމަށް ނާޒިމް ވިދާޅުވިއެވެ.
"ޔަންމާ އިންޖީނު އެމްޓީސީސީން އަޅާ އުޞޫލުން، އަޅުގަނޑުގެ ސަރުކާރެއްގައި އާރްއެސްޑަބްލިއު ނުވަތަ ފިނިކުރި ނިޒާމް، ދޯނިފަހަރުގައި ދިގު މުއްދަތަކަށް ފައިސާ ދައްކާ ޚަލާސްކުރާގޮތަށް އަޅައިދޭނަން"
މި ޖަލްސާގައި ވާހަކަދައްކަވަމުން ނާޒިމް ވިދާޅުވީ އެމަނިކުފާނުގެ ވެރިކަމެއްގައި މަސްވެރިންނަށް ހެޔޮ ބަދަލެއް ގެނެސްދެއްވާނެކަމަށާއި މަސް ބަންދުކުރުމުގެ ދާއިރާ ފުޅާކުރެވިގެންދާނެކަމަށެވެ.
މީގެ އިތުރުން ނާޒިމް ވަނީ އެމަނިކުފާނުގެ ސަރުކާރެއްގައި ކުދި އަދި މެދުފަންތީގެ ވިޔަފާރިތަށް ކުރިއެރުވުމަށްޓަކައި ލުއިފަސޭހަ ނިޒާމަކުން ފައިސާ ލިބޭނެ އިންތިޒާމް ހަމަޖައްސައިދެއްވާނެކަމަށް ވިދާޅުވެފައެވެ.
