ޤައުމު ތަރައްގީކުރަން ޕީޕީއެމަކީ އެއްވެސް ކަމެއް ކުރި ބައެއް ނޫން، އެއްވެސް ކަމެއް ނުވެސް ކުރާނެ: އަސްލަމް

ޕީޕީއެމްއަކީ ޤައުމު ތަރައްޤީ ކުރަން އެއްވެސް ކަމެއް ކުރާ ބައެއް ނޫންކަމަށާއި ވޭތުވެދިޔަ ތަނުގައިވެސް އެއްކަމެއްވެސް ކުރެވުނު ބައެއް ނޫންކަމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުޙައްމަދު ޞާލިޙުގެ ރަނިންމޭޓް މުޙައްމަދު އަސްލަމް މިއަދު ވިދާޅުވެއްޖެއެވެ.

Ads by STELCO

ކުރިއަށް ރިޔާސީ އިންތިހާބުގެ ކެމްޕެއިނަށް ފ. ބިލެއްދުއަށް ވަޑައިގެން އަސްލަމް ވިދާޅުވީ ޕީޕީއެމަކީ ރާއްޖެ ތަރައްގީ ކުރެވޭނެ ބައެއް ނޫން ކަމަށާއި އެހެންކަމުން މި ސަރުކާރަށް ދެވަނަ ފުރުސަތެއް ރައްޔިތުން ދޭން ޖެހޭ ކަމަށެވެ.

އަދި މިސަރުކާރުން މަސައްކަތް ކުރަނީ އެއްވެސް ބަޔަކާ ޒާތީކަމެއް ނެތި ރާއްޖެއަށް ހެޔޮ ބަދަލު ގެނައުމަށް ކަމަށްވެސް އަސްލަމް ވިދާޅުވިއެވެ.

"ޕީޕީއެމަކީ އެއްކަމެއް ވެސް ކުރާބައެއް ނޫން. އެއްކަމެއް ވެސް ކުރެވުނު ބައެއް ނޫން. އަދި އެ މީހުން އައިސް ބުނާނެ ކަމަކު ނުދޭ ފެނާއި ނަރުދަމާ އަޅާފައި އޮތްގޮތެއް. ތިތާކު ނޫނޭ މިތަނުގައޭ ކުރަން ޖެހޭނީ. ބަނދަރުގެ ތި ތަންކޮޅު ހިއްކާގޮތް ވެސް ކަމަކު ނުދޭ. ނޫނީ ތި މަސައްކަތް ކުރަން ދީފައި ހުރި ކުންފުނި ވެސް ކަމަކު ނުދޭ." އަސްލަމް ވިދާޅުވިއެވެ.

މީގެ އިތުރުން، އެމްޑީޕީއަކީ އަބަދުވެސް ތަސައްވަރަކާއެކު މަސައްކަތް ކުރާ އަދި ރާއްޖެއަށް ބޮޑު ބަދަލެއް ގެނެސްދޭ ޕާޓީއެއް ކަމަށާއި ޕާޓީއިން ބަޔަކު ވަކިވެގެން ދިޔަ ނަމަވެސް އެމްޑީޕީގެ ވިސްނުމާއި ފިކުރަކަށް އަދި ބަދަލެއް އައިސްފައި ނުވާ ކަމަށް ވެސް އަސްލަމް ވިދާޅުވިއެވެ.

"އެމްޑީޕީއިން ފުރަތަމަ އެކުލަވާލި މެނިފެސްޓޯގައި ވެސް ބެލީ އޯގާތެރި ބޭސްފަރުވާއަށް ސަލާން ނުޖަހާ ކަންތައްތަކެއް ގެނެސްދޭން. މިއަދުވެސް އެމްޑީޕީގެ މި ކޯލިޝަންއިން ވެސް ކުރެވިފައި ހުރީ އެ މަސައްކަތް. އަދި ކުރިއަށް އޮތް ފަސް އަހަރަށް އެކުލަވާލި މެނިފެސްޓޯގައި ވެސް ހުރީ ހަމަ އެ ވާހަކަ،" އަސްލަމް ވިދާޅުވިއެވެ.

އެމްޑީޕީއާއި ސަރުކާރަށް އެތައް ތުހުމަތެއްކޮށް އެތައް އިލްޒާމެއް އެޅުވުމަށްފަހު ޕާޓީ ދޫކޮށް ދިޔަ މީހުން އެނބުރި ޕާޓީއަށް އައުމަށް އެދިވަޑައިގަންނަވަމުން އަސްލަމް ވިދާޅުވީ އެމްޑީޕީއިން މިހާރު ވެސް ކުރަމުން އަންނަނީ ކުރިއެކޭއެއްގޮތަށް ގައުމު އިސްލާހުކޮށް ތަރައްގީ ކުރުމުގެ މަސައްކަތް ކަމަށާއި ދެވަނަ ބުރަކަށް ގޮސް އެހެން ޕާޓީތަކާއި އެކު އަނެއްކާ ކޯލިޝަން ހަދައި ބައި އަޅަން ޖެހޭގޮތަށް ކަންތައްނުކޮށް ފުރަތަމަ ބުރުން މިސަރުކާރަށް އިތުރު ދައުރެއް ދިނުމަށެވެ.

އަދި ބިލެއްދޫގެ ތަރައްގީއަށް ވޭތުވެދިޔަ ސަރުކާރުތަކުން ނުކުރާ ވަރަށް މަސައްކަތް ކޮށްދީފައިވަނީ މި ސަރުކާރުން ކަމަށާއި އެގޮތުން ބިލެއްދުއަށް އެކަނިވެސް މިސަރުކާރުން 74 މިލިއަން ރުފިޔާ މިހާތަނަށް ހަރަދުކޮށްފައިވާ ކަމަށާއި އޭގެ އިތުރަށް ތަރައްގީ ގެންނަން ބޭނުންވާ ކަމަށާއި އެހެންވެ އެ ފުރުސަތު ދެއްވުމަށް އެދޭ ކަމަށް އަސްލަމް ވިދާޅުވިއެވެ.