ދަރަނިވެރިވެފަ އޮތް ދައުލަތަކާ ޤާސިމް ހަވާލުވެފަ ފުރުއްވާނެ ނުވަތަ ބޮޑު ކުރައްވާނެ ޖީބެއް ނެތް: ނަހުލާ
ރިޔާސީ އިންތިޚާބުގެ ޖުމްހޫރީ ޕާޓީން ވާދަކުރައްވާ އެ ޕާޓީގެ ލީޑަރު ޤާސިމް އިބްރާހިމްއަކީ މިވޭތުވެދިޔަ 40 އަހަރުގައި އެމަނިކުފާނުގެ އަމިއްލަ ޖީބުން 60 އިންސައްތަ ނިކަމެތިންނަށް ހޭދަކުރެއްވި ބޭފުޅަކަށްވާއިރު، ދަރަނިވެރިވެފަ އޮތް ދައުލަތަކާ ޤާސިމް ހަވާލުވެފަ ފުރުއްވާނެ ނުވަތަ ބޮޑު ކުރައްވާނެ ޖީބެއް ނެތްކަމަށް ގާސިމްގެ އަނބިކަނބަލުން އަދި ޓްރާންސްޕޯޓް މިނިސްޓަރު ޢާއިޝަތު ނަހުލާ ވިދާޅުވެއްޖެއެވެ.
ޖުމްހޫރީ ޕާޓީން "ހާސްކަނޑާލާާ ހަމަޖެހޭނެ" ޝިޢާރުގެ ދަށުން ކުރިއަށްގެންދިޔަ ޕްރޮގްރާމެއްގައި ވާހަކަފުޅު ދައްކަވަމުން ނަހުލާ ވަނީ ރިޔާސީ އިންތިހާބުގައި ޤާސިމް ވާދަކުރައްވަން ނިންމުމާއިއެކު އެކަމަށް ފާޑުކިޔައި ޤާސިމް ވެރިކަމަށް ވަޑައިގެންފިނަމަ އެމަނިކުފާނު ހިންގަމުންދާ އަމިއްލަ ވިޔަފާރިތައް ފުޅާކުރައްވާ އަމިއްލަ ޖީބު ބޮޑުކުރައްވާނެކަމަށް ދައްކާ ވާހަކަތަކަށް ރައްދުދެއްވާފައެވެ.
ޤާސިމްއަކީ އަމިއްލަ މަސައްކަތުން އާމްދަނީ އިތުރު ކުރުމަށް ގިނަ ދާއިރާ ތަކަކުން ވިޔަފާރިތައް ހިންގަވަމުން އަންނަ ބޭފުޅަކަށްވާއިރު، އެ ގޮތުން އެކި ރިސޯޓުތަކާއި އެކި އެއާލައިންތައް އެމަނިކުފާނު ހިންގަވައެވެ. އަދި ވިލާ ކުންފުނީގެ ފަރާތުން އެކި ކާބޯތަކެއްޗާ، ގެދޮރު އިމާރާތް ކުރުމުގެ ސާމާނު ވިއްކުމުގެ ވިޔަފާރިތައް ހިންގަމުންދެއެވެ.
ނަހުލާ ވިދާޅުވީ، ޤާސިމްގެ އަމިއްލަ ވިޔަފާރި ފެއްޓެވިތާ މިހާރު ގާތްގަނޑަކަށް 40 އަހަރު ވެގެން ގޮސްފައިވާއިރު، އެވީހާ ދުވަހެއްގައި، ވިޔަފާރި ތަކުން ލިބުނު ނަފާގެ ގާތްގަނޑަކަށް 60 އިންސައްތަ އެމަނިކުފާނު ހޭދަ ކުރެއްވީ ރާއްޖޭގެ ނިކަމެތިންނަށް ކަމަށެވެ. އެހެންކަމުން ދަރަނިވެރިވެފަ އޮތް ދައުލަތަކާ އެމަނިކުފާނު ހަވާލުވެފަ ފުރުއްވާނެ ނުވަތަ ބޮޑު ކުރައްވާނެ ޖީބެއް ނެތް ކަމަށް ނަހުލާ ވިދާޅުވިއެވެ.
"ވޭތުވެދިޔަ 40 އަހަރު، ކުރި މަސައްކަތުން، ހޯދި އާމްދަނީއިން، 60 ޕަސެންޓަށް ވުރެ ގިނައިން މިގައުމުގެ ނިކަމެތި ރައްޔިތުންނަށްޓަކައި އަމިއްލަ ޖީބުން ހޭދަކުރެއްވި ބޭފުޅެއް، ސަރުކާރަށް އައިއްސަ، އުމުރުފުޅުން 74 އަހަރުގައި، އަދި ދަރަނިވެރިވެފައި އޮތް ދައުލަތަކާއި ހަވާލު ވެފައި، ކޮން ޖީބެއްތޯ އެ ބޭފުޅާ ފުރަން އުޅޭނީ. ނޫނީ ބޮޑު ކުރަން އުޅޭނީ. އެހެން އަޅުގަނޑުގެ ހިތަށް އަރަނީ" ނަހުލާ ވިދާޅުވިއެވެ.
މީގެ އިތުރުން ރައްޔިތުން ފުންކޮށް ވިސްނާލައިފި ނަމަ އެ ހަގީގަތް ވަރަށް ސާފުކޮށް އެނގޭނެ ކަމަށާއި ކުރިއަށް އޮތް ފަސް އަހަރުގައި، ޤާސިމު ވެރިކަމަށް އިންތިޚާބު ވެވަޑައިގެންފި ނަމަ، އެމަނިކުފާނު ވަރަށް ބުރަކޮށް މަސައްކަތް ކުރައްވަން ޖެހޭނެ ކަމަށްވެސް ނަހުލާ ފާހަގަކުރެއްވި އެވެ.
