ކަންކަން އިސްލާހު ކުރުމުން ރައީސް ޞާލިޙަށް މޮޅުވެވޭނެ: ޝަރީފް

ކަންކަން އިސްލާހު ކުރުމުން ދެވަނަ ބުރުން ރައީސް ޞާލިޙަށް މޮޅުވާނެ ކަމަށް ރައްޔިތުންގެ މަޖިލިހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް މިރޭ ވިދާޅުވެއްޖެއެވެ.
ރިޔާސީ އިންތިހާބުގެ ނަޖީއާ ގުޅޭގޮތުން ކުރެއްވި ޓްވީޓޭއްގައި ޝަރީފް ވިދާޅުވީ ކޮންމެ ވެސް ސަބަބަކާ ހުރެ ގިނަ އަދަދެއްގެ މީހުން ވޯޓު ލާން ނުނިކުންނަ ކަމަށެވެ. އެކަން ކަން ބަލައި އިސްލާހު ކުރުމުން އެމްޑީޕީ އަށް ދެވަނަ ބުރު ކާމިޔާބު ކުރެވޭނެ ކަމަށް ޝަރީފް ވިދާޅުވިއެވެ.
އަދި ކުރީގެ ރައީސުންގެ ސައިޒު މިހާރު މާ ބޮޑަށް ވެސް ސާފުވެއްޖެ ކަމަށާއި 2013ގެ ރިޔާސީ އިންތިހާބުގައި ކުރީގެ ރައީސް ޑރ. މުހައްމަދު ވަހީދަށް 5 އިންސައްތަ ވޯޓު ލިބިވަޑައިގެންނެވި އިރު، މި އިންތިހާބުގައި ނަޝީދަށް (ޑިމޮކްރެޓުންނަށް) ލިބިވަޑައިގަތީ 7 އިންސައްތަ ވޯޓު ކަމަށް ޝަރީފް ވިދާޅުވިއެވެ.
އިންތިހާބުގެ ވަގުތީ ނަތީޖާ ދައްކާ ގޮތުން ރައީސް ޞާލިޙަށް ލިބިވަޑައިގަތީ 84،805 ވޯޓެވެ. އެއީ 39.04 އިންސައްތައެވެ. އަދި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ލިބިވަޑައިގަތީ 100،342 ވޯޓެވެ. އެއީ 46.19 އިންސައްތައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.