ދެވަނަ ބުރުގައި އެމްޑީޕީއާއެކު ރައީސް ނަޝީދު ނުހުންނަވާނެ އެއްވެސް ގޮތެއް ނުފެނޭ: ފައްޔާޒް

ރިޔާސީ އިންތިޚާބުގެ ދެވަނަ ބުރުގައި އެމްޑީޕީއާއެކު ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ނުހުންނަވާނެ މަންޒަރެއް ފެނިވަޑައިނުގަންނަވާ ކަމަށް އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއިލް މިއަދު ވިދާޅުވެއްޖެއެވެ.
އެމްޑީޕީގެ ގައުމީ މަޖިލީހުގެ ނުރަސްމީ ބައްދަލުވުމެއް މިއަދު ބާއްވާފައިވާއިރު، އެ ބައްދަލުވުމާ ގުޅޭ ގޮތުން އޮންލައިން ނޫހަކަށް މައުލޫމާތު ދެއްވަމުން ފައްޔާޒު ވިދާޅުވީ އިންތިހާބުގެ ދެވަނަ ބުރުގައި ގުޅިގެން މަސައްކަތް ކުރުމަށް އެމްޑީޕީން ހުރިހާ ސިޔާސީ ޕާޓީތަކާ އެކު މަޝްވަރާ ކުރަމުން އަންނަ ކަމަށެވެ.
ރައީސް ނަޝީދުގެ ވިސްނުފުޅު ހުރީ ކިހިނެތްތޯ ކުރެއްވި ސުވާލަށް ފައްޔާޒް ވިދާޅުވީ ވަކި އެއްޗެއް ދަންނަވާލަން އެނގިވަޑއިގަންނަވާނީ މަޝްވަރާތައް ކުރިއަށް ދާ ގޮތަކުން ކަމަށް ވިދާޅުވެފައިވާކަމަށާއި ނަމަވެސް ދެވަނަ ބުރުގައި ރައީސް ނަޝީދާ އެކު އެމްޑީޕީ ނުފެންނަ ގޮތެއް ފެނިވަޑައިނުގަންނަވާ ކަމަށް ފައްޔާޒް ވިދާޅުވިކަމަށް މައުލޫމާތު ލިބެއެވެ.
"އަޅުގަނޑަކަށް ނުފެނޭ [ދެވަނަ ބުރުގައި ނަޝީދާއެކު] ނުފެންނާނެ އެއްވެސް ގޮތެއް،" ފައްޔާޒް ވިދާޅުވި މއެވެ.
އިންތިޚާބުގެ ފުރަތަމަ ބުރުގައި އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުއަށް ގިނަ ވޯޓުތަކެއް މަދުވީ މީހުން ވޯޓުލާން ނުނިކުތުމުންކަމަށާއި އެ މައްސަލަ ހައްލު ކުރެވޭނެ ގޮތްތަކާ ބެހޭ ގޮތުން މަޝްވަރާ ކޮށްފައިވާ ކަމަށް ފައްޔާޒް ވިދާޅުވިއެވެ.
"ފުދޭ ވަރަކަށް ޔަގީން ކަމެއް އެބައޮތް ދެވަނަ ބުރު ނެގޭނެ ކަމަށް. އަދި އެޑްވާންޓޭޖް އޮތީ އަޅުގަނޑުމެންނަށް ކަމަށް ގަބޫލު ކުރަނީ،" ފައްޔާޒް ވިދާޅުވިއެވެ.
އެމްޑީޕީން ދަ ޑިމޮކްރެޓްސްއާ ގުޅުމަށް މަޝްވަރާތައް ކުރަމުން އަންނަ އިރު އެ ޕާޓީން ވަނީ ނަޝީދާއި މަޖިލީހުގެ ނައިބު ރައީސް އީވާގެ އިތުބާރު ނެތްކަމުގެ މައްސަލަ ކުއްލި ގޮތަކަށް މިއަދު އަނބުރާ ގެންގޮސްފައެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.