އަދުރޭ، ރައީސަށް: ގައުމެއް، ކޮވިޑެއް މެނޭޖެއް ނުކުރެވުނު، ދެން އަވަހަށް އިސްތިއުފާ ދެއްވާ!
މި ސަރުކާރަށް ގައުމާއި ކޮވިޑް-19ގެ ކަންކަން ވެސް މެނޭޖް ނުކުރެވުނު ކަމަށް ވިދާޅުވެ ރައީސް އިބްރާހިމް މުހައްމަދު ސޯލިހު މަގާމުން އިސްތިއުފާ ދެއްވުމަށް އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ ގޮވާލައްވައިފި އެވެ.
އަދުރޭ ކުރެއްވި ޓްވީޓެއްގައި ވިދާޅުވީ މި ސަރުކާރަށް ގައުމު މެނޭޖެއް ނުކުރެވުނު ކަމަށާއި ކޮވިޑް ވެސް އަދި އިގްތިޞާދު ވެސް މެނޭޖެއް ނުކުރެވުނު ކަމަށެވެ.
"ކުރާނެ ކަމެއް ހަދާނެ ގޮތެއް، ބުނާނެ ބަހެއް، އުޅޭނެ ގޮތެއް އަދި ކިއެއް ވާއެއް ނުވާ އެއްވެސް ރައީސް ސޯލިހާއި ރައީސް ނަޝީދަކަށް ވަޒީރަކަށް ވެސް ނޭނގުނު، ދެން ރަނގަޅުވާނީ އަވަހަށް އިސްތިޢުފާ ދިނުން" އަދުރޭ ވިދާޅުވިއެވެ.
ރާއްޖޭގައި ކޮވިޑްގެ ހާލަތު އަނެއްކާ ވެސް ވަރަށް ބޮޑަށް ވަނީ ގޯސްވެފަ އެވެ. ކޮންމެ ދުވަހަކު ވެސް އެތައް ބަޔަކު ބައްޔަށް ފައްސިވަމުން ދާއިރު ސަރުކާރުން ކޮވިޑް ކޮންޓްރޯލް ކުރަން އަޅާފައިވާ ފިޔަވަޅުތަކުގެ އެންމެ އެދެވޭ ނަތީޖާއެއް ނުފެނި ގިނަ ބަޔަކު އަންނަނީ އެ ފިޔަވަޅުތަކަށް ފާޑުކިޔަމުންނެވެ.
