ބޯހިޔާވާހިކަމުގެ ދެވަނަ ފިޔަވަހީގެ ދަށުން ގޯއްޗާއި ފްލެޓަށް ކުރިމަތިލާން ހުޅުވާލައިފި
މި ސަރުކާރުގެ ބޯހިޔާވާހިކަމުގެ މަޝްރޫޢުގެ ދެވަނަ ފިޔަވަހީގެ ދަށުން ގޯއްޗާއި ފްލެޓަށް ކުރިމަތިލާން ހުޅުވާލައިފިއެވެ.
ހައުސިން މިނިސްޓްރީގެ ސްޓޭޓް މިނިސްޓަރު އަދި ފްލެޓާއި ގޯތި ކޮމިޓީގެ ޗެއާމަން، އަކްރަމް ކަމާލުއްދީން ވިދާޅުވީ ދެވަނަ ފިޔަވަހީގެ ދަށުން ހުޅުވާލާފައިވަނީ ހިއްކާފައިވާ އުތުރު ތިލަފަޅުންނާއި ހުޅުމާލެ ދެވަނަ ފިޔަވަހިންނެވެ.
އަކްރަމް ވަނީ ފުރަތަމަ ބުރުގައިވެސް ފޯމު ހުށަހެޅިގޮތަށް މިފަހަރުވެސް ފްލެޓާއި ގޯއްޗަށް އެދުމަށް ޕޯޓަލް މެދުވެރިކޮށް ފޯމު ހުށަހެޅުމަށް ވިދާޅުވެފައެވެ. ދެވަނަ ބުރުގައި ދިނުމަށް ނިންމާފައިވަނީ ހުޅުމާލެ އިން 8،000 އަށް ވުރެން ގިނަ ފްލެޓާއި 4،500 އަށް ވުރެން ގިނަ ގޯއްޗެވެ.
ސަރުކާރުން ދެވަނަ ފިޔަވަހީގައި ގޯތި ދޫކުރުމަށް ނިންމާފައިވާ އެއް ސަރަޙައްދަކީ އަސްކަރީ މަރުކަޒެއްގެ ގޮތުގައި ތަރައްގީކުރަމުންދާ ކަމުގެ ތުހުމަތުކުރަމުންދާ އުތުރު ތިލަފަޅެވެ. މި ފަޅަކީ ކޯސްުގާޑުގެ އުޅަނދުތައް މަރާމާތުކުރުމަށް ބަނދަރެއްގެ ގޮތުގައި ތަރައްޤީކުރުމަށް ނިންމާފައިވާ ތަނެކެވެ. މިހާތަނަށް 15 ހެކްޓަރު ބިން ހިއްކާފައިވާއިރު މުޅި މަޝްރޫޢު ނިންމަން ރާވާފައި އޮތީ 2025 ވަނަ އަހަރުގެ ޖަނަވަރީއަށެވެ.
މި ސްކީމްގެ ދަށުން ގޯއްޗަށް އެދުމުގެ ޝަރުތުތަކަކީ ދިވެހި ރައްޔިތެއް ކަމުގައި ވުމާއި، އުމުރުން 18 އަހަރުވުމުގެ އިތުރުން ބިންވެރިޔާ ސްކީމުން މީގެ ކުރިން ގޯއްޗެއް ލިބިފައި ނުވުމެވެ. އަދި ކުރިން ފްލެޓެއް ލިބިފައި އޮތަސް މި ފިޔަވަހިން ގޯއްޗަށް އެދެވޭނެ ކަމަށް ސްޓޭޓް މިނިސްޓަރު އަކްރަމް ވިދާޅުވިއެވެ.
މިފަހަރުގެ ސްކީމްގައި މާލޭގައި ދިރިއުޅޭތާ 20 އަހަރު ވެފައިވާ އެހެން ރަށްރަށުގެ މީހުންނަށްވެސް ގޯއްޗަށް އެދުމުގެ ފުރުޞަތު ވަނީ ހުޅުވާލާފައެވެ.
ބިންވެރިޔާ ސްކީމްގެ އުޞޫލުގައިވާގޮތުން ވަކިން ކުރިމަތިލާނަމަ ލިބޭނީ 1250 އަކަފޫޓެވެ. ނަމަވެސް ޖޮއިންޓްކޮށް ކުރިމަތިލާނަމަ ކޮންމެ މީހަކަށް 400 އަކަފޫޓު ގޯތީގެ ބޮޑުމިނަށް އިތުރުކުރެވޭނެއެވެ. ޖޮއިންޓް އެޕްލިކޭޝަންގައި ހަތް މީހުންނަށް ވުރެން ގިނައިން ތިބި ނަމަ 4،000 އަކަފޫޓް ލިބޭނެއެވެ.
ގެދޮރުވެރިޔާ ސްކީމްގެ ދަށުން ފްލެޓް ދޫކުރުމުގައި މާލޭގައި ދިރިއުޅޭތާ 15 އަހަރުވީ ދިވެހި ރައްޔިތުންނަށް މި ފްލެޓަށް ކުރިމަތިލެވޭ ގޮތަށް ވަނީ ހަމަޖައްސާފައެވެ. އަދި ޖޮއިންޓްކޮށް ކުރިމަތިލުމުގެ ފުރުސަތުވެސް އޮތީ ހުޅުވާލައިފައެވެ.
މި ސްކީމްގެ ދަށުން ފްލެޓަށް އެދުމުގެ ޝަރުތުތަކަކީ އަމިއްލަ ފަރާތަކުން ވިއްކާފައިވާ ފްލެޓެއް ގަނެފައި ނުވުމާއި މަހަކަށް ޖެހޭ އާމްދަނީ 60،000 ރުފިޔާ އަށް ވުރެން އިތުރުނުވުމެވެ.
ބޯހިޔާވަހިކަމުގެ މަޝްރޫޢުގެ ދަށުން ބިންވެރިޔާ އަދި ގެދޮރުވެރިޔާ ސްކީމްގެ ދަށުން ބޯހިޔާވަހިކަމަށް ހުޅުވައިލުމުން، ކުރިމަތިލީ މީހުންގެ ތެރެއިން ޝަރުތުހަމަވާ އެންމެނަށް ގޯއްޗާއި ފްލެޓް ދަނީ ޙަވާލުކުރަމުންނެވެ. މި ހަފްތާގައި ގިރާވަރު ފަޅުން ގޯތި ލިބުނު މީހުންނަށް ގޯތި ޙަވާލުކުރާނެކަމަށް ހައުސިން މިނިސްޓްރީން މަޢުލޫމާތުދީފައިވެއެވެ.
ސަރުކާރުން ދަނީ މި ދައުރު ނިމުމުގެ ކުރިން ހުޅުމާލެ ދެވަނަ ފިޔަވަހީގައި އަލަށް އިމާރާތްކުރަމުންދާ ފްލެޓުތަކުގައި މީހުން ދިރިއުޅެން ފަށާނެކަމަށް ބުނަމުންނެވެ.
ސާބަހޭ އިބޫ. ތިވަރެއް ނެތް ހަމަ.