މާލޭގެ ކޯޓު ކޮމްޕްލެކްސްގެ ބިންގާ އަޅައިފި
ހުޅުމާލޭގައި 14 ފަންގިފިލާއަށް އިމާރާތްކުރާ މާލޭ ކޯޓު ކޮމްޕްލެކްސްގެ ބިންގާ މިއަދު އަޅައިފިއެވެ.

ހުޅުމާލޭގައި ތަރައްޤީކުރާ މާލޭގެ ކޯޓު ކޮމްޕްލެކްސްގެ ބިންގާ މިއަދު ވަނީ އަޅާފައެވެ.
މި އިމާރާތުގެ ބިންގާ އަޅުއްވައިދެއްވީ އުއްތަމަ ފަނޑިޔާރު އަލްއުސްތާޛު ޢަބްދުލްޣަނީ މުޙައްމަދެވެ. މި ރަސްމިއްޔާތުގައި ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބާއި ބަންޑާރަނައިބު އަޙްމަދު އުޝާމް ބައިވެރިވެވަޑައިގެންނެވިއެވެ.
މި މަޝްރޫޢަކީ 699.86 މިލިއަން ރުފިޔާއަށް 720 ދުވަހުގެ ތެރޭގައި ނިންމުމަށް މިދިޔަ ޖުލައި މަހު އެމްޓީސީސީއާ ހަވާލުކޮށްފައިވާ މަސައްކަތެކެވެ. 29،490 އަކަފޫޓުގެ ބިމެއްގައި އިމާރާތްކުރާ މި ކޮމްޕްލެކްސްގައި 14 ފަންގިފިލާ ހުންނާނެއެވެ.
މި އިމާރާތުގައި ސިވިލް ކޯޓާއި، ކްރިމިނަލް ކޯޓާއި، ޑްރަގް ކޯޓާއި، ޖުވެނައިލް ކޯޓާއި، ފެމިލީ ކޯޓު އަދި ހައި ކޯޓުގެ އިތުރުން ޑިޕާޓްމަންޓް އޮފް ޖުޑީޝިއަލް އެޑްމިނިސްޓްރޭޝަން (ޑީޖޭއޭ) ހިންގުމަށް ވަނީ ހަމަޖެހިފައެވެ. މި މަޝްރޫޢު ނިމުމުން ޝަރުޢީ ދާއިރާއަށް ދިމާވެފައިވާ ޖާގައިގެ ދަތިކަމަށް ބޮޑު ހައްލެއް ލިބި، ޚިދުމަތް ހޯދާ ރައްޔިތުންނަށް ބޮޑެތި ފަސޭހަތަކެއް ލިބޭނެ ކަމަށް ސަރުކާރުން ބުނެއެވެ.
ކޯޓުތަކުގެ ޖާގައިގެ މައްސަލަ ހައްލުކުރުމަށް ސަރުކާރުން އަންނަނީ އިތުރު މަސައްކަތްތަކެއް ވެސް ކުރަމުންނެވެ. އެގޮތުން ސުޕްރީމް ކޯޓަށް ޚާއްޞަ އިމާރާތެއް އެޅުމަށް މާލެއިން ބިމެއް ހަމަޖައްސާފައިވާއިރު، ކްރިމިނަލް ކޯޓާއި ޑްރަގް ކޯޓު ހިންގުމަށް ވެސް ހުޅުމާލޭގައި އިމާރާތެއް ވަނީ ތަރައްޤީކޮށްފައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.