އިންތިޚާބުގެ ދެވަނަ ބުރުގެ ރީ-ރަޖިސްޓްރޭޝަންއާ ގުޅިގެން ހުށަހަޅާފައިވަނީ 361 ޝަކުވާ!

ރިޔާސީ އިންތިޚާބުގެ ދެވަނަ ބުރުގައި ރީ-ރަޖިސްޓްރީވި މީހުންގެ ލިސްޓަށް ޝަކުވާއަށް ހުށަހެޅުމަށް ހުޅުވާލުމުން، މިހާތަނަށް އެކޮމިޝަނަށް ލިބިފައިވަނީ 361 ޝަކުވާކަމަށް އިލެކްޝަންސް ކޮމިޝަން (އިސީ) ގެ ނާއިބު ރައީސް އިސްމާޢިލް ޙަބީބް ވިދާޅުވެއްޖެއެވެ.

Ads by STELCO

ޙަބީބު ވިދާޅުވިގޮތުގައި މިހާތަނަށް ލިބިފައިވާ ޝަކުވާތަކުގެ ތެރެއިން، އެންމެ ގިނަ ޝަކުވާ ލިބިފައިވަނީ ރިޖެކްޓުވި ފޯމުތަކާއި ގުޅިގެންނެވެ. އަދި އެމީހަކަށް ނޭނގި، އެމީހާގެ ނަމުގައި ފޯމު ހުށަހަޅައިގެން ޝަކުވާ ލިބިފައިވަނީ ވަރަށް މަދު ބައެއްގެ ފަރާތުންކަމަށްވެސް ޙަބީބު ވިދާޅުވިއެވެ.

އިންތިޚާބުގެ ދެވަނަ ބުރުގައި ރީ-ރަޖިސްޓާވުމަށް ހުޅުވާލުމުން ހުށަހެޅި 47،000 އަށް ވުރެ ގިނަ ފޯމުތަކުގެ ތެރެއިން، ސައްޙަ ފޯމުގެ އަދަދަކީ 38،763 ފޯމެވެ. އަދި ފޯމުގެ ސައްޙަކަން ކަށަވަރު ނުވާ 11،284 ފޯމެއް އެކޮމިޝަނުން ވަނީ ރިޖެކްޓްކޮށްލާފައެވެ.

ރީ-ރަޖިސްޓްރޭޝަނަށް ހުޅުވާލި މުއްދަތު ހަމަވުމުވުން، ވޯޓާސް ލިސްޓު ޢާންމުކޮށް، ޝަކުވާއަށް ހުޅުވާލާފައިވަނީ މިމަހުގެ 21 އިން 23 ގެ ނިޔަލަށެވެ. ދެވަނަ ބުރުގެ ވަގުތު ކުޑަތަންވެފައިވުމާއެކު ކޮމިޝަނުން ވަނީ ރީ-ރަޖިސްޓަރ ކުރުމަށާއި، ޝަކުވާ ހުށަހެޅުމަށް 48 ގަޑިއިރުގެ މުއްދަތެއް ދެއްވާފައެވެ.

އީސީން މަޢުލޫމާތު ދިން ގޮތުގައި، އެކޮމިޝަނަށް ލިބިފައިވާ ހުރިހާ ޝަކުވާތަކަކަށް ޖަވާބުދާރީވުމުގެ މަސައްކަތް ދަނީ ކުރަމުންނެވެ. އަދި ވޯޓުލާ މީހުންގެ ފައިނަލް ލިސްޓު އިޢުލާނުކުރުމަށް ތައްޔާރުވަމުން އަންނަ ކަމަށްވެސް އެ ކޮމިޝަނުން ވިދާޅުވިއެވެ. މި ލިސްޓަށް އެއްވެސް އުނި އިތުރެއް ނުގެނެވޭނެކަމަށް، ކޮމިޝަނުގެ ނައިބު ރައީސް ޙަބީބް ވަނީ ވިދާޅުވެފައެވެ.

ރިޔާސީ އިންތިޚާބުގެ ދެވަނަ ބުރު މިމަހުގެ 30 ވަނަ ދުވަހު ބޭއްވުމަށް ހަމަޖެހިފައިވާއިރު، ވޯޓު ލުމުގެ ޙައްޤު ލިބިގެންވަނީ 282،803 މީހުންނަށެވެ.